Tue, 29 July 2014
ម៉ៃ ទិត្យថារ៉ា
ភ្នំពេញប៉ុស្តិ៍
កំពង់ធំៈ បណ្តាញសហគមន៍ព្រៃឡង់ទាំងបួនខេត្តដែលរស់នៅជុំវិញព្រៃឡង់បានអំពាវនាវទៅដល់រដ្ឋាភិបាលកម្ពុជាឲ្យចេញវិធានការណាមួយជាបន្ទាន់ទៅដល់អាជ្ញាធរដែលជាប់ពាក់ព័ន្ធនៅក្នុងខេត្ត ដើម្បីឲ្យទប់ស្កាត់បទល្មើសព្រៃឈើដែលកំពុងតែកើតមានយ៉ាងអនាធិបតេយ្យនៅក្នុងព្រៃឡង់។
លោក ឈៀង វុទ្ធី តំណាងប្រជាសហគមន៍ព្រៃឡង់ខេត្តកំពង់ធំបានថ្លែងឲ្យដឹងថា បច្ចុប្បន្ននេះឈ្មួញបានបង្វែរសកម្មភាពដឹកជញ្ជូនឈើដោយឲ្យពលរដ្ឋចូលកាប់ឈើនៅក្នុងព្រៃរួចដឹកចេញតាមរទេះគោនិងគោយន្តច្នៃបុកស័រ ដឹកមកលក់ឲ្យគេដែលមានរថយន្តកូរ៉េ៣តោនកន្លះរង់ចាំខាងក្រៅ។
លោកបានថ្លែងឲ្យដឹងថា៖«ក្រុមរកស៊ីឈើទាំងអស់នោះកាប់ឈើដោយពុំមានខ្លាចរអាអាជ្ញាធរទេ គឺគេដឹកពេញឡានពេញរទេះគោទាំងកណ្តាលថ្ងៃតែម្តង។ ខ្ញុំគិតថា បើពុំមានការឃុបឃិតពីសំណាក់មន្ត្រីទាំងអស់នោះទេ ឈ្មួញក៏មិនអាចរកស៊ីដោយសេរីនោះដែរ»។
លោកបានថ្លែងឲ្យដឹងទៀតថា ចំនុចដែលដឹកច្រើនជាងគេនៅក្នុងស្រុកសណ្តាន់គឺមានឃុំចំនួនពីរ គឺឃុំមានឫទ្ធិ និង ឃុំដងដាំបិត ដែលស្ថិតក្នុងចំនុចច្រកតោ និងចំនុចព្រះអាទិត្យ ដែលក្នុងមួយថ្ងៃៗមានការដឹកចេញជាមធ្យមចាប់ពី ២៥ រទេះគោទៅ ៣០រទេះគោ និងមានម៉ាស៊ីនអារឈើសរុបជាង ១០០០ ម៉ាស៊ីន។
លោកបានថ្លែងឲ្យដឹងថា៖«អាជ្ញាធរនៅខេត្តមិនចាត់វិធានការអ្វីទាំងអស់ ដូច្នេះបើរដ្ឋាភិបាលមិនចេញលិខិតបង្គាប់អ្វីមួយនោះទេ គឺឈើប្រភេទលេខ២នេះនឹងរលាយអស់ដូចឈើប្រភេទលេខ១ជាមិនខាន។ បើសិនជាអាជ្ញាធរទប់ស្កាត់វិញមួយថ្ងៃម៉ាស៊ីនកាត់ឈើដឹក២ឡានមិនអស់ផង»។
ចំណែកលោក ហឿន សុភាព បានថ្លែងថា ប្រជាសហគមន៍ពុំសូវហ៊ានចេញមុខប្រឆាំងនឹងអ្នកប្រព្រឹត្តបទល្មើសដូចមុនខ្លាំងក្លាទេ ដោយសារតែ ឈ្មួញឃុបឃិតជាមួយអាជ្ញាធរដូច្នេះ ពេលសហគមន៍ធ្វើគេដាក់លិខិតប្តឹងទៅតុលាការដោយចោទប្រកាន់ថា បំផ្លិចបំផ្លាញទ្រព្យសម្បត្តិរបស់គេ។
លោកបានថ្លែងឲ្យដឹងទៀតថា៖ «បើរដ្ឋាភិបាលមិនចាត់វិធានការទាន់ពេលទេ គឺព្រៃឡង់នឹងបាត់បង់ក្នុងពេលខាងមុខដ៏ឆាប់នេះ ប៉ុន្តែបើចាត់វិធានការទាន់ពេល គឺអាចរក្សាព្រៃបានខ្លះ»។
លោក ឈឹម សាវុធ នាយកប្រតិបត្តិអង្គការការពារធនធានធម្មជាតិ បានថ្លែងថា បច្ចុប្បន្នរដ្ឋាភិបាលមិនត្រឹមតែចេញវិធានការទប់ស្កាត់តែនៅក្នុងតំបន់ព្រៃឡង់នោះទេ គឺរដ្ឋាភិបាលគួរតែចេញវិធានការទប់ស្កាត់ទូទាំងប្រទេសតែម្តងទើបអាចការពារព្រៃបានពីព្រោះឈ្មួញគេដើរកាប់ទូទាំងប្រទេសឲ្យតែខេត្តណាមានព្រៃឈើ ទោះបីជាតំបន់អភិរក្ស ឬតំបន់ការពារក៏ដោយ។
លោកបានថ្លែងឲ្យដឹងទៀតថា៖«បើរដ្ឋាភិបាលមានឆន្ទៈទប់ស្កាត់ពិតប្រាកដមែនវាមិនពិបាកទេដូចដែលយើងនិយាយដដែលៗហើយថា របរនេះមិនដូចគេរកស៊ីលួចលាក់ដូចគ្រឿងញៀនទេ គឺគេដឹកជារថយន្តធំៗហើយចំហតែម្តង»។
ព្រៃឡង់លាតសន្ធឹងលើខេត្តចំនួនបួនដូចជា ខេត្តព្រះវិហារ ក្រចេះ ស្ទឹងត្រែង និងកំពង់ធំ ដែលគ្របដណ្តប់លើផ្ទៃដី ៣៦០០ គីឡូម៉ែត្រក្រឡា ហើយព្រៃឡង់គឺជាប្រភពនៃអនុផលព្រៃឈើយ៉ាងសំខាន់សម្រាប់ប្រជាពលរដ្ឋភាគច្រើនជាជនជាតិភាគតិចប្រមាណជាង៦០.០០០គ្រួសារក្នុងភូមិជិត៤០០ភូមិដែលស្ថិតនៅក្នុងខេត្តទាំងបួន ប្រកបរបរបោចវល្លិ រកជ័រ និងបេះផ្លែឈើលក់ចិញ្ចឹមជីវិត។
លោក សៅ វណ្ណី នាយផ្នែករដ្ឋបាលព្រៃឈើ ស្រុកសណ្តាន់ពុំអាចធ្វើការទំនាក់ទំនងដើម្បីសុំការអត្ថាធិប្បាយបានទេកាលពីថ្ងៃម្សិលមិញ។
លោក អ៊ុន បុត្រ អភិបាលស្រុកសណ្តាន់ បានថ្លែងឲ្យដឹងថា អាជ្ញាធររបស់លោកតែងតែធ្វើសកម្មភាពទប់ស្កាត់ចំពោះបទល្មើសព្រៃឈើដែលកើតមានឡើងនៅក្នុងស្រុកនេះ ហើយតែងតែឃាត់បានបទល្មើសជាច្រើនផងដែរនាពេលកន្លងមក មិនមែនថាអាជ្ញាធរមិនធ្វើអ្វីសោះនោះទេ។
លោកអភិបាលបានថ្លែងឲ្យដឹងបន្ថែមទៀតថា៖«តើឲ្យយើងធ្វើយ៉ាងម៉េចបើពលរដ្ឋរស់នៅក្នុងព្រៃ ហើយអត់មានស្រែ ដូច្នេះគាត់ដឹកតិចតួចតាមរទេះគោដើម្បីដោះដូរជីវភាពរបស់គាត់។ គាត់មិនបានរកស៊ីអ្វីធំដុំដល់ថ្នាក់បំផ្លាញឲ្យអស់ទាំងស្រុងនោះទេ»៕