ដោយ៖ ណុល ដារ៉ា
ថ្ងៃសៅរ៍ ទី5 កក្កដា 2014
http://vodhotnews.com
កម្មកររោងចក្រ Canteran ប្រមាណ១៣០០នាក់ នៅព្រឹកថ្ងៃសៅរ៍នេះ បន្តធ្វើកូដកម្មទាមទារឲ្យភាគីរោងចក្របើកប្រាក់ខែនៅថ្ងៃទី៥ ឬទី៦ ដូចធម្មតាឡើងវិញ។
ប្រធានសហជីពចលនាកម្មករ លោកប៉ាវ ស៊ីណា ឲ្យVODដឹងនៅថ្ងៃសៅរ៍នេះថា ការធ្វើកូដកម្មរបស់កម្មកររោងចក្រ Canteran ដែលមានទីតាំងនៅផ្លូវវេងស្រេង សង្កាត់ត្រពាំងថ្លឹង ខណ្ឌដង្កោរ គឺដោយសារភាគីរោងចក្រ បានប្ដូរថ្ងៃបើកប្រាក់ខែ ដែលធ្លាប់បើកជាទៀងទាត់នៅថ្ងៃទី៥ ឬទី៦ ទៅបើកនៅថ្ងៃទី១០ រៀងរាល់ខែវិញ។
លោកប៉ាវ ស៊ីណា បន្តថា ការលើកពេលបើកប្រាក់ខែនេះ ធ្វើឲ្យប៉ះពាល់ដល់ជីវភាពរបស់កម្មករ ដោយសារពួកគាត់ត្រូវការប្រាក់ជាទៀងទាត់ ដើម្បីយកទៅទូទាត់ថ្លៃឈ្នួលផ្ទះ និងថ្លៃម្ហូបអាហារ និងចំណាយផ្សេងៗ។
VOD មិនអាចទាក់ទងតំណាងរោងចក្រCanteran ដើម្បីសុំការពន្យល់ពីបញ្ហានេះបាននៅឡើយទេ។
សូមជម្រាបថា កូដកម្មរបស់កម្មករ Canteran នេះ បានផ្ទុះឡើងកាលពីថ្ងៃ៣ ខែកក្កដា។ តាមលោកប៉ាវ ស៊ីណា ឲ្យដឹងថា ពួកគេនឹងបន្តធ្វើកូដកម្មរហូតដល់មានដំណោះស្រាយ៕
សូមសរសេរមកលោក ណុល ដារ៉ា តាមរយៈ dara@vodhotnews.com