ដោយ៖ ជន ស្រីណុច
ថ្ងៃសៅរ៍ ទី23 សីហា 2014
http://vodhotnews.com
មើលរូបភាពបន្ថែម
តំណាងប្រជាពលរដ្ឋលើកបដា ដើម្បីសុំអន្តរាគមន៍ពីលោកនាយករដ្ឋមន្ត្រីហ៊ុន សែន (រូបថត៖ ជន ស្រីណុច)
ប្រជាពលរដ្ឋមានជម្លោះដីធ្លីចំនួន២ឃុំ មកពីស្រុកពញាឮ ខេត្តកណ្តាល ឡើងមកសុំអន្តរាគមន៍ ដល់មុខផ្ទះលោកនាយករដ្ឋមន្ត្រីហ៊ុន សែន ករណីជម្លោះដីធ្លីអូសបន្លាយជិត១០ឆ្នាំ ជាមួយក្រុមហ៊ុនមួយ។
ប្រជាពលរដ្ឋប្រមាណ៧០នាក់ តំណាងឲ្យប្រជាពលរដ្ឋ១៣៤គ្រួសារ មកពីប្រាំភូមិ ក្នុងឃុំចំនួនពីរ នៃស្រុកពញាឮ ខេត្តកណ្ដាល នៅព្រឹកថ្ងៃសៅរ៍នេះ បានឡើងដល់គេហដ្ឋានលោកហ៊ុន សែន ដើម្បីរកអន្តរាគមន៍ ករណីក្រុមហ៊ុនឡាយហៀង ប្តឹងពួកគាត់ឡើងតុលាការ ដោយចោទថាលួចលក់ដីក្រុមហ៊ុន ខណៈពួកគាត់ជាម្ចាស់ដីពិតប្រាកដ។ ប៉ុន្តែកម្លាំងសមត្ថកិច្ច បានបង្វែរប្រជាពលរដ្ឋទាំងនោះឲ្យទៅជួបជុំគ្នានៅក្រោមដើមពោធិ៍ មុខវត្តបទុមវត្តីវិញ។
ពលរដ្ឋម្នាក់ដែលអះអាងថាជាតំណាងប្រជាពលរដ្ឋ១៣៤គ្រួសារ លោក គុយ ចាន់ថន ឲ្យអ្នកសារព័ត៌មានដឹងនៅក្រោមដើមពោធិ៍មុខវត្តបទុមវត្តីថា ស្ត្រីឈ្មោះ លឹម គា តំណាងក្រុមហ៊ុនរបស់លោកស្រីឡាយហៀង បានប្ដឹងតំណាងប្រជាពលរដ្ឋ៤នាក់ ទៅតុលាការខេត្តកណ្តាលពីបទលួចលក់ដីក្រុមហ៊ុន។ លោកបន្តថា ប្រជាពលរដ្ឋបានកាន់កាប់ដីនោះតាំងពីឆ្នាំ១៩៧៩មក ហើយនៅឆ្នាំ២០០៨ លោកហ៊ុន សែនបានចេញសេចក្តីសម្រេច ធ្វើសម្បទានឲ្យប្រជាពលរដ្ឋ ប៉ុន្តែនៅឆ្នាំនោះដែរក្រុមហ៊ុនរបស់អ្នកស្រីឡាយ ហៀង បានចេញមុខអះអាងថា ដីនោះជារបស់ខ្លួន ហើយបានប្ដឹងចោទប្រជាពលរដ្ឋពីបទលួចលក់ដីក្រុមហ៊ុន។
ស្ត្រីវ័យចំណាស់អាយុ៨១ឆ្នាំ ឈ្មោះ ស៊ុំ តែម ដែលគ្រោងនឹងឡើងតុលាការនៅថ្ងៃទី២៥ សីហា ខាងមុខនេះ លោកយាយរៀបរាប់ថា ដីនោះគឺជាដីរបស់ប្រជាពលរដ្ឋកាន់កាប់តាំងពីឆ្នាំ១៩៧៩ ហើយថាគាត់មានវ័យចំណាស់ហើយ មិនបានទៅលួចដីរបស់ក្រុមហ៊ុនទេ។ លោកយាយអំពាវនាវឲ្យលោកនាយករដ្ឋមន្ត្រីជួយអន្តរាគមន៍ដល់ប្រជាពលរដ្ឋ ខណៈពួកគាត់មានជីវភាពក្រីក្រហើយ ត្រូវបានអ្នកមានលុយរំលោភបំពាន។
លោក គុយ ចាន់ថន និងលោកយាយស៊ុំ តែម ផ្តល់បទសំភាសន៍ដល់អ្នកសារព័ត៌មាន(រូបថត៖ ជន ស្រីណុច)
តំណាងប្រជាពលរដ្ឋជួបជុំគ្នានៅក្រោមដើមពោធិ៍ មុខវត្តបទុមវត្តី (រូបថត៖ ជន ស្រីណុច)
ភ្លាមៗពេលប្រជាពលរដ្ឋប្រមូលផ្តុំគ្នាដាក់ញត្តិនៅថ្ងៃនេះ ប្រធានគណៈកម្មាធិការដោះស្រាយទំនាស់ដីធ្លីរបស់ទីស្តីការគណៈរដ្ឋមន្ត្រីលោក ប៉ាល់ ច័ន្ទតារា មានប្រសាសន៍ថា លោកនឹងដោះស្រាយបញ្ហានេះតាមប្រសាសន៍របស់លោកនាយករដ្ឋមន្ត្រីដែលធ្លាប់អះអាងថា មិនឲ្យប្រជាពលរដ្ឋរងគ្រោះដោយសារការរំលោភដីធ្លីទេ ហើយថាលោកនឹងទៅពិគ្រោះជាមួយអភិបាលខេត្តកណ្តាលផ្ទាល់។
ពលរដ្ឋឲ្យដឹងថា ដីមានទំនាស់នោះស្ថិតនៅឃុំឈ្វាំង និងឃុំជ្រៃលាស់ មានចំនួន៥ភូមិបានប៉ះពាល់ដល់ប្រជាពលរដ្ឋ១៣៤គ្រួសារ ស្មើនឹង១៥៥ហិកតា រួមមានដីភូមិ និងដីអាស្រ័យផល៕
សូមសរសេរមកកញ្ញា ជន ស្រីណុច តាមរយៈ chornsreynoch@vodhotnews.com