ដោយ៖ ណុល ដារ៉ា
ថ្ងៃចន្ទ ទី27 តុលា 2014
http://vodhotnews.com
ស្តាប់សំឡេង៖ |
ចម្លងទុក |
ប្រជាពលរដ្ឋស្រុកគិរីសាគរ ខេត្តកោះកុង នៅព្រឹកថ្ងៃចន្ទនេះ នាំគ្នាឡើងទៅតវ៉ានៅមុខតុលាការខេត្តនេះ ដើម្បីទាមទារឲ្យទម្លាក់បទចោទលើតំណាងខ្លួន ដែលព្រះរាជអាជ្ញាចោទពីបទលួចទ្រព្យសម្បត្តិក្រុមហ៊ុនកោះកុង SEZ។
តំណាងប្រជាពលរដ្ឋដែលកំពុងតវ៉ាឲ្យដឹងថា នៅព្រឹកនេះតុលាការខេត្តកោះកុង បានកោះហៅតំណាងប្រជាពលរដ្ឋម្នាក់ក្នុងចំណោម៤នាក់ ដែលតុលាការធ្លាប់កោះហៅកាលពីខែមុន ឲ្យចូលបំភ្លឺ គឺលោក ផន ណុល។
ម្នាក់ក្នុងចំណោមតំណាងប្រជាពលរដ្ឋនៅឃុំព្រែកខ្សាច់ ស្រុកគិរីសាគរ ខេត្តកោះកុង លោករួត សុផល ឲ្យ VOD ដឹងនៅព្រឹកថ្ងៃចន្ទនេះថា ប្រជាពលរដ្ឋប្រមាណ៧០នាក់ តំណាងឲ្យជនរងគ្រោះក្នុងជម្លោះដីធ្លី១៣៥គ្រួសារ កំពុងតវ៉ានៅមុខតុលាការខេត្តកោះកុង ទាមទារឲ្យតុលាការឈប់ចោទប្រកាន់លើតំណាងពួកគាត់ និងបញ្ឈប់កោះហៅពួកគេចូលបំភ្លឺនៅតុលាការបន្តទៀត ដែលពួកគាត់យល់ថា ជាការរំខានដល់ពេលវេលាធ្វើការរកស៊ី។ លោកថា «កុំឲ្យចោទប្រកាន់ពួកយើងតទៅទៀតអី ឈប់ឲ្យហៅពួកយើងតទៅទៀត ព្រោះអីហៅខាតពេលវេលារកស៊ីផង ខាងពួកយើងចុះឡើងៗអត់មានសោហុយផង»។
លោក រួត សុផល បន្តថាក្រោយពីចេញពីតុលាការខេត្ត ពួកគាត់នឹងបន្តទៅតវ៉ានៅសាលាខេត្តកោះកុងបន្តទៀត ជំរុញឲ្យអាជ្ញាធរខេត្តនេះពន្លឿនល្បឿនរកដំណោះស្រាយរឿងជម្លោះដីធ្លីដ៏រ៉ាំរ៉ៃរបស់ពួកគាត់។
VOD មិទាន់អាចទាក់ទងចៅក្រមនៃតុលាការខេត្តកោះកុង លោកខាំ សុផារី ដើម្បីសុំអត្ថាធិប្បាយលើបញ្ហានេះបានទេ។
មន្ត្រីសម្របសម្រួលអង្គការលីកាដូប្រចាំខេត្តកោះកុង លោកអ៊ិន គង់ជិត ដែលបានតាមដានករណីខាងលើនេះឲ្យ VOD ដឹងថា តាមលោកដឹង នគរបាលរកមិនឃើញថាតំណាងពលរដ្ឋ ដែលតុលាការខេត្តកោះកុងកំពុងកោះហៅចូលបំភ្លឺទាំងនោះ មានបទល្មើសដូចបានចោទប្រកាន់នោះទេ។ លោក អ៊ិន គង់ជិត យល់ថា នីតិវិធីរបស់តុលាការនៅពេលនេះ គឺជាគំរាមកំហែងស្មារតីប្រជាពលរដ្ឋមិនឲ្យធ្វើការតវ៉ា ករណីជម្លោះដីធ្លីរបស់ពួកគេជាមួយក្រុមហ៊ុនរបស់អ្នកមានលុយ មានអំណាច។ លោកបញ្ជាក់ថា «កន្លងមកខាងនគរបាលធ្វើការស៊ើបអង្កេត ស្រាវជ្រាវហ្នឹង ឃើញថាប្រជាពលរដ្ឋទាំងអស់ហ្នឹង មិនបានប្រព្រឹត្តបទល្មើស ប៉ុន្តែតុលាការចេះតែយករឿងក្តីហ្នឹង យកមកចាត់ការ ហើយចំណាត់ការនេះ តុលាការមានភាព លម្អៀតទៅរកក្រុមហ៊ុន ហើយក្រុមហ៊ុនប្រើតុលាការដើម្បីបំបាក់ស្មារតីពួកគាត់ ដើម្បីកុំឲ្យពួកគាត់ធ្វើការតវ៉ាឲ្យពួកគាត់ខ្លបខ្លាច»។
លោកអ៊ិន គង់ជិត បន្តថាការគំរាមកំហែងដែលតុលាការកោះកុងកំពុងធ្វើលើប្រជាពលរដ្ឋនេះ នឹងមិនមានប្រសិទ្ធភាពទេ ព្រោះប្រជាពលរដ្ឋទាំងនោះមានទឹកចិត្តក្លាហាន ដោយសារពួកគាត់បាត់បង់ដីស្រែចម្ការ និងដីលំនៅដ្ឋាន ដូច្នេះពួកគាត់ត្រូវតែប្ដូរ ដើម្បីទាមទារដីទាំងនោះមកវិញ។
តំណាងប្រជាពលរដ្ឋឲ្យដឹងថា នៅខែមករា ក្រុមហ៊ុនកោះកុង SEZ.Co.LTD បានយកគ្រឿងសំណង់ទៅធ្វើរបងព័ទ្ធដីប្រជាពលរដ្ឋ១៣៥គ្រួសារ ពេលនោះប្រជាពលរដ្ឋបានរាយការណ៍ទៅនគរបាលមូលដ្ឋាន ពីគម្រោងការណ៍ដកហូតគ្រឿងសំណង់នោះ។ ប្រភពដដែលឲ្យដឹងថា ពីរថ្ងៃក្រោយការជូនដំណឹងនោះ ពួកគាត់បានដកហូតគ្រឿងសំណង់របស់ក្រុមហ៊ុន SEZ ដោយមាននគរបាលមូលដ្ឋានដឹងឮ។ ប៉ុន្តែតុលាការខេត្តនេះបានចោទប្រកាន់ពួកគាត់ថា បានលួចយកទ្រព្យសម្បត្តិរបស់ក្រុហ៊ុន ហើយបានកោះហៅតំណាងពួកគាត់ចូលតុលាការជាបន្តបន្ទាប់។ ប្រភពដដែលបន្ថែមថា កាលពីថ្ងៃ២៣ ខែកញ្ញាកន្លងទៅ តុលាការខេត្តកោះកុងបានកោះហៅតំណាងពលរដ្ឋ៤នាក់ឲ្យចូលបំភ្លឺ ប៉ុន្តែដោយសារមានប្រជាពលរដ្ឋជាច្រើន ឡើងទៅតុលាការខេត្តនេះដើម្បីគាំទ្រតំណាងរបស់ខ្លួន ទើបតុលាការនេះប្ដូរនីតិវិធីក្នុងការកោះហៅតំណាងពួកគេឲ្យចូលបំភ្លឺម្នាក់ម្ដងវិញ៕
សូមសរសេរមកលោក ណុល ដារ៉ា តាមរយៈ dara@vodhotnews.com