ដោយ សេក បណ្ឌិត
2014-08-22
RFA
តំណាងអ្នកភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ ដែលមានជម្លោះដីធ្លី ផ្ដល់បទសម្ភាសន៍ដល់វិទ្យុអាស៊ីសេរី កាលពីថ្ងៃទី១៩ ខែសីហា ឆ្នាំ២០១៤។ RFA/Sek Bandith
អ្នកភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ ប្រមាណ ៩២គ្រួសារ ដែលមានជម្លោះដីធ្លី គ្រោងលើកគ្នាជួបអភិបាលខេត្តថ្មី ដើម្បីសុំឲ្យជួយអន្តរាគមន៍រកដំណោះស្រាយផ្តល់យុត្តិធម៌ជូនពួកគាត់។
តំណាងអ្នកភូមិអះអាងថា ការស្វែងរកអន្តរាគមន៍ជាថ្មីទៀតពីចៅហ្វាយខេត្តនេះ បន្ទាប់ពីលោកនាយករដ្ឋមន្ត្រី ហ៊ុន សែន ស្រែកបញ្ជាឲ្យអាជ្ញាធរមូលដ្ឋានដោះស្រាយជម្លោះដីធ្លីឲ្យចប់នៅថ្នាក់មូលដ្ឋាន ដើម្បីកុំឲ្យពលរដ្ឋពិបាកឡើងមកភ្នំពេញ។
ទន្ទឹមនឹងការស្វែងរកកិច្ចអន្តរាគមន៍ពីអាជ្ញាធរនេះ តំណាងប្រជាពលរដ្ឋក៏បានពឹងមេធាវីតាមផ្លូវច្បាប់ ដាក់ពាក្យប្ដឹងទៅតុលាការខេត្ត បដិសេធប័ណ្ណកាន់កាប់ដីធ្លីរបស់ឧកញ៉ា ៣រូប ដែលបានទិញដីមានជម្លោះពីភាគីទំនាស់ជាមួយប្រជាពលរដ្ឋជាច្រើនតំណមកនោះ។
មេធាវីរបស់សមាគមការពារសិទ្ធិមនុស្សអាដហុក (adhoc) ប្រចាំភូមិភាគនិរតី គឺអ្នកស្រី ទ្រី ឈូន ដែលទទួលការពារក្តីជូនប្រជាពលរដ្ឋក្រីក្រនោះមានប្រសាសន៍នៅថ្ងៃទី២១ សីហា ថា តុលាការបានទទួលយកពាក្យបណ្ដឹងរបស់ប្រជាពលរដ្ឋហើយកាលពីសប្ដាហ៍មុននេះ ហើយអ្នកស្រីសង្ឃឹមថា តុលាការនឹងចាត់វិធានការនៅពេលឆាប់ៗខាងមុខនេះ៖ «ហើយប័ណ្ណហ្នឹងទាំងអស់ ២៤ប័ណ្ណ មកដល់ពេលនេះ តុលាការទើបទទួលពាក្យបណ្ដឹងផ្លូវការទេ ដោយសារកន្លងមកហ្នឹងគាត់អត់ទាន់មានមេធាវីគាត់រៀបចំឯកសារដាក់ទៅតុលាការ ហើយវាខុសនឹងទម្រង់មួយចំនួនដែលតុលាការគាត់អត់ទាន់ទទួល ហើយបន្ទាប់ពីមានមេធាវី ខ្ញុំបានជជែកជាមួយពួកគាត់ទៅ សំណុំរឿងត្រូវបានបំបែកជាពីរ ដោយសារតែឧកញ៉ាបីនាក់នោះគាត់មានផលប្រយោជន៍ផ្សេងគ្នា អ៊ីចឹងឥឡូវនេះ បណ្ដឹងផ្លូវការត្រូវបានតុលាការទទួលហើយ នីតិវិធីនឹងដើរនៅពេលឆាប់ៗខាងមុខនេះ»។
ដីទំនាស់នោះមានទំហំជាង ១០០ហិកតារ ស្ថិតនៅប្រមាណ ៧០០ម៉ែត្រពីមាត់សមុទ្រតំបន់អូរត្រេះ ជាប្រភេទដីលំនៅឋាន និងចម្ការ។
ពលរដ្ឋអះអាងថា ដីនោះពួកគាត់បានតាំងទីលំនៅប្រកបរបរអាជីវកម្មតាំងពីអំឡុងឆ្នាំ១៩៩៣ និង៩៤ មក ដោយមានអាជ្ញាធរដឹងឮ និងមានប័ណ្ណកាន់កាប់ដីធ្លីរៀងៗខ្លួន។
នៅក្នុងរបាយការណ៍របស់ប្រជាពលរដ្ឋបញ្ជាក់ដែរថា រហូតមកដល់ឆ្នាំ២០០៦ មានឈ្មោះ ស សឹង្ហ ជាមេបញ្ជាការរងយោធាខេត្តព្រះសីហនុ បានមករំលោភយកដោយប្រើកងកម្លាំងចម្រុះ មានទាំងកម្លាំងអាជ្ញាធរខណ្ឌស្ទឹងហាវ ផង បញ្ជាឲ្យឈូសឆាយផលដំណាំ ផ្ទះសម្បែងប្រជាពលរដ្ឋ។
តំណាងប្រជាពលរដ្ឋ ៩២គ្រួសារ ដែលមានជម្លោះដីធ្លី លោកស្រី មាន នី មានប្រសាសន៍ថា ក្រោយពីបណ្ដេញប្រជាពលរដ្ឋចេញដោយអយុត្តិធម៌នោះ ឈ្មោះ ស សឹង្ហ បានយកដីនោះទៅលក់ឲ្យបុគ្គលអ្នកមានលុយបន្តបន្ទាប់គ្នាជាច្រើនតំណទៀត ដូចជាលក់ទៅឲ្យឈ្មោះ លាង ឃុន និងលាង ម៉េង មួយផ្នែក និងមួយផ្នែកទៀតលក់ទៅស្ត្រីអ្នកមានម្នាក់ឈ្មោះ ហេង សុខា ដែលគេស្គាល់ថា ភរិយារបស់ឧកញ៉ា អ៊ឹង ប៊ុនហូវ។
លោកស្រីបញ្ជាក់ទៀតថា ការបណ្ដេញអ្នកភូមិចេញពីលំនៅឋាន ហើយអ្នកមានអំណាចឃុបឃិតគ្នារំលោភយកដីពលរដ្ឋលក់ចែកយកលុយចែកគ្នាចាយនោះ ដូចជាពុំមានហេតុផលអ្វីផ្សេងនោះទេ៖ «ធម្មតាទេកាលនោះ ដីឡើងថ្លៃ ពួកវាដើរតែយករបស់ប្រជាពលរដ្ឋអ៊ីចឹង ហើយរបស់ខ្ញុំមានបង្កាន់ដៃ មានភូមិសង្កាត់ទទួលស្គាល់ត្រឹមត្រូវ តែគេនៅតែយកអ៊ីចឹង ហើយពួកខ្ញុំរស់នៅដោយសុខសប្បាយណាស់ បង្កបង្កើនផលបានហូបអស់ហើយដូចជា ស្វាយ ខ្នុរ ល្ហុង ចេក ដំឡូង ខ្ញុំមានរបស់ខ្ញុំ ប៉ុន្តែកន្លងមកមាន លោក ស សឹង្ហ ហ្នឹង ហើយ លោក ម៉ី គាំង អភិបាលខណ្ឌ ហើយ ប្រាក់ ស៊ីហារា អភិបាលខេត្តរង គាត់នាំកម្លាំងប៉េអិម ទាហាន ប៉ូលិស មករាប់រយនាក់មកឈូសរបស់ខ្ញុំ ឈូសផ្ទះ ដុតផ្ទះ ឈូសដំណាំខ្ញុំចោល មូលហេតុរបស់ខ្ញុំបានថ្លៃបានគាត់យកលក់បន្តនោះ»។
ស្ត្រីតំណាងអ្នកភូមិរូបនេះបានរំឭកពីព្រឹត្តិការណ៍បណ្ដេញអ្នកភូមិដោយហិង្សាចំនួន ៣លើកផ្ទួនៗគ្នាពីសំណាក់អាជ្ញាធរអតីតខណ្ឌស្ទឹងហាវ ដោយប្រើកម្លាំងប៉ូលិស ទាហាន កងរាជអាវុធហត្ថ វាយបណ្ដេញកាលពីជិត ១០ឆ្នាំមុននោះ ទាំងអួលដើមក សម្រក់ទឹកភ្នែកដោយក្តីឈឺចាប់នឹងអំពើអយុត្តិធម៌នោះ៖ «កាលឈូសលើកទីមួយនោះអស់ ៦២ខ្នង ហើយដុតឈូសផ្ទះអីអ៊ីចឹងទៅ ដល់អ៊ីចឹង ពួកខ្ញុំក៏បបួលគ្នាទៅវិញម្តងទៀត គេឈូសហើយអ៊ីចឹងទៅធ្វើតង់ធ្វើអី ធ្វើកូនខ្ទមអីនៅឡើងវិញ ហើយគេមកឈូសម្តងទៀត គេឈូសម៉ាលើកទៀតហ្នឹង មានអ្នកខ្លះវេទនា ក៏កើតកូនក្រោមដើមចេក ក្រោមអីហ្នឹងទៅ ដូចជាចៅខ្ញុំដែលវារស់នៅហ្នឹង តាំងពីយូរហើយហ្នឹង វាកើតកូនក្រោមដើមឈើហ្នឹង គេគ្មានក្តីអាណិតមេត្តាទេ គេយកតាំងពីអង្ករចានឆ្នាំងយើងទៅដាក់នៅខណ្ឌចោល គេមិនឲ្យយើងស៊ីទេរបស់យើងសោះហ្នឹងណា»។
ក្រុមប្រជាពលរដ្ឋរងគ្រោះដោយគ្មានទីជម្រក គ្មានមុខរបរ បានព្យាយាមដើរតវ៉ារកយុត្តិធម៌ពីអាជ្ញាធរខេត្ត រហូតមកដល់ខុទ្ទកាល័យនាយករដ្ឋមន្ត្រី រដ្ឋសភា ទីស្ដីការគណៈរដ្ឋមន្ត្រី តែទីបំផុតមានតែចំណារត្រឡប់ទៅអាជ្ញាធរខេត្តវិញឲ្យដោះស្រាយ ប៉ុន្តែពុំមានការអនុវត្តតាមចំណារណាមួយឲ្យចេញជាផ្លែផ្កាសម្រាប់ពលរដ្ឋអ្នករងគ្រោះនោះឡើយ។
អភិបាលខេត្តព្រះសីហនុ ដែលទើបឡើងកាន់តំណែងថ្មី គឺលោក ឈិត សុខុន មានប្រសាសន៍នៅថ្ងៃទី២១ សីហា ថា លោកមិនបានដឹងតំបន់ដែលមានដីទំនាស់ដែលពលរដ្ឋលើកឡើងនោះ មានទីតាំងនៅត្រង់ណា មានសាវតារជម្លោះយ៉ាងម៉េចនោះទេ៖ «ដូចជារឿងព្យាបាលជំងឺអ៊ីចឹង គឺទាល់តែដឹងថា ជម្លោះយ៉ាងម៉េចអីយ៉ាងម៉េច ហីរឿងនោះយើងម៉េចដឹង មិនដឹងឆ្លើយយ៉ាងម៉េចទេ ហើយបើគាត់ដាក់ញត្តិមក គឺយើងពិនិត្យតាមហ្នឹងទៅ ហើយបើរឿងខ្លះគេដោះស្រាយរួចទៅហើយ ហើយគាត់ទៅបង្កើតឡើងវិញ អាហ្នឹងក៏យើងមិនដឹងដោះយ៉ាងម៉េចដែរ»។
ទោះយ៉ាងណាក្តី ស្ត្រីតំណាងអ្នកភូមិម្នាក់ទៀតឈ្មោះ តែ រ៉ាវី នៅតែទទូចសុំឲ្យអភិបាលខេត្តថ្មី លោក ឈិត សុខុន ចុះទៅពិនិត្យសិក្សាដោយផ្ទាល់នៅភូមិ៤ ឃុំអូរត្រេះ ស្រុកស្ទឹងហាវ នោះ ដើម្បីជួយអន្តរាគមន៍ដោះស្រាយផ្តល់ឱកាសឲ្យប្រជាពលរដ្ឋដែលកំពុងតែរងទុក្ខដោយគ្មានផ្ទះសម្បែងរស់នៅ អត់មុខរបរក្រោយការបណ្ដេញចេញនោះ បានទៅរស់នៅ និងប្រកបរបរនៅកន្លែងដើមវិញ៖ «ហើយសូមឲ្យគាត់មើលការខុសត្រូវដល់ប្រជាពលរដ្ឋដែលគ្មានផ្ទះសម្បែង។ ឥឡូវកំពុងបោះតង់រស់នៅមាត់សមុទ្រ។ សូមឲ្យគាត់ជួយប្រជាពលរដ្ឋទាំងអស់គ្នា ទាំង ៩២គ្រួសារហ្នឹងឲ្យបានដី និងរស់នៅឡើងវិញផង»។
ស្របពេលគ្នានេះដែរ តំណាងអ្នកភូមិក៏មានគម្រោងនាំគ្នាយកញត្តិ ពាក្យបណ្ដឹង និងឯកសារភស្តុតាងផ្សេងៗទៀត ទៅប្រគល់ជូនអភិបាលខេត្តថ្មីត្រួតពិនិត្យឡើងវិញ ព្រមទាំងសុំឲ្យមានវិធានការដោះស្រាយដោយយុត្តិធម៌ ទៅតាមប្រសាសន៍របស់លោកនាយករដ្ឋមន្ត្រីកាលពីប៉ុន្មានថ្ងៃមុននេះ ដែលជំរុញឲ្យអាជ្ញាធរមូលដ្ឋានដោះស្រាយឲ្យមានប្រសិទ្ធភាពចំពោះទំនាស់ដីធ្លីនៅថ្នាក់មូលដ្ឋានរៀងៗខ្លួននោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- អភិបាលរងក្រុងទទួលញត្តិអ្នកមានជម្លោះដីធ្លីនិងអ្នកបឹងកក់៣នាក់ត្រូវបានដោះលែង
- GW៖ ក្រុមហ៊ុនវៀតណាមរ៉ាប់ប៊ឺគ្រូបនៅកម្ពុជាប្រកាសជំហរកែទម្រង់ពាណិជ្ជកម្ម
- លោក កឹម សុខា ផ្ញើលិខិតទៅលោក ហ៊ុន សែន សុំដោះលែងអ្នកជាប់ឃុំដោយជម្លោះដីធ្លី
- តំណាងរាស្ត្របក្សប្រឆាំងថ្កោលទោសការប្រើហិង្សាលើអ្នកភូមិឡពាង
- លោក ហ៊ុន សែន ព្រមានមន្ត្រីសង្គមស៊ីវិលដែលរិះគន់លោកមិនទទួលខុសត្រូវលើទំនាស់ដីធ្លី
- ពលរដ្ឋ៣នាក់ត្រូវសមត្ថកិច្ចឃាត់ខ្លួនករណីជម្លោះដីជាមួយមន្ត្រីប៉េអិមនៅស្វាយរៀង
- តំណាងរាស្ត្របក្សប្រជាជនជួបអ្នកភូមិឡពាងនៅភ្នំពេញ
- ពលរដ្ឋនៅសង្កាត់ច្បារអំពៅ២តវ៉ាសុំពង្រីកផ្លូវលំ
- តំណាងរាស្ត្របក្សប្រឆាំងសុំចូលជួបអ្នកភូមិឡពាង៥នាក់ដែលជាប់ឃុំ