ដោយ៖​ ឡាយ សា​មាន​​
ថ្ងៃសុក្រ ទី22 សីហា 2014
http://vodhotnews.com

មជ្ឈមណ្ឌល​សិទ្ធិមនុស្ស​កម្ពុជា​(CCHR) សម្តែង​ការគាំទ្រ​ចំពោះ​ការប្តេជ្ញា​របស់​នាយករដ្ឋមន្ត្រី​ហ៊ុន សែន ក្នុង​ការស្វែងរក​ដំណោះស្រាយ​ក្នុង​ទំនាស់​ដីធ្លី​នៅ​កម្ពុជា​។​

ការគាំទ្រ​នេះ បន្ទាប់​ពី​លោកនាយក​រដ្ឋមន្ត្រី ហ៊ុន សែន បាន​ថ្លែងប្តេជ្ញា​ក្នុង​ការស្វែងរក​ដំណោះស្រាយ​ទំនាស់​ដីធ្លីនៅ​កម្ពុជា ​ដែល​ធ្វើឡើង​កាលពី​ថ្ងៃ​ទី១៨ សីហា ក្នុង​សិក្ខាសាលា​ផ្សព្វផ្សាយ​យុទ្ធសាស្ត្រ​ជាតិ​ស្តីពី​សន្តិសុខ​ស្បៀង និង​អាហារូបត្ថម្ភ ឆ្នាំ២០១៤​ ដល់ឆ្នាំ២០១៨​។​

​លិខិត​ចំហ​របស់​មជ្ឈមណ្ឌល​សិទ្ធិមនុស្ស​កម្ពុជា នៅ​ថ្ងៃ​ទី២១ ខែសីហា បាន​លើកឡើង​ថា ទំនាស់​ដីធ្លី​បាន​ញាំញី​កម្ពុជា​អស់​រយៈពេល​ច្រើន​ឆ្នាំ​មកហើយ ដែល​ធ្វើឲ្យ​ប៉ះពាល់​ជា​ខ្លាំង​ដល់​ប្រជាពលរដ្ឋ​ដែល​រងគ្រោះ​។ លិខិតបញ្ជាក់ថា មានតែ​ដំណោះស្រាយ​ជាក់លាក់​តែ​ម្យ៉ាង​ប៉ុណ្ណោះ ដែល​អាច​ដោះស្រាយ​នូវ​បុព្វហេតុ​ចម្បង​នៃ​ទំនាស់​ដីធ្លី​បាន​ ដែល​បញ្ហា​ទាំងនេះ ត្រូវតែ​ធ្វើ​ការដោះស្រាយ​ឲ្យបាន​ឆាប់រហ័ស​តាម​ដែលអា​ច​ធ្វើបាន​។​

ពាក់ព័ន្ធ​នឹង​រឿង​នេះ​ដែរ ប្រធាន​គណបក្ស​សង្គ្រោះ​ជាតិ​លោក សម រង្ស៊ី និង​អនុប្រធាន​លោក កឹម សុខា បាន​សរសេរ​លិខិត​ដាច់ដោយឡែក​ពីគ្នា ដោយ​បាន​សម្តែង​ការគាំទ្រ​ចំពោះ​ប្រសាសន៍​នាយករដ្ឋមន្ត្រី ក្នុង​ការប្តេជ្ញា​ដោះស្រាយ​វិវាទ​ដីធ្លី​នេះ​។ ​ប៉ុន្តែ​លោក កឹម សុខា បាន​ស្នើ​ឲ្យ​ដោះលែង​ពលរដ្ឋ​ដែល​ជាប់​ពន្ធនាគារ​ដោយ​ជម្លោះ​ដីធ្លី​នេះ​។​

​មជ្ឈមណ្ឌល​សិទ្ធិមនុស្ស​កម្ពុជា​(CCHR) ក៏​បាន​ស្វាគមន៍​ចំពោះ​ប្រសាសន៍​នាយករដ្ឋមន្ត្រី ដែល​លើកឡើង​ថា ដី​ដែល​បាន​ផ្តល់​ជា​សម្បទាន​ហើយ​ពុំ​មាន​ការ​អភិវឌ្ឍន៍​នោះ នឹង​ត្រូវ​ប្រគល់​ជូន​ត្រឡប់​ទៅ​ប្រជាពលរដ្ឋ​វិញ ​តាមរយៈ​សម្បទាន​សង្គម​កិច្ច ជា​ពិសេស​ត្រូវ​ផ្អាក​ជា​បណ្តោះអាសន្ន​ចំពោះ​ការបណ្តេញ​​ប្រជាពលរដ្ឋ​ចេញពី​ដីធ្លី​។​

តាមរយៈ​លិខិត​នេះ CCHR ក៏​បាន​ដាស់តឿន​ថា ដើម្បី​លើ​កម្ពស់​តម្លាភាព រដ្ឋាភិបាល និង​ក្រសួង​ពាក់ព័ន្ធ​គួរ​ផ្តល់​ព័ត៌មាន​ជា​សាធារណៈ​ទាំងអស់ ​ស្តីពី​សម្បទាន​ដី ការធ្វើ​ចំណាត់ថ្នាក់​ទៅលើ​ដីធ្លី និង​តំបន់​អភិរក្ស ព្រមទាំង​ព័ត៌មាន​នានា​ឲ្យបាន​ទូលំទូលាយ​៕

សូមសរសេរមកលោក​ ឡាយ សាមាន តាមរយៈ samean@vodhotnews.com