ដោយ៖ ស៊ុន ណារិន
ថ្ងៃអង្គារ ទី28 តុលា 2014
http://vodhotnews.com
មើលរូបភាពបន្ថែម
(រូបភាពពីសាលាក្តីខ្មែរក្រហម)
សាលាក្តីខ្មែរក្រហម បើកកិច្ចប្រជុំជាអសាធារណៈមួយនៅព្រឹកថ្ងៃអង្គារនេះ ដើម្បីពិភាក្សាពីការស្នើសុំរបស់មេធាវីការពារជនជាប់ចោទលោក នួន ជា និងលោក ខៀវ សំផន ខណៈមេធាវីជាតិ និងអន្តរជាតិទាំងនោះព្រមានធ្វើពហិការសវនាការលើសំណុំរឿង០០២/០២។
សេចក្តីប្រកាសព័ត៌មានរបស់សាលាក្តីខ្មែរក្រហមឲ្យដឹងថាអង្គជំនុំជម្រះបង្គាប់ឲ្យមេធាវីចូលរួមកិច្ចប្រជុំរៀបចំសវនាការដែលត្រូវធ្វើឡើងជាអសាធារណៈ នៅថ្ងៃទី២៨ខែតុលា វេលាម៉ោង៩ព្រឹក។ សេចក្តីប្រកាសបញ្ជាក់ថាកិច្ចប្រជុំនេះនឹងជាឱកាសចុងក្រោយឲ្យមេធាវីលោក នួន និងខៀវ សំផន ពិភាក្សាពីបញ្ហាធនធានបច្ចុប្បន្នជាមួយអង្គជំនុំជម្រះ។
រហូតមកដល់ពេលនេះ អង្គជំនុំជម្រះសាលាក្តីខ្មែរក្រហមបានចេញលិខិតព្រមានមេធាវីជាតិ និងអន្តរជាតិរបស់ជនជាប់ចោទ លោក ខៀវ សំផន និងលោក នួន ជា ថាប្រព្រឹត្តខុសវិជ្ជាជីវៈ បន្ទាប់ពីមេធាវីការពារទាំងនោះបានដើរចេញពីបន្ទប់សវនាការលើសំណុំរឿង០០២/០២កាលពីថ្ងៃទី១៧ខែតុលា ឆ្នាំ២០១៤ និងការមិនចូលរួមកិច្ចប្រជុំរៀបចំសវនាការកាលពីថ្ងៃទី២១ខែតុលា។
រហូតមកដល់ពេលនេះ មេធាវីការពារក្តីឲ្យជនជាប់ចោទក្នុងសំណុំរឿង០០២/០២ បានបដិសេធចូលសវនាការនៅពេលខាងមុខបន្តទៀត ដោយអះអាងថាខ្លួនមិនមានពេលធ្វើបណ្តឹងសាទុក្ខ និងការដែលតុលាការមិនទាន់ឆ្លើយតបនឹងបណ្តឹងដិតជិតដែលប្តឹងសុំដកចៅក្រមខ្មែរ៣រូប រួមមាន លោក និល ណុន លោក យ៉ា សាខន និងលោក យូ ឧត្តរ៉ា និងចៅក្រមបារាំង១រូប គឺលោក ហ្សង់ម៉ាក ឡាវែញ (Jean- Marc Lavergne)។
កាលពីថ្ងៃទី០៧ខែសីហា អង្គជំនុំជម្រះវិសាមញ្ញក្នុងតុលាការកម្ពុជា បានប្រកាសសាលក្រមក្នុងសំណុំរឿង០០២/០១ ដោយកាត់ទោសអតីតមេដឹកនាំជាន់ខ្ពស់ក្នុងរបបកម្ពុជាប្រជាធិបតេយ្យ គឺលោក នួន ជា និងលោក ខៀវ សំផន ឲ្យជាប់ពន្ធនាគារអស់មួយជីវិត ពីបទឧក្រិដ្ឋកម្មប្រឆាំងនឹងមនុស្សជាតិ ។
ទីតាំងឧក្រិដ្ឋកម្មដែលបានចោទប្រកាន់ និងការចោទប្រកាន់តាមអង្គហេតុ ជាមូលដ្ឋានសម្រាប់ការជំនុំជម្រះនៃសំណុំរឿង០០២/០២រួមមាន បទប្រល័យពូជសាសន៍ចំពោះជនជាតិចាម និងវៀតណាម ការរៀបការដោយបង្ខំ និងបទរំលោភសេពសន្ថវៈ (ទូទាំងប្រទេស), ការបោសសម្អាតផ្ទៃក្នុង និងការប្រព្រឹត្តចំពោះពុទ្ធសាសនិកជនជាដើម។
សំណុំរឿង០០២ ត្រូវបានបែងចែកជា២ករណី ដើម្បីសម្រួលដល់ការកាត់ក្តី គឺករណី០០២/០១ និង០០២/០២ ដោយសារភាពស៊ាំញ៉ាំ និងវ័យចាស់ជរារបស់ជនជាប់ចោទ។ ជនជាប់ចោទក្នុងសំណុំរឿង០០២ រួមមាន លោក នួន ជា អាយុ៨៨ឆ្នាំ អតីតអនុលេខាបក្សកុម្មុយនីស្តកម្ពុជា និង ខៀវ សំផន អាយុ៨៣ឆ្នាំ អតីតប្រមុខរដ្ឋនៃកម្ពុជាប្រជាធិបតេយ្យ៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com