ដោយ៖ បាន វិទ្យា និង សុវណ្ណ ប៊ុនថៃ
ថ្ងៃសុក្រ ទី31 តុលា 2014
http://vodhotnews.com
មើលរូបភាពបន្ថែម
បណ្ដាជនជាតិដើមភាគតិចជួបប្រជុំគ្នាកាលពីថ្ងៃព្រហស្បតិ៍ម្សិលមិញ (រូបភាព៖ សុវណ្ណ ប៊ុនថៃ)
ជនជាតិដើមភាគតិចក្នុងខេត្តរតនគីរី ស្នើឲ្យតំណាងរាស្ត្ររបស់ខ្លួន និងអាជ្ញាធរខេត្ត អន្តរាគមន៍បញ្ឈប់គម្រោងសាងសង់រូបចម្លាក់ព្រះពុទ្ធចូលនិព្វានក្នុងបរិវេណបឹងយក្សឡោម ដោយអះអាងថា ផ្ទុយនឹងប្រពៃណីវប្បធម៌របស់ខ្លួន ។
ប្រធានគណៈកម្មការបឹងយក្សឡោម លោក វេង ចឹ បា្រប់VODកាលពីថ្ងៃព្រសហ្បតិ៍ម្សិលមិញថា តំណាងរាស្ត្រខេត្តលោក ប៊ូ ឡាំ បានបញ្ជាឲ្យចៅសង្កាត់យក្សឡោមប្រមូលស្នាមមេដៃយល់ព្រមពីជនជាតិដើមភាគតិចលើលិខិតគម្រោងសាងសង់រូបចម្លាក់ព្រះពុទ្ធចូលនិព្វាន លើផ្ទៃដីទំហំ១៨គុណនឹង២៣ម៉ែត្រ តែពួកគាត់មិនព្រមផ្តិត ។
លោក វេង ចឹ បន្តថា ក្រុមជនជាតិដើមភាគតិចទំពួនមកពី៥ភូមិក្នុងសង្កាត់យក្សឡោម ក្រុងបានលុង បានជួបប្រជុំគ្នា និងចេញសេចក្តីថ្លែងការណ៍រួមមួយ ដោយមានការគាំទ្រពីសហគមន៍ជនជាតិដើមភាគតិចផ្សេងទៀតក្នុងខេត្ត ជំទាស់នឹងគម្រោងសាងសង់នេះ។
នៅក្នុងសេចក្តីថ្លែងការណ៍របស់ជនជាតិដើមភាគតិចទាំងនោះលើកឡើងថា ពួកគេបានរស់នៅ និងគ្រប់គ្រង ការពារតំបន់បឹងយក្ខឡោមអស់រយៈពេលជាង១៧ឆ្នាំមកហើយ ដោយរស់នៅប្រកបដោយភាពសុខសាន្ត តាមរយៈការការពារបាននូវអត្តសញ្ញាណក្រុមជនជាតិដើមភាគតិចផ្សេងៗ ជាពិសេសអត្តសញ្ញាណជនជាតិដើមភាគតិចទំពួន ។
សេចក្ដីថ្លែងការណ៍នោះបន្តថា ការកសាងរូបចម្លាក់ព្រះពុទ្ធនេះគឺផ្ទុយទៅនឹងប្រពៃណី វប្បធម៌ និងអត្តសញ្ញាណជាជនជាតិភាគតិចទំពួន និងអាចធ្វើឲ្យប៉ះពាល់ដល់សុវត្ថិភាព និងសន្តិសុខល្អក្នុងសហគមន៍ដោយប្រការណាមួយដូចជា គ្រោះថ្នាក់ផ្សេងៗ ឈឺស្លាប់ ដោយសារអារក្សអ្នកតារបស់ជនជាតិដើមភាគតិចមានការខឹងសម្បារ ។
ជនជាតិដើមភាគតិច ទំពួន មួយរូប លោក ម៉ង វិចិត្រ មានប្រសាសន៍ថា ការរក្សាបាននូវអត្តសញ្ញាណរបស់ជនជាតិដើមភាគតិចមានដូចជា ទំនៀមទម្លាប់ សម្ភារប្រើប្រាស់របស់ជនជាតិ ពិសេសគឺជំនឿលើការសែនព្រេន បន់ស្រន់គោរពលើអារក្សដើមឈើធំៗ មេឃ ដី ហើយមិនដែលតាំងរូបអ្វីក្រៅពីនោះទេ។
លោក ម៉ង វិចិត្រ បន្តថា កាលណាសាងសង់រូបព្រះពុទ្ធនៅតំបន់នោះ វាអាចមានការប៉ះពាល់ ដល់ជំនឿរបស់បងប្អូនជនជាតិ ហើយលើសពីនេះ បឹងយក្សឡោមគឺជាកន្លែងមួយសម្រាប់អភិរក្សនូវប្រពៃណីវប្បធម៌ជនជាតិដើមភាគតិច និងព្រៃអារក្ស ដោយរាល់ពេលសែនព្រេនមានកាប់គោ ក្របី ជ្រូក មាន់ជាដើម ដើម្បីអំពាវនាវអារក្សទឹក ភ្នំ បឹងមកទទួល ដូច្នេះមិនអាចសាងសង់រូបព្រះបានទេ ។
តំណាងរាស្ត្រខេត្តរតនៈគិរីលោក ប៊ូ ឡាំ មានប្រសាសន៍ថា គម្រោងសាងសង់រូបចម្លាក់នេះជាការលើកឡើងរបស់ឃុំ ប៉ុន្តែបច្ចុប្បន្នមិនទាន់មានការសាងសង់លើបរិវេណបឹងយក្សឡោមទេ ដោយមិនទាន់មានការឯកភាពពីអាជ្ញាធរដែនដី និងមន្ទីរពាក់ព័ន្ធនៅឡើយ ។
សហគមន៍ជនជាតិដើមភាគតិចទាំង៥ភូមិអះអាងថា ខ្លួននៅតែរក្សាជំហរថែរក្សា និងការពារធនធានធម្មជាតិ ទឹកបឹង ព្រៃឈើ បរិស្ថាន និងអត្តសញ្ញាណជាជនជាតិភាគតិចទំពួនដូចដើម ៕
សូមសរសេរមកកញ្ញា បាន វិទ្យា តាមរយៈ vitcheaban77@gmail.com