ដោយ៖ ជន ស្រីណុច
ថ្ងៃអង្គារ ទី29 កក្កដា 2014
http://vodhotnews.com
សាលារាជធានីភ្នំពេញ ប្រកាសបិទសកម្មភាពចរាចរណ៍ជាបណ្តោះអាសន្ន លើកំណាត់មហាវិថី និងផ្លូវមួយចំនួន ជុំវិញបរិវេណកន្លែងប្រារព្ធពិធី សម្ពោធស្ពានអាកាសស្ទឹងមានជ័យ ចាប់ពីរសៀលថ្ងៃទី៣០ ដល់ថ្ងៃ៣១ខែកក្កដានេះ ។
ការប្រកាសបិទផ្លូវនេះ ដោយសារលោកនាយករដ្ឋមន្ត្រីនឹងចូលរួមសម្ពោធស្ពានអាកាសស្ទឹងមានជ័យ ដើម្បីដាក់ឲ្យសាធារណៈជនប្រើប្រាស់ជាផ្លូវការ នៅថ្ងៃព្រហស្បតិ៍ ទី៣១ខែកក្កដានេះ ។
សេចក្តីជូនដំណឹងរបស់សាលារាជធានីភ្នំពេញចុះថ្ងៃទី២៨ខែកក្កដាឲ្យដឹងថា ការបិទផ្លូវនេះ ដើម្បីធ្វើឲ្យពិធីសម្ភោធស្ពានអាកាសស្ទឹងមានជ័យ ប្រពឹត្តទៅដោយរលូន និងរក្សាបាននូវសន្តិសុខ សុវត្ថិភាពសណ្តាប់ធ្នាប់ របៀបរៀបរយសាធារណៈ ព្រមទាំងបញ្ជៀសបានការកកស្ទះចរាចរណ៍ ។
គួរបញ្ជាក់ថា ស្ពានអាកាសស្ទឹងមានជ័យ បានបើកការដ្ឋានសាងសង់កាលពីថ្ងៃទី ២៦ ខែ វិច្ឆិកា ឆ្នាំ ២០១២ ដែលទទួលម៉ៅការសាងសង់ដោយក្រុមហ៊ុន O.C.I.C ជាក្រុមហ៊ុនក្នុងស្រុក ដោយចំណាយថវិកាសាងសង់អស់ប្រមាណ ១៧លានដុល្លារអាមេរិក ៕
សូមសរសេរមកកាន់កញ្ញា ជន ស្រីណុច តាមរយៈ chornsreynoch@vodhotnews.com