ដោយ៖ ញឹម សុខន
ថ្ងៃចន្ទ ទី27 តុលា 2014
http://vodhotnews.com
ស្តាប់សំឡេង៖ |
ចម្លងទុក |
មើលរូបភាពបន្ថែម
អ្នកភូមិរស់នៅជាប់ព្រលានយន្តហោះអន្តរជាតិភ្នំពេញ មកបន់ស្រន់ដើមពោធិ៍ក្បែរផ្ទះលោកនាយករដ្ឋមន្ត្រី (រូបថត៖ ញឹម សុខន)
តំណាងអ្នកភូមិរស់នៅជាប់ព្រលានយន្តហោះអន្តរជាតិភ្នំពេញ រកកិច្ចអន្តរាគមន៍ជាថ្មីម្ដងទៀត ពីនាយករដ្ឋមន្ត្រី ដើម្បីការពារពួកគេ៦០០គ្រួសារ កុំឲ្យមានការបណ្តេញចេញទាំងបង្ខំ ខណៈអាជ្ញាធរជូនដំណឹងពី គម្រោងអភិវឌ្ឍន៍នៅតំបន់នោះ ដោយមិនប្រាប់ពីការផ្តល់សំណងជាមុន។
តំណាងអ្នកភូមិ អ្នកស្រី ច្រាយ នីម ប្រាប់អ្នកសារព័ត៌មានមុនដាក់ញត្តិ ទៅខុទ្ទកាល័យនាយករដ្ឋមន្ត្រី នៅក្រោមដើមពោធិ៍ នាថ្ងៃទី២៧ ខែតុលា ឆ្នាំ២០១៤ នេះថា ច្រើនឆ្នាំមកនេះ អាជ្ញាធរបានប្រកាសពីការពង្រីកព្រលានយន្តហោះអន្តរជាតិភ្នំពេញ ប៉ុន្តែស្ត្រីរូបនោះអះអាងថា អាជ្ញាធរមិនប្រាប់ពីការផ្តល់សំណងទេ ដូចនេះហើយអ្នកភូមិបារម្ភថាពួកគេ៦០០គ្រួសារ ដែលរស់នៅក្នុងគម្រោងអភិវឌ្ឍន៍នោះ អាចនឹងត្រូវបណ្តេញចេញពីលំនៅដ្ឋានទាំងបង្ខំ ដូចសហគមន៍នានាក្នុងរាជធានីភ្នំពេញដែរ។ អ្នកស្រីថា «ពីដំបូង ដោយសារយើងអត់ដាក់លិខិតតវ៉ា គេបណ្តេញយើងចេញដោយបង្ខំ ដោយទុករយៈពេល៧ថ្ងៃ តែដោយសារយើងតវ៉ាទាមទារ គេថានឹងដោះស្រាយជូនយើង ប៉ុន្តែការដោះស្រាយរបស់គេ គេហៅ ហើយគេប្រាប់យើង ប៉ុន្តែគោលការណ៍ដែលគេដោះស្រាយរបៀបយ៉ាងណាអត់មានទេ វាបីដូចជាឲ្យយើងរក្សានៅស្ងៀមស្ងាត់ តាមគោលការណ៍ដែលគេរៀបចំ»។
កន្លងទៅសហគមន៍មួយចំនួន ក្នុងរាជធានីភ្នំពេញ ត្រូវបានអាជ្ញាធរក្រុងបណ្តេញចេញទាំងបង្ខំ ដូចជាសហគមន៍ដីក្រហម សំបុកចាប បុរីកីឡា បឹងកក់ជាដើម ដែលធ្វើឲ្យអ្នករងគ្រោះចេញតវ៉ា រកយុត្តិធម៌រហូតសព្វថ្ងៃនេះ។
ពេលប្រគល់ញត្តិឲ្យខុទ្ទកាល័យនាយករដ្ឋមន្ត្រីនៅថ្ងៃចន្ទនេះដែរ អ្នកភូមិបានអុជធូប មុខមន្ត្រីដែលមកទទួលញត្តិ សុំឲ្យទុក្ខលំបាករបស់ពួកគេ បានដឹងឮដល់ប្រមុខរាជរដ្ឋាភិបាល ដើម្បីពន្លឿនរកដំណោះស្រាយ «ថ្ងៃនេះខ្ញុំអុជធូបនេះ សូមបានដល់ដៃគាត់[លោកនាយករដ្ឋមន្ត្រី ហ៊ុន សែន] កូនចៅអស់ដីធ្លីនៅហើយ សូមឲ្យបានដៃគាត់នៅក្នុងថ្ងៃនេះ ព្រះអង្គដើមពោធិ៍ជួយផ្តល់ដំណឹងទៅហើយថ្ងៃហ្នឹង»។
ក្រោយពីទទួលញត្តិ មន្ត្រីខុទ្ទកាល័យនាយករដ្ឋមន្ត្រី លោក គង់ ចំរើន អះអាងប្រាប់ក្រុមអ្នកតវ៉ាថា លោកនឹងបំពេញតួនាទីតាមបែបទរដ្ឋបាល។ លោកបញ្ជាក់ថា «ឯកសារនេះ ខ្ញុំនឹងយកទៅជូនថ្នាក់ដឹកនាំតាមឋានានុក្រុមរបស់លោក ព្រោះខ្ញុំគ្រាន់តែជាអ្នកទទួលពាក្យបងប្អូនទេ អ៊ីចឹងបានខ្ញុំចេះតែព្យាយាមឲ្យបងប្អូនបញ្ជាក់នូវអត្តសញ្ញាណ ឲ្យបានច្បាស់លាស់។ (សំណួរអ្នកសារព័ត៌មាន៖ ធម្មតាប្រជាពលរដ្ឋបារម្ភថា ញត្តិហ្នឹងមិនដល់ដៃនាយករដ្ឋមន្ត្រី បងអាចបញ្ជាក់ជំហរនេះបានទេ) បងឯងព្យាយាមសិក្សាបន្តិច ខ្ញុំមិនទាន់ឆ្លើយ ព្រោះរឿងអ៊ីចឹងវាត្រូវឆ្លើយច្រើន ទាល់បងឯងជួបជាមួយខ្ញុំផ្ទាល់បានដឹង»។
ថ្មីៗនេះនាយករដ្ឋមន្ត្រីធ្លាប់ស្តីបន្ទោសមន្ត្រីក្រោមឱវាទថា បានលាក់បាំងរឿងជម្លោះដីធ្លី ដែលអ្នកភូមិស្វែងរកកិច្ចអន្តរាគមន៍ពីលោក។
មន្ត្រីឃ្លាំមើលការរំលោភសិទ្ធិមនុស្សនៅអង្គការលីកាដូ លោក អំ សំអាត ដែលតាមឃ្លាំមើលករណីតវ៉ានេះ យល់ថា ការប្រើទានធូប អុជបន់ស្រន់នៅមុខមន្ត្រីខុទ្ទកាល័យពេលប្រគល់ញត្តិ ទំនងជាសារបង្ហាញថា អ្នករងគ្រោះ ហាក់អស់ជំនឿលើប្រព័ន្ធច្បាប់នៅកម្ពុជា ដែលមិនអាចដាក់ទោសអ្នកមានលុយ និងមានអំណាចដែលរំលោភច្បាប់បាន។
តាមញត្តិអ្នកភូមិជំរុញឲ្យនាយករដ្ឋមន្ត្រីអន្តរាគមន៍លើលក្ខខណ្ឌ៣ចំណុច ដូចជា ទី១-សុំប័ណ្ណកម្មសិទ្ធិនៅនឹងកន្លែង សម្រាប់ដី និងផ្ទះដែលសេសសល់។ ទី២-ដីដែលប៉ះពាល់ ក្រុមហ៊ុនត្រូវផ្តល់សំណងដល់ពលរដ្ឋជាម្ចាស់ដី តាមតម្លៃទីផ្សារ ក្នុងមួយម៉ែត្រការ៉េតម្លៃ២៥០០ដុល្លារ និងទី៣ សម្រាប់ពលរដ្ឋដែលប៉ះពាល់ទាំងស្រុង ត្រូវផ្តល់ផ្ទះនៅមិនឆ្ងាយពីតំបន់អភិវឌ្ឍន៍ហើយជាប់នឹងផ្លូវធំជាដើម។
យ៉ាងនេះក្តីការដង្ហែញតិ្តជាថ្មីទៀត នៅថ្ងៃនេះ គ្មានការចាប់ខ្លួនក្រុមអ្នកតវ៉ាដូចពេលមុនៗទេ ប៉ុន្តែកម្លាំងសមត្ថកិច្ចរាប់រយនាក់បានដាក់ពង្រាយចាំមុន នឹងខ្លះទៀតកៀកដៃតំណាងអ្នកតវ៉ា ទំនងជាបារម្ភខ្លាចពួកគេ ហែក្បួនសម្រុកចូលផ្ទះនាយករដ្ឋមន្ត្រី៕
សូមសរសេរមកលោក ញឹម សុខន តាមរយៈ sokhorn@vodhotnews.com
ហ៊ុន សែន ជាអ្នកបញ្ជាឱ្យដេញចេញ និងរឹបអូសដីធ្លីទាំងអស់
ហ៊ុន សែន ស្តីបន្ទោសមន្ត្រីក្រោមឱវាទថា បានលាក់បាំងរឿងជម្លោះដីធ្លី គ្រាន់តែជាលេសបោកបញ្ឆោតប្រជាជនដើម្បីទាញយកសន្លឹកឆ្នោត
ក្នុងពេលបោះឆ្នោតតែប៉ុណ្ណោះ ហេតុអីប្រជាជនខ្មែរក្នុងគណបកស្សប្រជាជនមិនគិតឱ្យបានដិតដល់ទៅមើល ?
តើ ហ៊ុន សែន មានដែលបង្ក្រាបពួករឹបអូសដីធ្លីអ្នករាល់គ្នាទេ ? អត់មានទេ ! គឺមានតែប្រើប៉ូលិស និង អង្គរក្យដេញវ៉ៃ ទាត់ធាក់ បាញ់
ប្រជាចនតវ៉ាសឹងតែរាល់ថ្ងៃ ល្មមភ្ញាក់ខ្លួនហើយម្ចាស់សន្លឹកឆ្នោតមហាវេទនារងគ្រោះអើយ !
ក្នុងនាមជាកូនខ្មែរម្នាក់ខ្ញុំសូមអំពាវនាវដល់រាជរដ្ឋាភិបាលត្រូវតែដោះស្រាយបញ្ហាដីធ្លីនៅអាណត្តិ
នេះអោយអស់អោយហើយទៅ ។ពីព្រោះអីរាជរដ្ឋាភិបាលគ្មានពេលទៀតទេសម្រាប់ដោះស្រាយ
ទៀតទេនៅអាណត្តិក្រោយ ។គួរបន្សល់ស្នារដៃទុកអោយកូនចៅជំនាន់ក្រោយមើលជាគំរូរឬក៏គាត់
ថាសម័យតេជោគ្មានបញ្ហាណាមួយមិនត្រូវបានដោះស្រាយ ។ សព្វថ្ងៃបើកពត៌មានឡើងឃើញតែ
បាតុកម្មគ្មានពេលសំរាកសោះ បើមិនបញ្ហានេះក៏មានបញ្ហានោះ កើតឡើងជាហូរហែរ បើគ្មានវិធី
ដោះស្រាយក៏ធ្វើជាបុរសខ្លាំងដូចជាសៀវភៅដែលបានបោះពុម្ពកន្លងមកគឺការចុះចេញពីអំណាច
តែម្ដង ។ បើសម្ដេចហ៊ានចុះចេញពីអំណាចនេះរាស្រ្ដបានសុខ ប្រទេសនឹងមានភាពរុងរឿងជា
មិនខានឡើយ ។ កុំអោយគេនិយាយថា
សម័យតេជោ ទឹកជន់ជោលិចពេញទីក្រុង
សម័យតេជោ ពូកែរដោះដូរលក់ដីរដ្ឋ
សម័យតេជោ សម្បូរជនស៊ីជរគ្មានមិត្ដស្មោះ
សម័យតេជោ សម្បូរចោរពេញទឹកដី
សម័យតេជោ បង្ហូរពលករចេញទៅក្រៅ
សម័យតេជោ យួនជន់ជោពេញទឹកដី
សម័យតេជោ ទឹកភ្នែកខ្មែរពេញទឹកដី
សម័យតេជោ សម្បូរដោយជនអន្ឋពាលជក់អាភៀនញៀនកញ្ឆារ ។