ដោយ៖ ឡុង គីមម៉ារីតា
ថ្ងៃសុក្រ ទី22 សីហា 2014
http://vodhotnews.com
ស្តាប់សំឡេង៖ |
ចម្លងទុក |
សង្គមស៊ីវិលធ្វើការទាក់ទងនឹងវិស័យអប់រំនៅកម្ពុជា សាទរចំពោះចំណាត់ការរបស់លោកនាយករដ្ឋមន្ត្រី ហ៊ុន សែន ក្នុងការដំឡើងប្រាក់បៀវត្សរ៍ជូនគ្រូបង្រៀន តែថាចំណាត់ការនេះនៅមិនទាន់គ្រប់គ្រាន់ ធ្វើឲ្យជីវភាពគ្រូបង្រៀនល្អប្រសើរនៅឡើយទេ។
កាលពីថ្ងៃព្រហស្បតិ៍ម្សិលមិញនេះ លោកនាយករដ្ឋមន្ត្រី ហ៊ុនសែន បានថ្លែងថា ចាប់ពីខែកញ្ញាទៅ ប្រាក់បៀវត្សរ៍មូលដ្ឋាន ប្រាក់បំណាច់មុខងារ និងប្រាក់
គរុកោសល្យរបស់គ្រូបង្រៀនប្រមាណ១១ម៉ឺននាក់ទូទាំងប្រទេស នឹងត្រូវដំឡើងក្នុងឆ្នាំនេះ និងដំឡើងពីរដងទៀតនៅឆ្នាំក្រោយ។ ក្រៅពីគ្រូបង្រៀន គឺមានបុគ្គលិកពេទ្យជាង៣ម៉ឺននាក់ទៀត ដែលនឹងត្រូវបានដំឡើងផងដែរ។
លោកនាយករដ្ឋមន្ត្រី បានអំពាវនាវដល់មន្ត្រីរាជការទាំងអស់ ដូចជាប៉ូលិស និងទាហានជាដើម ឲ្យមានការអធ្យាស្រ័យ ដែលរដ្ឋាភិបាលមិនទាន់បានដំឡើងប្រាប់បៀវត្យរ៍ជូន ព្រោះរដ្ឋាភិបាលចាត់ទុកវិស័យទាំងពីរនេះជាអាទិភាព «ព្រោះក្រសួងពីរនេះ គឺក្រសួងដែលផ្តល់អាទិភាព សម្រាប់ការបង្កើនបៀវត្យរ៍ ហើយក្នុងឪកាសនេះ ខ្ញុំក៏សុំទោសទុកជាមុន ទៅលើបញ្ហាមន្ត្រីដែលមានបៀវត្យរ៍ខ្ពស់ហើយ នៅក្នុងក្របខណ្ឌគ្រូ ឬពេទ្យកុំអាលឡើងអី ឡើងអ្នកទាបមុន។ ហើយក៏សុំអាធ្យាស្រាយពីសំណាក់មន្ត្រីរាជការនៅក្រសួងនានា និងកងកំលាំងប្រដាប់អាវុធដែល ថាមិចមិនឡើងទូទៅ? យើងកំពុងកសាងងនូវប្រព័ន្ធបៀវត្យរ៍មួយ ឥឡូវនឹងយើងអត់ទាន់មានប្រពន្ធបៀវត្យរ៍មួយពិតប្រាកដនៅឡើយទេ នៅដោយឡែកដោយដុំទេ»។
នាយកប្រតិបត្តិនៃវិទ្យាស្ថានខ្មែរសម្រាប់អភិវឌ្ឈន៍ជាតិ (KIND) លោក សេង ឫទ្ធី មាន ប្រសាសន៍នៅព្រឹកថ្ងៃសុក្រនេះថា លោកសាទរចំពោះចំណាត់ការរបស់លោកនាយករដ្ឋមន្ត្រី ហ៊ុន សែន ក្នុងការដំឡើងប្រាក់បៀវត្សរ៍ជូនគ្រូបង្រៀន តែរដ្ឋាភិបាលគួរតែមានឆន្ទៈ ក្នុងការពង្រឹងគុណភាពអប់រំ។ លោកបន្តថា បើរដ្ឋាភិបាលដំឡើងតែប្រាក់ខែគ្រូបង្រៀន ហើយមិនយកចិត្តទុកដាក់អំពីគុណភាពអប់រំ នោះវិស័យអប់រំគឺនៅតែមិនល្អ «យើងឃើញថា ការដំឡើងប្រាក់ខែ អានឹងជារឿងមួយ ប៉ុន្តែយើងឃើញថាឲ្យមានការគ្រប់គ្រង។ បាទពង្រឹងការគ្រប់គ្រង វាជារឿងសំខាន់ ចាំបាច់មួយទៀតបាទ គឺតំឡើងតែប្រាក់ខែហើយ អត់បានពង្រឹងការគ្រប់គ្រង គុណភាពក៏មិនទាន់ត្រូវបានពង្រឹងដែរ ពីព្រោះកាលណា ការគ្រប់ គ្រងនៅខ្សោយ ការគ្រប់គ្រងនៅតែដដែល។ ទោះបីជាប្រាក់ខែឡើងដល់ប៉ុន្មានលាន ក៏នៅតែប៉ុណ្ណោះ បើសិនជាគ្មានការរឹតបណ្តឹងអំពីការគ្រប់គ្រងឲ្យបានល្អប្រសើរ»។
លោក សេង ឫទ្ធី បន្ថែមថា រដ្ឋាភិបាលគួរតែដំឡើងប្រាក់បៀវត្យរ៍ជូនមន្ត្រីរាជការ ជាពិសេស គ្រូបង្រៀនឲ្យបានដល់១លានរៀល ដើម្បីអាចបំពេញតម្រូវការទៅតាមតម្លៃទីផ្សារនិងមានជីវភាពល្អប្រសើរ។
តំណាងសម្ព័ន្ធគណនេយ្យភាពសង្គមអាស៊ីបូព៌ា និងប៉ាស៊ីហ្វិក លោក សន ជ័យ មានប្រសាសន៍ថា ទន្ទឹមនឹងការដំឡើងប្រាក់បៀវត្យរ៍ជូនគ្រូបង្រៀន រដ្ឋាភិបាលគួរតែលុបបំបាត់ អំពើពុករលួយ ជាពិសេសគួរយកចិត្តទុកដាក់ចំពោះតម្លៃទំនិញនៅលើទីផ្សារ ដែលមានការឡើងថ្លៃហួសកម្រិត។ លោកបន្ថែមថា បើប្រាក់ខែគ្រូបង្រៀនឡើង ទំនិញ ឬតម្លៃសេវាផ្សេងៗ នៅលើទីផ្សារឡើង ពួកគាត់នៅតែមានជីវភាពយ៉ាប់យឺនដដែល «បើរដ្ឋាភិបាលគិតគូរវែងឆ្ងាយ ស៊ីជំរៅនឹង ទាល់តែរកយន្តការមួយ ដើម្បីបន្ថែម ថាឥឡូវប្រាក់ ខែប៉ុណ្ណឹង ថាតើរដ្ឋត្រូវមានតួនាទីអី បង្ការនូវតម្លៃទំនិញ ឬតម្លៃសេវានៅតាមស្ថាប័នរដ្ឋ ហើយនឹងវិស័យឯកជននឹង កុំឲ្យប្រាក់ខែតំឡើតឲ្យមន្ត្រីនឹង វាក្លាយជាប្រាក់ខែជួប អតិផលរណាទៅវិញ»។
បើតាមលោកនាយករដ្ឋមន្ត្រីឲ្យដឹងថា កម្រិតមន្ត្រីអប់រំតាមការិយាល័យដែលទាបបំផុត ទទួលបានជាង៤២ម៉ឺនរៀល នឹងអាចឡើងទៅដល់៥០ម៉ឺនរៀលក្នុងខែកញ្ញា ហើយនឹងអាចឡើង ទៅដល់៥៥ម៉ឺនរៀលនៅដើមឆ្នាំ២០១៥។
ចំពោះគ្រូបង្រៀនបឋមសិក្សាវិញ ពីមុនទទួលបានប្រាក់ខែជាង៤៨ម៉ឺនរៀល អាចនឹងឡើងដល់៥៥ម៉ឺនរៀលចាប់ពីខែកញ្ញាទៅ ហើយអាចទទួលបានបន្ថែមទៀតដល់៦៤ម៉ឺនរៀល នៅដើមឆ្នាំ២០១៥។ ឯគ្រូបង្រៀនកម្រិតមធ្យមសិក្សាបឋមភូមិ នឹងអាចទទួលបានដល់ទៅ៦៦ម៉ឺនរៀល និងគ្រូបង្រៀនកម្រិតមធ្យមសិក្សាទុតិយភូមិអាចឡើងដល់៧៨ ម៉ឺនរៀល ហើយថ្នាក់ឧត្តមសិក្សាវិញ ទទួលបានដល់ទៅ៨៨ម៉ឺនរៀលត្រឹមខែមេសា ឆ្នាំ២០១៥នេះ៕
សូមសរសេរមកកាន់កញ្ញា ឡុង គីមម៉ារីតា តាមរយៈ longkimmarita@gmail.com