Fri, 4 July 2014
សែន ដាវីត
ភ្នំពេញប៉ុស្តិ៍
ភ្នំពេញៈ ស្រ្តីខ្មែរធ្វើការតាមផ្ទះនៅ ប្រទេសសិង្ហបុរី ពីរនាក់ត្រូវបានបញ្ជូនត្រឡប់មកវិញកាលពីថ្ងៃពុធ ដោយសារតែទ្រាំធ្វើការច្រើនម៉ោងមិនបានដែលនេះជាករណីលើកដំបូងបន្ទាប់ពីរដ្ឋាភិបាល បានសម្រេចឲ្យមានការបញ្ជូនពលករទៅធ្វើការតាមផ្ទះនៅ ប្រទេសសិង្ហបុរី ដែលល្បីខាងមានលក្ខខណ្ឌការងារល្អ។
ពលការិនី ផន ម៉ៅ អាយុ ២៤ឆ្នាំ មានស្រុកកំណើតនៅ ខេត្តកំពង់ធំ បាននិយាយថា រូបនាងបានរត់គេចចេញពីផ្ទះថៅកែកាលពីថ្ងៃ ទី២៤ ខែមិថុនា បន្ទាប់ពីធ្វើការនៅទីនោះ អស់រយៈ ៦ខែ ដោយទ្រាំមិនបាននឹងការធ្វើការក្នុងផ្ទះ ១៦ ម៉ោងក្នុងមួយថ្ងៃ។
នាងថ្លែងថា៖ «ខ្ញុំសុំថៅកែឈប់សម្រាកមួយថ្ងៃក្នុងមួយសប្តាហ៍ ឬមួយខែតែគាត់មិនព្រមថា ខ្ញុំទាក់ទងប្រុសខ្ញុំក៏លួចរត់ចេញពេលថៅកែមិននៅផ្ទះ។ ក្នុងកិច្ចសន្យាធ្វើការតែ ៨ ម៉ោងក្នុងមួយថ្ងៃ ប៉ុន្តែខ្ញុំត្រូវគេឲ្យធ្វើការពីម៉ោង ៦ ព្រឹកដល់ម៉ោង ១០ យប់ធ្វើការក្នុងផ្ទះបីជាន់រាល់ថ្ងៃ»។
ស្រីម៉ៅ បានចាកចេញពី កម្ពុជា កាលពី ខែធ្នូ ឆ្នាំ២០១៣ តាមរយៈក្រុមហ៊ុន ហ្វីលីម័រ។ នាងនិយាយថា នាងមិនត្រូវបានក្រុមហ៊ុន តម្រូវឲ្យបង់ប្រាក់មុនទេ តែប្រាក់ខែ ៦ ខែដំបូងរបស់នាងត្រូវបានគេកាត់ចំនួន ៤០០ ដុល្លារខណៈដែលនាងទទួលបាន ៥២០ ដុល្លារក្នុងមួយខែ។
ចំណែកពលការិនីម្នាក់ទៀត ឈ្មោះ យ៉ែម ធីតា អាយុ ៣១ឆ្នាំ និយាយថា នាងធ្លាប់ទៅធ្វើការនៅ ប្រទេសម៉ាឡេស៊ី អស់រយៈពេល ២ ឆ្នាំដោយគ្មានការរងគ្រោះអ្វីឡើយ ទើបនាងចង់ទៅធ្វើការនៅ សិង្ហបុរី ក្រោយពីស្តាប់ការផ្សព្វផ្សាយថា ប្រទេសសិង្ហបុរី មានលក្ខខណ្ឌការងារល្អ មានប្រាក់ខែខ្ពស់។ តែនៅពេលនាងទៅដល់នាងត្រូវគេបង្ខំឲ្យធ្វើការច្រើនម៉ោងក្នុងមួយថ្ងៃ ដោយគ្មានថ្ងៃឈប់សម្រាក។
នាងនិយាយថា ថៅកែទីមួយឲ្យនាងធ្វើការតាំងពីម៉ោង ៦ ព្រឹក ដល់ម៉ោង ១២ យប់។ នាងទ្រាំមិនបាន ក៏សុំប្តូរថៅកែតែដល់ពេលថៅកែទី២ ឃើញនាងឈឺ ក៏សម្រេចបញ្ជូននាងមកថៅកែទីបី តែនាងមិនព្រម ព្រោះប្តូរថៅកែពីមួយទៅមួយប្រាក់ខែនាងត្រូវគេកាត់គ្មានសល់ ទើបនាងសម្រេចសុំត្រឡប់មកស្រុកវិញ។
នាងថ្លែងថា៖ «ខ្ញុំត្រូវគេឲ្យធ្វើការតាំងពីម៉ោង ៦ ព្រឹករហូតដល់ម៉ោង ១២ យប់លើសពីកិច្ចសន្យាតម្រូវឲ្យធ្វើតែ ៨ ម៉ោង»។
លោក អំ សំអាត ប្រធានផ្នែកស៊ើបអង្កេតអង្គការ លីកាដូ បានថ្លែងថា ការដកហូតប៉ាស្ព័រ របស់ពលករទុកនិងការធ្វើការដោយកាត់ប្រាក់ខែ ៦ខែ ដំបូងជាទម្រង់នាំឲ្យមានការកេងប្រវ័ញ្ចពលកម្មកម្មករដូចនៅ ប្រទេសម៉ាឡេស៊ី ដែរ។
លោកនិយាយថា៖ «ខ្ញុំទទួលស្គាល់ថា ប្រទេសសិង្ហបុរី មានលក្ខខណ្ឌការងារល្អក៏ប៉ុន្តែអាស្រ័យទៅលើបុគ្គលជាថៅកែផ្ទាល់»។
លោកស្រី អ៊ឹង ស៊ាងរិទ្ធី ប្រធានសមាគមទីភ្នាក់ងារជ្រើសរើសពលករកម្ពុជាបានថ្លែងថា ករណីនេះ ពលការិនីចង់ត្រឡប់មកស្រុកវិញដោយខ្លួនឯង។
លោកស្រីបញ្ជាក់ថា៖ «ថៅកែមិនពេញចិត្តនឹងការងារនាង ហើយនាងមានមិត្តប្រុស។ នាងចង់ត្រឡប់មកស្រុកខ្មែរវិញ ហើយក្រុមហ៊ុនជួយបញ្ជូននាងត្រឡប់មកវិញមិនមែនអង្គការ លីកាដូ ជួយសង្គ្រោះនោះទេ។ នាងគ្មានថៅកែធ្វើបាបអីនោះទេច្បាប់ស្រុកគេតឹងតែងណាស់»។
លោក ហេង សួរអ្នកនាំពាក្យក្រសួងការងារ និងតំណាងក្រុមហ៊ុន ហ្វីលីម័រ មិនអាចទាក់ទងដើម្បីសុំអត្ថាធិប្បាយបានទេកាលពីម្សិលមិញ៕