ដោយ៖ ឡាយ សាមាន
ថ្ងៃព្រហស្បតិ៍ ទី9 តុលា 2014
http://vodhotnews.com
រដ្ឋមន្ត្រីក្រសួងវប្បធម៌ និងវិចិត្រសិល្បៈ ស្នើរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ករណីសុំផ្លាស់ប្តូរវត្ថុបុរាណខ្មែរដើម្បីដាក់តាំងនៅសារមន្ទីរជាតិភ្នំពេញ និងសារមន្ទីរសិល្បៈអាស៊ីហ្គីមេនៃប្រទេសបារាំងមានរយៈពេលវែង។
លិខិតចំហចុះហត្ថលេខាដោយលោកស្រី ភឿង សក្ខណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ផ្ញើជូនរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ឲ្យដឹងថា សារមន្ទីសិល្បៈអាស៊ីហ្គីមេនៃប្រទេសបារាំងមានគម្រោងស្នើសុំខ្ចីផ្លាស់ប្តូរវត្ថុបុរាណដើម្បីដាក់តាំងរយៈពេលវែង ដោយសារមន្ទីសិល្បៈអាស៊ីហ្គីមេអនុញ្ញាឲ្យសារមន្ទីរជាតិភ្នំពេញខ្ចីព្រះកេសរបស់ព្រះហរិហរមកតភា្ជប់នឹងដងខ្លួនព្រះបដិមាព្រះហរិហរ។ លិខិតបន្តថា ចំណែកសារមន្ទីរសិល្បៈអាស៊ីហ្គីមេ ស្នើសុំខ្ចីជើងទម្រពីសារមន្ទីរព្រះនរោត្តមសីហនុអង្គរ ទៅភ្ជាប់ជាមួយដងខ្លួនព្រះនាងឧមានៅប៉ារីសជំនួសវិញ។
លិខិតដដែលបន្តថា ដោយផ្អែកលើលទ្ធផលនៃកិច្ចប្រជុំកាលពីថ្ងៃទី២៦ ខែមិថុនា ឆ្នាំ២០១៤ គណៈកម្មាធិការអន្តរក្រសួងដើម្បីសម្របសម្រួល វាយតម្លៃ និងត្រួតពិនិត្យវត្ថុបុរាណខ្មែរ បានយល់ព្រមជាគោលការណ៍ឲ្យមានការផ្លាស់ប្តូរវត្ថុបុរាណរវាងសារមន្ទីរជាតិភ្នំពេញ និងសារមន្ទីរសិល្បៈអាស៊ីហ្គីមេ ក្នុងការខ្ចីវត្ថុបុរាណដាក់តាំងរយៈពេលវែង។
លិខិតបញ្ជាក់ថា ថ្វីត្បិតមានការផ្លាស់ប្តូរវត្ថុបុរាណ តែកម្ពុជានឹងទទួលបានរូបមួយពេញលេញ ប្រៀបប្រដូចបានទៅនឹងការផ្តល់ជីវិតថ្មីដល់រូបព្រះហរិហរដែលព្រះកេស និងដងខ្លួនបានបែកគ្នាអស់រយៈកាលជាងមួយសតវត្សមកហើយ៕
សូមសរសេរមកលោក ឡាយ សាមាន តាមរយៈ samean@vodhotnews.com