Fri, 31 October 2014
ផាក់ ស៊ាងលី
ភ្នំពេញប៉ុស្តិ៍
មណ្ឌលគិរីៈ សហគមន៍ជនជាតិដើមភាគតិចព្នងជាង ២០០ គ្រួសារក្នុង ខេត្តមណ្ឌលគិរី បានដាក់ពាក្យបណ្តឹងទៅតុលាការ និងខុទ្ទកាល័យលោកនាយករដ្ឋមន្រ្តី ដើម្បីស្នើឲ្យលុបចោលដីសម្បទានសេដ្ឋកិច្ចរបស់ភរិយាអភិបាលរងខេត្តនេះនិងទាមទារសំណងដើមជ័រទឹកពីរលានដើមដែលក្រុមហ៊ុនបានកាប់មានតម្លៃ ៥០០ លានដុល្លារ។
នេះជាបណ្តឹង ទី៩ ហើយដែលសហគមន៍ ឡៅកា ២៧៣ គ្រួសារស្ថិតក្នុង សង្កាត់សុខដុម ក្រុងសែនមនោរម្យ បានដាក់ប្តឹង បន្ទាប់ពីបណ្តឹងចំនួន ៨ លើកមិនត្រូវបានអាជ្ញាធរមូលដ្ឋាន និងស្ថាប័នពាក់ព័ន្ធយកចិត្តទុកដាក់ដោះស្រាយ ពីបញ្ហារំលោភសិទ្ធិ និងឈូសឆាយបំផ្លាញធនធានព្រៃឈើពួកគាត់ ពីសំណាក់ក្រុមហ៊ុន វីឡា ឌីវិលុបមេន របស់ភរិយាលោក យឹម លុច អភិបាលរង ខេត្តមណ្ឌលគិរី។ បន្ទាប់ពីដាក់ពាក្យបណ្តឹងទៅតុលាការ ខេត្តមណ្ឌលគិរី កាលពីដើមសប្តាហ៍នេះ តំណាងពួកគាត់ចំនួន ៥ នាក់បានធ្វើដំណើរយកបណ្តឹងមកដាក់នៅខុទ្ទកាល័យលោកនាយករដ្ឋមន្ត្រី ហ៊ុន សែន កាលពីម្សិលមិញ ហើយបានធ្វើសន្និសីទសារព័ត៌មានមួយនៅស្នាក់ការកណ្តាលអង្គការអាដហុក ស្តីពីទំនាស់ដីធ្លីជាមួយក្រុមហ៊ុននេះអស់រយៈពេលជិត ៤ឆ្នាំ មកហើយ។
ស្ថិតក្នុងសម្លៀកបំពាក់ជាជនជាតិភាគតិចព្នង តំណាងសហគមន៍លោក ប្លឹក ម៉ាល់អាយុ ៧៤ឆ្នាំ បានថ្លែងក្នុងសន្និសីទនោះថា ពួកគាត់ជាជនជាតិដើមបាននិងកំពុងរស់នៅក្នុងសហគមន៍នោះ តាំងពីដូនតាម៉ែឪពុកគាត់មករាប់រយឆ្នាំមកហើយ ប៉ុន្តែកាលពី ឆ្នាំ២០០០ ក្រុមអភិរក្សបរិស្ថានបានចូលទៅការពារព្រៃឈើតំបន់នោះ ហើយបានផ្តល់ដីព្រៃជាង ៧០០ ហិកតាទៅឲ្យក្រុមហ៊ុន វីឡា ឌីវិលុបមេន ដើម្បីដាំកៅស៊ូ។
លោក ប្លឹក ម៉ាល់ បានថ្លែងដោយលើកដៃសំពះថា៖ «ក្រុមហ៊ុនបានឈូសឆាយកាប់គាស់អស់រលីងទាំងដើមជ័រទឹក ព្រៃក៏អស់ ដីក៏អស់ អ៊ីចឹងឲ្យពួកខ្ញុំព្នងទៅនៅឯណា? ពេលអស់ព្រៃឈើនិងដើមជ័រទឹក ពួកយើងរស់នៅយ៉ាងលំបាកវេទនាមែនទែន រកនិយាយលែងចេញ»។ លោក ម៉ាល់ បានអះអាងថា ក្រុមហ៊ុនមិនត្រឹមតែឈូសក្នុងដីដែលទទួលបានពីក្រសួងបស្ថាន ប៉ុណ្ណោះទេ ថែមទាំងឈូសពង្រីកក្រៅដីក្រុមហ៊ុនរហូតដល់ជាង ៣០០ ហិកតាទៀត។ ការឈូសឆាយពង្រីកនេះបានធ្វើឲ្យបាត់បង់ព្រៃស្រោង ព្រៃអារក្ស ព្រៃតំណម ព្រៃកប់សព ចម្ការវិលជុំនិងប្រភេទសត្វព្រៃជាច្រើន។
តំណាងម្នាក់ទៀតឈ្មោះ ខ្វើង ទុំ អាយុ ៤២ឆ្នាំ ក៏បានលើកឡើងផងដែរថា ក្រុមហ៊ុនបានគំរាមកំហែង ហាមឃាត់ និងឆែកឆេរពលរដ្ឋ ពេលចេញចូលព្រៃរបស់ពួកគាត់។ លើសពីនោះសមត្ថកិច្ចបានបណ្តែតបណ្តោយ និងឃុបឃិតគ្នាជាមួយនឹងក្រុមហ៊ុន កាប់បំផ្លាញព្រៃឈើ និងទិញលក់យ៉ាងអនាធិបតេយ្យ។
អ្នកស្រី ទុំ បញ្ជាក់ថា៖ «យើងមិនសុខចិត្តទេ ព្រៃយើងសោះមកត្រួតត្រាក្បាលយើងម៉េចកើត។ មិនបាច់ចែកអំណោយសារុង ប៊ីចេងអីទេ ឲ្យតែមានព្រៃឈើទៅពួកខ្ញុំរស់បានហើយ។ បើមិនដោះស្រាយទេ មានតែងាប់ ព្រោះយើងមិនចេះស៊ីឈ្នួលគេ សុំទានគេទេ»។
តំណាងប្រជាពលរដ្ឋបានទាមទារឲ្យរដ្ឋាភិបាលដកហូតអាជ្ញាប័ណ្ណពីក្រុមហ៊ុន វីឡា ឌីវិលុបមែន នោះជាបន្ទាន់ ដើម្បីប្រគល់ដីឲ្យពួកគាត់វិញ។ លើសពីនោះពួកគាត់ក៏ទាមទារឲ្យក្រុមហ៊ុនសងថ្លៃដើមជ័រទឹកដែលក្រុមហ៊ុនបានកាប់តាមតម្លៃទីផ្សារផងដែរ។
ពាក្យបណ្តឹងដែលដាក់ទៅតុលាការនិងខុទ្ធកាល័យលោកនាយករដ្ឋមន្រ្តីបានឲ្យដឹងថា ដើមជ័រទឹកសរុបរបស់ប្រជាពលរដ្ឋដែលបានបាត់បង់មានចំនួនពីរលានដើម ហើយពួកគាត់ទាមទារសំណង ១ លានរៀលក្នុងមួយដើម ដែលសរុបទៅមានតម្លៃទាំងអស់ចំនួន ៥០០ លានដុល្លារ។
លោក ធន សារ៉ាយ ប្រធានអង្គការអាដហុក បានថ្លែងក្នុងឱកាសនោះថា សហគមន៍ ឡៅកា នេះជាសហគមន៍លើកដំបូង ដែលបានដាក់ពាក្យបណ្តឹងដើម្បីទាមទារឲ្យរដ្ឋាភិបាលលុបចោលដីសម្បទានសេដ្ឋកិច្ច បន្ទាប់ពីរដ្ឋាភិបាលបានដកហូតដីសម្បទានពីក្រុមហ៊ុនចំនួន ១៩ មកវិញ ក្រោមហេតុផលថា មិនបានអភិវឌ្ឍន៍។
លោក សារ៉ាយ បញ្ជាក់ថា៖ «យើងមិនទាន់ឃើញរដ្ឋាភិបាលលុបចោលដីសម្បទានដែលបានរំលោភដីពលរដ្ឋនិងបណ្តេញចេញដោយបង្ខំនិងបំផ្លាញព្រៃឈើ និងទំនៀមទម្លាប់នោះទេ»។ លោកបានកត់សម្គាល់ថា ការរំលោភបំពាននោះ គឺវាមិនគោរពតាមស្មារតីនៃច្បាប់ និងអនុក្រឹត្យស្តីពីដីសម្បទានសេដ្ឋកិច្ចដែលតម្រូវឲ្យក្រុមហ៊ុនកាត់ផលប៉ះពាល់ចេញ។ អង្គការអាដហុក នឹងផ្តល់មេធាវីឲ្យប្រជាពលរដ្ឋ ដើម្បីដាក់ស្នើទៅតុលាការឲ្យចេញដីការរក្សាការពារបន្ទាន់មួយ ដើម្បីទប់ស្កាត់ការរំលោភបំពានបន្ថែមទៀត។
លោក យឹម លុច អភិបាលរង ខេត្តមណ្ឌលគិរី បានថ្លែងថា លោកអត់មានជាប់ពាក់ព័ន្ធជាមួយនឹងក្រុមហ៊ុន វីឡា ឌីវិលុបមេន នេះទេ ដោយសារតែវាជាក្រុមហ៊ុនរបស់ភរិយាលោកនិងមិត្តភក្តិ។ ទោះយ៉ាងណាលោកបានបដិសេធចំពោះការចោទប្រកាន់របស់ប្រជាសហគមន៍។
លោកបញ្ជាក់ថា៖ «ការប្តឹងវាជាសិទ្ធិរបស់ពលរដ្ឋ ហើយបើរដ្ឋាភិបាលអំពាវនាវឲ្យមានការវិនិយោគ ហើយបែរជាទៅដកកៅស៊ូនោះចោលវិញ វាជារឿងរបស់រដ្ឋាភិបាល បើរដ្ឋាភិបាលជឿលើប្រជាពលរដ្ឋប៉ុន្មាននាក់ហ្នឹងនោះ»។ លោកបានអះអាងថា ក្រុមហ៊ុនបានដោះស្រាយសំណងអស់ហើយ នៅមុនពេលធ្វើការដាំដុះ។
លោក ឈាង ភក្តី តំណាងក្រុមហ៊ុន វីឡា ឌីវិលុបមេន ជាប់រវល់មិនអាចធ្វើអត្ថាធិប្បាយបានទេ កាលពីម្សិលមិញ៕