ដោយ៖ ទូច សុខា និង ស៊ុន ណារិន
ថ្ងៃអង្គារ ទី21 តុលា 2014
http://vodhotnews.com
មើលរូបភាពបន្ថែម
ផ្នែកមួយនៃអគារស្រុតចុះ(រូបថតដោយោ៖ ទូច សុខា)
សមត្ថកិច្ចជំនាញខេត្តតាកែវអះអាងថាការស្រុតចុះអគារទៅក្នុងអាងទឹកមួយបណ្តាលឲ្យមនុស្ស៥នាក់រងរបួស ដោយសារតែសំណង់អគារមិនមានស្តង់ដារ។
នៅព្រឹកម៉ោងជិត៩និង៣០នាទី អគាររបស់រោងចក្រNishiku Enterprise Co., Ltd ស្ថិតក្នុងភូមិឃ្លាំងសម្បត្តិ ឃុំពត់សរ ស្រុកទន្លេបាទី បានស្រុតចុះក្នុងអាងទឹកមួយដែលមានបណ្តាយប្រវែង៤០ម៉ែត្រ និងទទឹង២០ម៉ែត្រ។
អធិការប៉ូលិសស្រុកទន្លេបាទី លោក ង៉ាន់ សារី ដែលកំពុងតែតាមដានហេតុការណ៍នេះ មានប្រសាសន៍ថារហូតមកដល់ពេលនេះ កម្មករ៥នាក់ប៉ុណ្ណោះ បានរងរបួសស្រាល និងត្រូវបានបញ្ជូនទៅមន្ទីរពេទ្យបង្អែកស្រុកបាទី។ លោកបន្តថាកម្មករបានចាកចេញពីកន្លែងស្រុតអគាររួចរាល់ហើយមកដល់ពេលនេះ។លោកឲ្យដឹងទៀតថាការបាក់ស្រុតអគារនោះ ដោយសារតែអគារមិនមានបទដ្ឋាន ខុសបច្ចេកទេស ដោយគ្រាន់តែយកប្លង់សេទៅចាក់លើគម្របអាងស្តុកទឹកសម្រាប់កម្មករប្រើប្រាស់។លោកបញ្ជាក់ថា«បាក់ដោយសារខុសបច្ចេកទេសសុទ្ធសាធ !»។
លោកបន្តថាមន្រ្តីជំនាញខាងក្រសួងការងារ កម្លាំងសមត្ថកិច្ច និង ភាគីរោងចក្រនឹងជួបគ្នានៅម៉ោង២រសៀលនេះ។
អ្នកស្រី ហ៊ន ទុល អនុប្រធានសហជីពស៊ីខៅឌូ ប្រចាំខេត្តតាកែវ ប្រាប់VODថាក្រៅពីកម្មករ៥នាក់ ដែលត្រូវបានបញ្ជូនទៅមន្ទីរពេទ្យ កម្មករប្រមាណ១០នាក់ទៀតដែលមិនបានទៅមន្ទីរពេទ្យបានរងរបួសស្រាលរលាត់ដៃរលាត់ជើង។
បុគ្គលិកនៅពេទ្យបង្អែកស្រុកបាទី លោក លន់ ចាន់បូរី មានប្រសាសន៍ថា មនុស្ស៥នាក់បានរងរបួសស្រាលនៅក្នុងហេតុការណ៍ស្រុតអគារនេះ ហើយពុំមានអ្នកណាម្នាក់រងរបួសធ្ងន់ដល់ថ្នាក់ដេរនោះទេ។
ភាគីរោងចក្របានបដិសេធធ្វើអត្ថាធិប្បាយនៅពេលនេះ នៅពេលVODសាកសួរ។
កាលពីខែឧសភា ឆ្នាំ២០១៣ រោងចក្រមួយឈ្មោះវីងស្តារស៊ូ នៅខេត្តកំពង់ស្ពឺបានបាក់រលំបណ្តាលឲ្យកម្មករពីរនាក់ស្លាប់ និងមួយចំនួនរងរបួស៕