Sat, 30 August 2014
សូ វិសាល
ភ្នំពេញប៉ុស្តិ៍
អ្នកភូមិឡពាងចំនួន ៥ នាក់ ដែលត្រូវសមត្ថកិច្ចខេត្តកំពង់ឆ្នាំង ចាប់ឃុំខ្លួន ក្នុងរឿងជម្លោះដីធ្លីដ៏រ៉ាំរ៉ៃ ជាមួយក្រុមហ៊ុន ខេឌីស៊ី របស់លោកស្រី ជា ខេង ភរិយាលោក ស៊ុយ សែម រដ្ឋមន្ត្រីក្រសួងរ៉ែ នឹងថាមពលនោះ ត្រូវបានតុលាការខេត្តកំពង់ឆ្នាំងដោះលែងវិញហើយ កាលពីម្សិលមិញ។
ការដោះលែងនេះ ធ្វើឡើង បន្ទាប់ពីមានលិខិតអន្តរាគមន៍ របស់លោកអង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ ចុះថ្ងៃទី២៧ ខែសីហា ទៅតាមសំណើសុំធានាឲ្យនៅក្រៅឃុំ របស់លោកស្រី កែវ ច័ន្ទមុនី តំណាងរាស្ត្រគណបក្សប្រជាជន មណ្ឌលកំពង់ឆ្នាំង។
ប្រធានតុលាការខេត្តកំពង់ឆ្នាំង មិនអាចទាក់ទងសុំការអធិប្បាយបានទេ កាលពីម្សិលមិញ ចំណែកលោក ប្រាក់ វុទ្ធី ស្នងការរងនគរបាលខេត្តកំពង់ឆ្នាំង បានបដិសេធមិនធ្វើអធិប្បាយ លើបញ្ហារបស់អ្នកភូមិឡពាងនោះទេ ប៉ុន្តែបានបញ្ជាក់យ៉ាងខ្លីថា អ្នកភូមិឡពាង ៥ នាក់ ត្រូវបានតុលាការដោះលែងឲ្យនៅក្រៅឃុំបណ្តោះអាសន្ន កាលពីម៉ោង៤រសៀលថ្ងៃម្សិលមិញ។
ប្រជាពលរដ្ឋទាំង ៥ នាក់ ដែលត្រូវបានដោះលែងនោះ រួមមាន លោក សៀង ហេង លោក គុជ ហុក លោក ម៉ាង យ៉ាវ លោក ស្រ៊ុន ថា និងលោក ស្ងួន ញឿន។ អ្នកទាំងនេះ ត្រូវបាន សាលាដំបូងខេត្តកំពង់ឆ្នាំង សម្រេចឃុំខ្លួន កាលពីថ្ងៃទី១៧ ខែកក្កដា ឆ្នាំ ២០១៤ និងថ្ងៃទី១២ ខែសីហា ឆ្នាំ២០១៤ ក្រោមការចោទប្រកាន់ពីបទប្រើអំពើហិង្សា និងបំផ្លាញទ្រព្យសម្បត្តិឯកជន។
បើតាមអង្គការលីកាដូ ពួកគេត្រូវបានដោះលែងបណ្តោះអាសន្ន ដោយមានលក្ខខណ្ឌ គឺទីមួយ ត្រូវចូលខ្លួនមកតុលាការ ពេលមានដីកាកោះហៅ ទីពីរ មិនត្រូវផ្លាស់ប្តូរទីកន្លែងស្នាក់នៅ និងទី ៣ ត្រូវបង្ហាញខ្លួននៅនគរបាលប៉ុស្តិ៍ជារៀងរាល់ខែ។
អ្នកស្រី អ៊ុំ សូភី តំណាងអ្នកភូមិឡពាង បានឲ្យដឹងថា ប្តីរបស់អ្នកស្រី លោក ស្ងួន ញឿន និងអ្នកភូមិ ៤ នាក់ផ្សេងទៀត ត្រូវបានតុលាការដោះលែង ហើយលោកស្រី មិនបានទៅទទួលគាត់ទេដោយសារកំពុងជាប់តវ៉ានៅភ្នំពេញ។
លោកស្រី សូភី ដែលមានកូនតូចៗក្នុងបន្ទុក ៤នាក់ កូនបងអាយុ ៧ ឆ្នាំ និងកូនប្អូន អាយុ ៤ ខែ ហើយកំពុងតែនៅជាមួយលោកស្រី ដើម្បីធ្វើការតវ៉ានោះ បានថ្លែងថា៖ «វាមិនទាន់ចប់ទេ ការដោះលែងនេះ គឺគ្រាន់តែបណ្តោះអាសន្នប៉ុណ្ណោះ មិនមែនដោះលែងជាស្ថាពរឡើយ។ យើងនៅតែបន្តធ្វើការតវ៉ា មិនត្រឡប់ទៅផ្ទះវិញទេ គឺទាមទារ សូមឲ្យរដ្ឋាភិបាល ដោះស្រាយបញ្ចប់ជម្លោះដីធ្លីរបស់យើងឲ្យបានឆាប់ និងត្រូវបញ្ឈប់នូវរាល់ការចោទប្រកាន់នានា និងបញ្ឈប់ការតាមចាប់ខ្លួនអ្នកភូមិយើងទៀត»។
អ្នកស្រីបានឲ្យដឹងថា ប្តីរបស់អ្នកស្រី និងអ្នកភូមិ ៤ នាក់ ដែលត្រូវបានដោះលែងនឹងឡើងមកភ្នំពេញដើម្បីចូលរួមតវ៉ារហូតទាល់តែមានដំណោះស្រាយ។
លោកស្រី សូភី បានថ្លែងអំណរគុណដល់លោកស្រី កែវ ច័ន្ទមុនី និងលោកអង្គ វង្សវឌ្ឍានា ក៏ដូចជាក្រុមតំណាងរាស្ត្រគណបក្សសង្គ្រោះជាតិដែលបានខឹតខំប្រឹងប្រែងយ៉ាងខ្លាំងរហូតដល់មានការដោះលែងប្តីរបស់អ្នកស្រីនិងអ្នកភូមិ ៤ នាក់ផ្សេងទៀតនេះ៕រាយការណ៍បន្ថែម ប៊ុត រស្មីគង្គា