ដោយ៖ ឡុង គីមម៉ារីតា
ថ្ងៃចន្ទ ទី4 សីហា 2014
http://vodhotnews.com
កម្មករជិត៣០នាក់ នៅរោងចក្រកាត់ដេរសំលៀកបំពាក់ Vantage River Textile ធ្វើបាតុកម្មដើរហែក្បួនទៅសាលាខេត្តព្រះសីហនុ ដើម្បីសុំឲ្យអាជ្ញាធរជួយអន្តរាគមន៍ ក្នុងករណីរោងចក្របញ្ឈប់កម្មករ និងទាមទារលក្ខខណ្ឌការងារ៨ចំណុច។
ការដើរហែក្បួនធ្វើឡើងបន្ទាប់ពីកម្មករបានធ្វើកូដកម្មតាំងពីថ្ងៃទី៣១មក ដែលមិនមានដំណោះ ស្រាយក្នុងការទាមទារឲ្យរោងចក្រទទួលយកពួកគាត់ឲ្យចូលធ្វើការវិញ ហើយកម្មករចោទថា ខាងរោងចក្របញ្ឈប់ពួកគាត់ដោយសារគម្រោងបង្កើតសហជីព និងទាមទារលក្ខខណ្ឌការងារ៨ចំណុច។
តំណាងកម្មករកញ្ញា កែវ ស្រីពេជ្រ ប្រាប់VOD នៅរសៀលថ្ងៃចន្ទនេះថា កម្មករជិត៣០នាក់ បានដើរហែរក្បួនទៅសាលាខេត្តព្រះសីហនុ ដើម្បីសុំអាន្តរាគមន៍ តែពុំមានអំពើហឹង្សាណាមួយកើតឡើងនោះទេ ហើយអាជ្ញាធរបានឲ្យតំណាងកម្មករចំនួន៤នាក់ ដើម្បីចូលជួបពិភាក្សា។ កញ្ញាបន្តថា ក្រោយពីកិច្ចពិភាក្សា អាជ្ញាធរបានសន្យាថានឹងជួយដោះស្រាយជូន កម្មករក្នុងរយៈពេល១សប្តាហ៍។
កញ្ញា កែវ ស្រីពេជ្រ បន្ថែមថា ក្រោយពីការជួបចរចា កម្មករទាំងជិត៣០នាក់ នៅតែប្រកាន់ ជំហរក្នុងការធ្វើបាតុកម្មបន្តទៀត ហើយខណៈពេលរង់ចាំ កម្មករក៏បន្តធ្វើកូដកម្មនៅមុខរោង ចក្រ ដើម្បីរងចាំដំណោះស្រាយ។
VOD មិនអាចសុំការអត្ថាធិប្បាយពីជំនួយការផ្នែករដ្ឋបាលរបស់រោងចក្រ Vantage River Textile កញ្ញា យិន ផារី បាននៅឡើយទេ នៅថ្ងៃចន្ទនេះ ដោយទូរស័ព្ទចូល តែគ្មានអ្នកលើក ។ កាលពីថ្ងៃសុក្រសប្តាហ៍មុន កញ្ញាឲ្យដឹងថា រោងចក្រមិនអាចទទួលយកកម្មករ ដែលបានបញ្ឈប់ទាំង៧នាក់នោះទេ ព្រោះរោងចក្រត្រូវកាត់បន្ថយកម្លាំងពលកម្ម ក្នុងរយៈពេលខ្លី ខណៈគ្មានការបញ្ជាទិញច្រើន ហើយពាក់ព័ន្ធនឹងលក្ខខណ្ឌការងារទាំង៨ចំណុចដែលកម្មករទាមទារនោះ ក៏ខាងរោងចក្រពុំទាន់អាចឲ្យចម្លើយបានទេ ដោយសារកម្មករបានផ្អាកការចរចាតាំងពីដំបូង នៅពេលដែលទាមទារលក្ខខណ្ឌទី១ពីរោងចក្រមិនបាន។
លក្ខខណ្ឌការងារ៨ចំណុចដែលកម្មករទាមទាររួមមាន ១. ទទួលយកកម្មករ និងកម្មការិនីចូលធ្វើការវិញ ២. ត្រូវណែនាំឲ្យប្រធានក្រុម និងផ្នែកនីមួយៗប្រើពាក្យសំដីសមរម្យ ៣. មិនត្រូវបញ្ឈប់កម្មករដោយគ្មានមូលហេតុ ៤.ត្រូវឈរលើគោលការណ៏ស្ម័គ្រចិត្តក្នុងករណីមានការថែមម៉ោង ៥. ត្រូវផ្តល់ប្រាក់គុណនឹង២ នៅពេលធ្វើការនៅថ្ងៃបុណ្យ ៦. សម្រួលច្បាប់ដល់កម្មករនៅពេលមានធុរៈចាំបាច់ ៧. រោងចក្រមិនត្រូវរើសអើងសហជីព ៨. ផ្តល់សម្ភារ និងពេលវេលាសម្រាកឲ្យបានសមរម្យ។
ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តព្រះសីហនុ លោក យ៉ូវ ខេមរា មាន ប្រសាសន៍ថា ខាងមន្ទីរបានបញ្ចូនសំណុំរឿងនេះ ទៅក្រុមប្រឹក្សាអាជ្ញាកណ្តាលដើម្បីធ្វើការដោះស្រាយរួចហើយ ។ លោកបន្តថា នៅថ្ងៃស្អែក មន្ទីរការងារខេត្តនឹង អញ្ជើញភាគីរោងចក្រ ព្រមទាំងកម្មករ ដើម្បីធ្វើការចរចាម្តងទៀត។
ប្រធានសហជីពចលនាកម្មករ លោក ប៉ាវ ស៊ីណា មានប្រសាសន៍ថា ក្នុងនាមជាអាជ្ញាធរគួរតែ ពន្លឿននូវនីតិវិធីក្នុងការដោះស្រាយជូនកម្មករ ដើម្បីកុំឲ្យយកម្មករអស់ជំនឿលើអាជ្ញាធរ។
រោងចក្រកាត់ដេរសំលៀកបំពាក់ Vantage River Textile ស្ថិតនៅក្នុងភូមិលេខ៥ សង្កាត់លេខ៤ ក្រុងព្រះសីហនុបង្កើតឡើងនៅចុងឆ្នាំ២០១៣ ដែលមានកម្មករសរុបប្រមាណជាង៤០០នាក់ ដែលកម្មករម្នាក់ទទួលបានប្រាក់ខែគោល ១០០ដុល្លារ។
សូមសរសេរមកកាន់កញ្ញា ឡុង គីមម៉ារីតា តាមរយៈ longkimmarita@gmail.com