ដោយ៖ បាន វិទ្យា
ថ្ងៃចន្ទ ទី7 កក្កដា 2014
http://vodhotnews.com
បុគ្គលិកក្រុមហ៊ុនស៊ីនទ្រីប្រមាណជា១០០នាក់ នៅភូមក្លា សង្កាត់ដង្កោ ខណ្ឌដង្កោ រាជធានីភ្នំពេញ នៅថ្ងៃចន្ទនេះ បន្តធ្វើកូដកម្មដើម្បីទាមទារលក្ខខណ្ឌការងារចំនួន១០ចំណុច បន្ទាប់ពីការចរចាកាលពីកន្លងទៅមិនទាន់មានដំណោះស្រាយ។
លក្ខខណ្ឌការងារចំនួន១០ចំណុច រួមមាន ១.លុយទ្រទ្រង់សុខភាព១០ដុល្លារ ២.ប្រាក់បំណាច់ឆ្នាំ ៣.លុយស្នាក់នៅ១០ដុល្លារ ៤.លុយធ្វើដំណើរ១៥ដុល្លារ ៥.បង្កើតច្បាប់អំពីប្រេង និងគ្រោះថ្នាក់ ៦.កាតវិភាគទាន២ពាន់រៀល ៧.ពេទ្យប្រចាំការ ៨.កាត ប.ស.ស ៩.បើកច្រកផ្លូវចេញចូលសម្រាប់កម្មករដើរ និង១០.សំណូមពរឲ្យដកមេ ឈ្មោះ ទី វុទ្ថា និងប្តូរសន្តិសុខ។
លោក ប្រាក់ សុខា ដែលអះអាងថាជាតំណាងបុគ្គលិក ប្រាប់VODនៅថ្ងៃចន្ទនេះថា កម្មករទាំងអស់បានធ្វើកូដកម្មតាំងពីថ្ងៃអាទិត្យម្សិលមិញ ដើម្បីទាមទារលក្ខខណ្ឌការងារចំនួន១០ចំណុច ដោយសារកម្មករ៣០នាក់ ត្រូវបានចោទពីការលួចប្រេង និងត្រូវផ្តល់សំណងដល់ក្រុមហ៊ុនចំនួន៣០០ដុល្លារ។ លោកបញ្ជាក់ «កាលពីព្រឹកមិញភាគីខាងក្រុមហ៊ុន បានសន្យានឹងពិចារណាលើលក្ខខណ្ឌការងារមួយចំនួន ហេតុនេះកម្មករនៅតែបន្តធ្វើកូដកម្ម និងពុំព្រមចូលធ្វើការឡើយ ព្រោះថាការសន្យានេះទាន់ជាដំណោះស្រាយ»។
ប្រធានការិយាល័យសម្អាតក្រុង និងយានដ្ឋាន និងតំណាងឲ្យក្រុមហ៊ុនស៊ីនទ្រី លោក ងួន ស៊ីផេង មានប្រសាសន៍ថា ក្រុមហ៊ុនបានសម្របសម្រួលជាមួយបុគ្គលិកដែលបានលួចប្រេង ដោយមិនយកសំណងពីពួកគាត់ឡើយ និងផ្តល់ប្រេងចំនួន២លីត្រដល់ពួកគាត់។ លោកថា ភាគីក្រុមហ៊ុនបានយល់ព្រមលើលក្ខខណ្ឌ៦ចំណុច ប៉ុន្តែចំណុចមួយចំនួនមិនមែនជាកាតព្វកិច្ចរបស់ក្រុមហ៊ុន ដូចនេះទាមទារទុករយៈពេលឲ្យក្រុមហ៊ុនធ្វើការស្នើសុំទៅស្ថាប័នពាក់ព័ន្ធ ដូចជាការធ្វើកាត ប.ស.ស ជាដើម។
គួរបញ្ជាក់ថា កាលពីថ្ងៃទី២ខែកុម្ភៈ ឆ្នាំ២០១៤ បុគ្គលិកក្រុមហ៊ុនស៊ីនទ្រី បានធ្វើកូដកម្មម្តងហើយ ដោយទាមទារលក្ខខណ្ឌការងារ៤ចំណុច ក្នុងនោះមានការទាមទារដំឡើងប្រាក់ខែផងដែរ។ រាល់ការទាមទារម្តងៗ បុគ្គលិកមិនបានចេញទៅប្រមូលសំរាមធ្វើឲ្យសំរាមគរពេញរាជធានីភ្នំពេញ៕
សរសេរមកកាន់ បាន វិទ្យា តាមរយៈ vitcheaban77@gmail.com