ដោយ៖ ស៊ុន ណារិន
ថ្ងៃចន្ទ ទី27 តុលា 2014
http://vodhotnews.com
មើលរូបភាពបន្ថែម
មនុស្សទាំង៥នាក់ដែលត្រូវបានដោះលែង (រូបភាពពីសហភាពការងារកម្ពុជា)
សាលាដំបូងខេត្តកំពង់ចាម នៅថ្ងៃចន្ទនេះសម្រេចដោះលែងមនុស្ស៥នាក់ និងបន្តឃុំឃាំងមនុស្ស៥នាក់ទៀត ដើម្បីសាកសួរនៅថ្ងៃអង្គារស្អែកនេះបន្តទៀត ពាក់ព័ន្ធនឹងហិង្សាកើតឡើងពេលកម្មកររោងចក្រជូ ហ៊ុយហ្វតវែ (Juhui Footwear) តវ៉ាកាលពីថ្ងៃសៅរ៍។
កាលពីថ្ងៃសៅរ៍សប្តាហ៍មុន សមត្ថកិច្ចខេត្តកំពង់ចាមបានឃាត់ខ្លួនកម្មករ និងសមាជិកសហជីពស៊ីខៅឌូចំនួន១០នាក់ បន្ទាប់ពីមានករណីផ្ទុះហិង្សារវាងសមត្ថកិច្ច និងកម្មករ ខណៈកម្មករតវ៉ាទាមទារលក្ខខណ្ឌការងារពីភាគីរោងចក្រ ជូ ហ៊ុយហ្វតវែ ។
សេចក្តីប្រកាសព័ត៌មានរបស់សហភាពការងារកម្ពុជា ឲ្យដឹងថានៅវេលាម៉ោង៦ល្ងាចនេះ តំណាងអយ្យការអមសាលាដំបូងខេត្តកំពង់ចាម បានសម្រេចដោះលែងមនុស្ស៥នាក់ បន្ទាប់ពីតំណាងអយ្យការ បានសាកសួរជនដែលត្រូវបានចាប់ខ្លួនទាំងនោះ។
សហភាពការងារកម្ពុជាឲ្យដឹងថាអ្នកទាំង៥ដែលត្រូវបានដោះលែងមានឈ្មោះ ១. ប៊ុន ស្រីណេ កម្មការិនី ២. ជា រាជ អ្នកបើកឡាន
៣. ភឿន ផល អ្នកបើកឡាន ៤. ពត ប៊ុនថុន អ្នកបើកឡាន និង៥.ធឿន ប៊ុនថន អ្នកជិះម៉ូតូកាត់រោងចក្រ។
លក្ខខណ្ឌការងារដែលកម្មករទាមទាររួមមានបន្ថែមលុយបាយថ្ងៃត្រង់ ស្នើឲ្យភាគីក្រុមហ៊ុនគោរពកិច្ចព្រមព្រៀងជាមួយកម្មករកាលពីឆ្នាំ២០១២ ទាមទារលុយបន្ថែមម៉ោងពេលល្ងាច បន្ថែមលុយធ្វើដំណើរ និងលុយព្រីម(ប្រាក់រង្វាន់ទៀតទាត់)៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com