ដោយ៖​ ជន​ ស្រីណុច​
ថ្ងៃសៅរ៍ ទី23 សីហា 2014
http://vodhotnews.com

​គ្រូបង្រៀន ២០ នាក់​នៅ​សាលាបឋមសិក្សា ចាំ​យាម ស្រុក​មណ្ឌលសីមា ខេត្ត កោះកុង ឲ្យដឹងថា នាយក​សាលា​របស់​ខ្លួន បាន​កាត់​ប្រាក់​ពី​គ្រូបង្រៀន​ម្នាក់ ៥000 រៀល ពី​ប្រាក់​តំបន់ និង ប្រាក់​ប្រជុំ​ថ្ងៃ​ព្រហស្បតិ៍​។​

​គ្រូបង្រៀន​ម្នាក់​ដែល​សុំ​មិន​បញ្ចេញ​ឈ្មោះ ឲ្យ​VOD ដឹង​នៅ​រសៀល​ថ្ងៃ​សៅរ៍​ទី​២៣​នេះ​ថា នាយក​សាលា​របស់​គាត់ បាន​កាត់​ប្រាក់​លោកគ្រូ​អ្នកគ្រូ​ម្នាក់​៥០០០​រៀល ដើម្បី​ចំណាយ​ថ្លៃ​ធ្វើដំណើរ​ទៅ​បើក​ប្រាក់​ទាំងនោះ​នៅ​ខេត្ត​កោះកុង​។ អ្នកគ្រូ​បន្តថា ប្រសិន​បើ​នាយក​សាលា​កាត់​យក​ប្រាក់​ពី​ពួក​គាត់​បែប​នេះ គឺ​អស់​ហើយ ព្រោះ​ប្រាក់ខែ​គ្រូបង្រៀន​ទទួលបាន​តិចតួច​បំផុត ខណៈ​ទំនិញ​គ្រប់​យ៉ាង​មាន​តម្លៃ​ថ្លៃ មិនតែប៉ុណ្ណោះ ការ​កាត់​នោះ មិន​បាន​កើតឡើង​ដោយ​ការស្ម័គ្រចិត្ត​របស់​លោក​គ្រូ​អ្នកគ្រូ​ឡើយ។​

​អ្នកគ្រូ​រូបនេះ​បន្តថា លោកគ្រូ​អ្នកគ្រូ​មិន​ពេញចិត្ត​នឹង​ការ​កាត់​ប្រាក់​នេះ​ទេ ហើយ​បាន​នាំគ្នា​ធ្វើការ​តវ៉ា ប៉ុន្តែ​បន្ទាប់ពី​មាន​ការប្រជុំ​បន្ទាន់​នៅ​ព្រឹក​ថ្ងៃ​សៅរ៍​នេះ គ្រូៗ​ភាគច្រើន​បាន​យល់ព្រម​ឲ្យ​នាយក​សាលា​កាត់​ប្រាក់​នោះ ដោយសារ​មាន​ការភ័យខ្លាច​ការគាបសង្កត់។​

VOD មិនអាចទាក់ទងនាយកសាលាបឋមសិក្សា ចាំយាមដើម្បីសុំការបំភ្លឺជុំវិញការចោទប្រកាន់នេះបាននៅឡើយទេ នៅរសៀលថ្ងៃសៅរ៍នេះ។

​ប្រធាន​សមាគម​គ្រូបង្រៀន​កម្ពុជា​ឯករាជ្យ លោក រ៉ុង ឈុន មានប្រសាសន៍ថា ការ​ដែល​នាយក​សាលា​ហ៊ាន​កាត់លុយ​គ្រូ​ដោយ​មិន​បាន​សួរ​យោបល់​មុន​បែបនេះ គឺំ​មិន​ត្រឹមត្រូវ​ទេ ព្រោះ​រាល់​ថវិកា ចំណូល​ចំណាយ ត្រូវ​មាន​ការពិគ្រោះ​យោបល់គ្នា​។ លោក​ថា ការ​កាត់​យក​លុយ​ពី​គ្រូ ដោយសារ​ពួក​គាត់​ភ័យខ្លាច ក៏​មិន​ត្រឹមត្រូវ​ដែរ៕

សូមសរសេរមកកញ្ញា ជន ស្រីណុច តាមរយៈ chornsreynoch@vodhotnews.com