ដោយ៖ ប្រែង សត្យាភិរក្ស
ថ្ងៃព្រហស្បតិ៍ ទី28 សីហា 2014
http://vodhotnews.com
មើលរូបភាពបន្ថែម
បុគ្គលិកក្រុមហ៊ុនរថយន្តក្រុងភ្នំពេញសូរិយា លើកបដា នឹងចាក់សំឡេងតាមប្រព័ន្ធឧគ្ឃោសនាសព្ឌ ដើម្បីប្រឆាំង នឹងអតីតអ្នកបើកបររថយន្តក្រុង (រូបថត៖ ប្រែង សត្យាភិរក្ស)
អតីតបុគ្គលិកក្រុមហ៊ុនរថយន្តដឹកជញ្ជូនអ្នកដំណើរភ្នំពេញសូរិយា នៅព្រឹកថ្ងៃព្រហស្បតិ៍នេះ បន្ដធ្វើបាតុកម្មចូលដល់ថ្ងៃទីបួន ដើម្បីទាមទារឲ្យភាគីក្រុមហ៊ុនទទួលពួកគេចូលធ្វើការវិញតាមការបញ្ជារបស់ក្រុមប្រឹក្សាអាជ្ញាកណ្ដាល។
ក្នុងការតវ៉ានាព្រឹកថ្ងៃព្រហស្បតិ៍ទី២៨ សីហា នេះ ក្រៅពីអតីតបុគ្គលិកក្រុមហ៊ុនចំនួន១៧នាក់ ដែលក្រុមហ៊ុនបញ្ឈប់ ដោយសារពួកគេបានបង្កើតសហជីពនៅក្នុងក្រុមហ៊ុននោះ ក៏មានតំណាងសហជីពមួយចំនួនចូលរួមផងដែរ។ ចំណែកភាគីក្រុមហ៊ុនវិញ ក្រៅពីមិនបានចេញមកជួបចរចាជាមួយអ្នកតវ៉ា ដើម្បីរកដំណោះស្រាយ គេបានប្រើឧគ្ឃោសនាសព្ទ ចាក់ចម្រៀងឮខ្លាំងៗ លុបលើសំឡេងអ្នកតវ៉ា និងចែកខិតប័ណ្ណដល់អ្នកដំណើរ ដោយចោទថាការតវ៉ានោះគឺខុសច្បាប់។
អតីតអ្នកបើកបរម្នាក់ដែលកំពុងធ្វើការតវ៉ា លោក សម្បតិ្ត វន ប្រាប់VODថា ពួកគាត់ទាំង១៧នាក់បន្តតវ៉ា ដោយសារក្រុមហ៊ុនមិនទាន់មានដំណោះស្រាយជូនពួកគាត់នៅឡើយ។ លោកចាត់ទុក ទង្វើរបស់ភាគីក្រុមហ៊ុនដែលបានឲ្យបុគ្គលិកដើរចែកខិតប័ណ្ណ ចោទពួកគាត់ថាធ្វើការតវ៉ាខុសច្បាប់នោះ គឺជាចេតនាមួលបង្កាច់ពួកគាត់ ដោយសារក្រុមហ៊ុនមិនចង់ដោះស្រាយជូនពួគគាត់។
អ្នកតវ៉ាម្នាក់ផ្សេងទៀត លោក ព្រំ វិសាល មានប្រសាសន៍ថា ទង្វើរបស់ក្រុមហ៊ុននៅពេលនេះ គឺជាការរំលោភសិទ្ធិអ្នកតវ៉ា ក្នុងការតវ៉ាដោយសន្តិវិធី និងជាការបំភ័ន្តមតិសាធារណៈ ដើម្បីគេចពីការទទួលខុសត្រូវរបស់ក្រុមហ៊ុន។ លោកសំណូមពរ ដល់អាជ្ញាធរពាក់ព័ន្ធទាំងអស់ បង្គាប់ឲ្យក្រុមហ៊ុនចូលខ្លួនមករកដំណោះស្រាយជូនពួកគាត់ដោយសន្តិវិធី ឲ្យបានកាន់តែឆាប់កាន់តែល្អ។
មន្ត្រីចងក្រង និងដោះស្រាយវិវាទការងារនៅសហភាពការងារកម្ពុជា លោក អ៊ីន គឹមហ៊ន មានប្រសាសន៍ថា ការដឹកនាំកម្លាំងមកចូលរួមជួយតវ៉ាអតីតអ្នកបើកបរក្រុមហ៊ុនភ្នំពេញសូរិយា នាពេលនេះ គឺដើម្បីទាមទាររកយុត្តធម៌ជូនពួកគេ ទៅតាមសេចក្ដីសម្រេចរបស់ក្រុមប្រឹក្សាអាជ្ញាកណ្ដាល ដោយបង្គាប់ឲ្យក្រុមហ៊ុនទទួលយកពួកគេចូលធ្វើការវិញ ខណៈលោកចាត់ទុកថា ក្រុមហ៊ុនមិនមានចេតនាពិតប្រាកដក្នុងការដោះស្រាយជូនអ្នកតវ៉ា។
VOD មិនអាចសុំការបំភ្លឺពីភាគីក្រុមហ៊ុនភ្នំពេញសូរិយាដឹកអ្នកដំណើរបានទេ ដោយខាងក្រុមហ៊ុនបដិសេធមិនធ្វើការអត្ថាធិប្បាយ ចំពោះសកម្មភាពនាថ្ងៃនេះ។
ករណីបញ្ឈប់បុគ្គលិកជាអ្នកបើកបររថយន្ត១៧នាក់នេះ ត្រូវបានប្ដឹងផ្ដល់ដល់ក្រសួងការងារ និងក្រុមប្រឹក្សាអាជ្ញាកណ្ដាល រហូតដល់ស្ថាប័នទាំងពីរបានសម្រេចឲ្យក្រុមហ៊ុនភ្នំពេញសូរិយា ទទួលយកអ្នកទាំងនោះចូលធ្វើការវិញ។ ប៉ុន្តែរហូតមកដល់ពេលនេះ ក្រុមហ៊ុនបដិសេធទទួលយកពួកគេ ដោយសំអាងថា ក្រុមហ៊ុន មិនមានរថយន្តគ្រប់គ្រាន់ឲ្យពួកគេបើកបរ៕
អ្នកកាន់បដាក្នុងរង្វង់ក្រហម ជាអតីតអ្នកបើកបរឡានក្រុងភ្នំពេញសូរិយា
សូមសរសេរមកលោក ប្រែង សត្យាភិរក្ស តាមរយៈ phireak1988.kth@gmail.com