Tue, 21 October 2014
សេត គឹមសឿន
ភ្នំពេញប៉ុស្តិ៍
ភ្នំពេញៈ បន្ទាប់ពីភ្ជាប់ពាក្យអស់រយៈពេលជិតមួយឆ្នាំ នៅពេលនេះ តារាចម្រៀងខ្លួនតូចចិត្តធំនាង យ៉ុង ចាន់កណ្ណិកា បានសម្រេចចិត្តពីជីវិតអាពាហ៍ពិពាហ៍ ដោយនាង និងគូដណ្តឹងនឹងដឹកដៃគ្នាចូលរោងការជាផ្លូវការនៅថ្ងៃទី៣១ ខែតុលា ឆ្នាំ២០១៤ ខាងមុខនេះ។
ផ្ទុយពីការអះអាងរបស់នាងកន្លងមក ដែលតែងនិយាយថា គម្រោងរៀបមង្គលការរបស់នាងនៅមិនទាន់ច្បាស់នៅឡើយ បើឆាប់បំផុតក៏ឆ្នាំ២០១៥នោះ ស្រាប់តែនៅពេលនេះ តារាចម្រៀងសំនៀងស្រួយស្រែសដូចសារិកានាង យ៉ុង ចាន់កណ្ណិកា កំពុងតែរវល់រត់ខ្វែងដៃជើងចែកសំបុត្រអាពាហ៍ពិពាហ៍ និងខាត់ស្បែកបន្ទុំសម្រស់សម្រាប់ថ្ងៃអាពាហ៍ពិពាហ៍ខិតជិតមកដល់។
គួរបញ្ជាក់ថា តារាចម្រៀងក្នុងត្រកូល យ៉ុង នាង យ៉ុង ចាន់កណ្ណិកា បានសម្រេចចិត្តភ្ជាប់ពាក្យជាផ្លូវការយ៉ាងរីករាយជាមួយនឹងបុរសក្រៅសង្គមសិល្បៈលោក ចាន់ ចំណាន កាលពីដើមខែវិច្ឆិកា ឆ្នាំ២០១៣ តែប៉ុន្មានខែក្រោយពេលដែលតារារូបនេះបានបរាជ័យស្នេហាជាមួយនឹងបុរសអាណិកជនបារាំងវ័យក្មេងនោះ។
ក្រោយភ្ជាប់ពាក្យតារារូបនេះបានប្រាប់ថា នាង និងគូដណ្តឹងនៅមិនទាន់ច្បាស់ពីគម្រោងរៀបមង្គលការនៅឡើយទេ។ ការពោលឡើងបែបនេះ ទំនងដោយសារតែ កណ្ណិកា នាងខ្លាចរអាស្នេហាមួយនេះ ប្រេះឆាជាថ្មីម្តងទៀត ដូច្នេះនាងត្រូវការពេលវេលាដើម្បីសិក្សាពីចិត្តថ្លើមគ្នាឲ្យបានយូរបន្តិចសិន។ ក្រោយមានទំនុកចិត្តស្រាប់តែពេលនេះ យ៉ុង ចាន់កណ្ណិកា បានដើរចែកសំបុត្ររៀបមង្គលការព្រោងព្រាតតែម្តង។
អ្នកសិល្បៈមួយចំនួនដែលជាមិត្តភក្តិបានបញ្ជាក់ឲ្យដឹងថា នៅពេលនេះ ពួកគេបានទទួលសំបុត្រមង្គលការរបស់តារាចម្រៀងនាង យ៉ុង ចាន់កណ្ណិកា រួចហើយ ហើយពួកគេក៏បានបញ្ជាក់ថា ពួកគេនឹងចូលរួមនៅក្នុងពិធីមង្គលការរបស់តារារូបនេះមិនអាក់ខានឡើយ។
ពាក់ព័ន្ធនឹងការដឹកដៃបុរសជាគូស្នេហ៍ចូលរោងការនៅក្នុងពេលដ៏ខ្លីខាងមុខនេះ យ៉ុង ចាន់កណ្ណិកា បាននិយាយយ៉ាងរីករាយថា មង្គលការរបស់នាងនឹងរៀបចំប្រមាណជិត១០០តុ ហើយភាគច្រើនជាអ្នកសិល្បៈ។
នាងបាននិយាយប្រាប់សារព័ត៌មានក្នុងស្រុកថា៖ «ក្រោយរៀបការនេះ ខ្ញុំនឹងបញ្ចប់ភាពក្រមុំហើយ»៕