ដោយ៖ បូ សាវី
ថ្ងៃពុធ ទី20 សីហា 2014
http://vodhotnews.com
ប្រជាពលរដ្ឋ៧៨គ្រួសារ នៅក្រុងព្រះវិហារ ទទូចឲ្យអភិបាលខេត្ដនេះ លោក អ៊ុំ ម៉ារ៉ា ចុះដោះស្រាយជម្លោះដីធ្លី ដើម្បីឲ្យពួកគាត់រស់នៅដោយស្របច្បាប់ ទៅតាមចំណាររដ្ឋាភិបាល កាលពីដើមឆ្នាំ២០១៤។
តំណាងពលរដ្ឋ លោក ទូច ថារី ប្រាប់VODនៅព្រឹកថ្ងៃពុធនេះថា អាជ្ញាធរខេត្ដព្រះវិហារ មានគំរោងដក ដីផ្ទះអ្នកភូមិ៧៨គ្រួសារ ស្មើ៨ហិកតា យកធ្វើជាដីបម្រុងទុករបស់រដ្ឋ ដោយសន្យាដោះដូរដីនៅកន្លែងផ្សេង ប៉ុន្ដែពលរដ្ឋមិនព្រម ដោយសារពលរដ្ឋនៅក្បែរនោះអាចរស់បាន។ លោកសង្ស័យថា អាជ្ញាធរខេត្ដចង់យកដីនោះលក់ឲ្យក្រុមហ៊ុន ព្រោះនៅក្បែរភូមិមានក្រុមហ៊ុនកិនថ្ម។
ពលរដ្ឋមួយរូបទៀត អ្នកស្រី តាំង លី ឲ្យដឹងថា នៅឆ្នាំ២០០២ គាត់បានទិញ ដីឡូទំហំជាងកន្លះហិកតា (៧០មx៨០ម) សម្រាប់ធ្វើផ្ទះរស់នៅ ដោយមានការទទួលស្គាល់ពីភូមិឃុំ។ ស្ដ្រីមេម៉ាយរូបនោះបន្ដថា បន្ទាប់ពីពួកគាត់ខំស្វែងរកអន្ដរាគមន៍ពីគ្រប់ស្ថាប័ន ទើបនៅដើមឆ្នាំ២០១៤នេះ អាជ្ញាធរថ្នាក់ជាតិចេញសេចក្ដីបង្គាប់ឲ្យអភិបាលខេត្ដដោះស្រាយជូន ពួកគាត់ ប៉ុន្ដែបច្ចុបន្បន្ននេះ អាជ្ញាធរខេត្តព្រះវិហារមិនបានដោះស្រាយជូនប្រជាពលរដ្ឋ តាមបញ្ជារបស់នាយករដ្ឋមន្ត្រី ក៏ដូចជារដ្ឋមន្ត្រីក្រសួងមហាផ្ទៃទេ ផ្ទុយទៅវិញបែរជាហាមពួកគាត់មិនឲ្យធ្វើផ្ទះ និងបង្កបង្កើនផលទៅវិញ។ អ្នកស្រីស្នើឲ្យអាជ្ញាធរខេត្ដ ប្រគល់ដី៨ហិកតានោះជួនពួកគាត់ ដើម្បីឲ្យបានរស់នៅស្របច្បាប់។
ករណីនេះ អាជ្ញាធរខេត្ដ និងអភិបាលក្រុងព្រះវិហារ លោក នុង សោភ័ណ ឆ្លើយដាក់គ្នាទៅវិញទៅមក។ នាយករដ្ឋបាលសាលាខេត្ដព្រះវិហារ លោក សុខ ហៃ បង្វែរសំណួរទៅអភិបាលក្រុងព្រះវិហារ។ ចំណែកអភិបាលក្រុងព្រះវិហា លោក នុត សោភ័ណ ឲ្យសួរទៅអភិបាលខេត្ដ លោក អ៊ុំ ម៉ារ៉ា។
នៅថ្ងៃពុធនេះ ប្រជាពលរដ្ឋនៅខេត្តព្រះវិហា បានផ្ញើលិខិតចំនួន៥ ដែលមានចំណារពីខុទ្ទកាល័យនាយករដ្ឋមន្ដ្រី រដ្ឋសភា ព្រឹទ្ធសភា ក្រសួងមហាផ្ទៃ និងក្រសួងរៀបចំដែនដីនគរូបនីយកម្ម និងសំណង់ ស្នើសុំឲ្យអភិបាលខេត្ដព្រះវិហារ លោក អ៊ុំ ម៉ារ៉ា បញ្ឈប់ការដកហូតដីលំនៅដ្ឋានពលរដ្ឋ៨ហិកតា ស្ថិតនៅភូមិហ្មសែត សង្កាត់ប៉ាលហាល និងត្រូវធ្វើប័ណ្ណកម្មសិទ្ធិជូនពលរដ្ឋឲ្យបានស្របច្បាប់។
យ៉ាងណាក៏ដោយ អ្នកសម្របសម្រួលសមាគមការពារសិទ្ធិមនុស្ស អាដហុក ខេត្ដព្រះវិហារ លោក ឡោ ចាន់ មានប្រសាសន៍ថា អភិបាលខេត្ដមានចេតនាមិនដោះស្រាយជូនពលរដ្ឋ ដោយសារតែពាក់ព័ន្ធនឹងផលប្រយោជន៍។ លោក ស្នើឲ្យអាជ្ញាធរចាត់វិធានការតាមចំណារខុទ្ទកាល័យនាយករដ្ឋមន្ដ្រី និងស្ថាប័នពាក់ព័ន្ធផ្សេងទៀតឲ្យមានប្រសិទ្ធភាព៕
សូមសរសេរមកកាន់លោក បូ សាវី តាមរយៈ savy@vodhotnews.com