Sat, 1 November 2014
ហ៊ គឹមសាយ
ភ្នំពេញប៉ុស្តិ៍
ស្តង់តូចៗដែលមានដំបូលពណ៌ ក្រហម ខៀវ លឿង ចម្រុះគ្នាបានចាប់ផ្តើមលេចចេញជារូបរាងឡើងកាន់តែច្រើននៅលើទីវាលនៃមជ្ឈមណ្ឌលកម្សាន្តកោះពេជ្រនាពេលនេះ។ នៅជ្រុងផ្នែកខាងឆ្វេងនៃមជ្ឈមណ្ឌលកម្សាន្តកោះពេជ្រដែលមិនទាន់មានអគារ និងទីតាំងធ្វើអាជីវកម្មនៅឡើយ បានចាប់ផ្តើមក្លាយជាកន្លែងដែលមានស្តង់សម្រាប់លក់អីវ៉ាន់ព័ទ្ធជុំវិញ។
នារសៀលថ្ងៃរៀបលិចកាលពីថ្ងៃសុក្រ បុរសមាឌធំពី ៥ ទៅ ៦ នាក់ហាក់មានភាពសកម្មខ្លាំងក្នុងការរៀបចំដំឡើងឆាកតន្ត្រីមួយដែលមើលទៅទំនងជានឹងក្លាយជាឆាកតន្ត្រីខ្នាតធំជាងអ្វីដែលធ្លាប់មាននាចុងសប្តាហ៍។ នេះជាទីតាំងនៃឆាកតន្ត្រីរបស់ស្ថានីយទូរទស្សន៍បាយ័នដែលហ៊ុមព័ទ្ធជុំវិញដោយស្តង់លក់អីវ៉ាន់រាប់រយស្តង់សម្រាប់តាំងបង្ហាញផលិតផលចម្រុះគ្នាជាច្រើនប្រភេទ។
លោក ទិត ថាវរិទ្ធ អគ្គនាយករងនៃស្ថានីយទូរទស្សន៍បាយ័នបាននិងកំពុងត្រួតពិនិត្យការរៀបចំឆាកតន្ត្រីនេះ ហើយបានឲ្យកាសែត កម្ពុជាចុងសប្តាហ៍ ដឹងថា ឆាកតន្ត្រីនេះត្រូវបានរៀបចំរយៈពេលបីថ្ងៃ និងរៀបចំជាពិសេសសម្រាប់ព្រះរាជពិធីបុណ្យអុំទូក បណ្តែតប្រទីប សំពះព្រះខែ ដែលនឹងធ្វើឡើងនៅថ្ងៃ ទី៥ ដល់ ថ្ងៃ ទី៧ វិច្ជិកា។
លោកបន្តថា៖ «យើងបានធ្វើឆាកតន្ត្រីដែលមានទីតាំងធំជាងមុនដែលអាចផ្ទុកមនុស្សបានច្រើនម៉ឺននាក់។ ប្រជាជននឹងចូលទស្សនាទីក្រុងក្នុងពិធីអុំទូកនឹងមានដល់ខ្ទង់លាននាក់ ហើយនេះគឺជាឱកាសយ៉ាងល្អមួយសម្រាប់ក្រុមពាណិជ្ជករក្នុងការដាក់តាំងផលិតផលរបស់គេដើម្បីការផ្សព្វផ្សាយ»។
បន្ទាប់ពីការខកខានមិនមានពិធីអុំទូកបីឆ្នាំជាប់ៗគ្នាគិតចាប់ពីឆ្នាំចុងក្រោយ ២០១០ ដោយសារការរត់ជាន់គ្នាដែលបណ្តាលឲ្យមានអ្នកស្លាប់រហូតទៅដល់ ៣៥៣ នាក់និងជាង ៣០០ នាក់ផ្សេងទៀតរងរបួសចំណែកឯ ការប្រារព្ធពិធីបុណ្យអុំទូកវិញនៅឆ្នាំនេះត្រូវបានក្រុមអាជីវករទាំងខ្នាតតូច និង ខ្នាតធំរំពឹងថា នឹងទាក់ទាញប្រជាជនកម្ពុជាតាមបណ្តាខេត្តឲ្យចូលទស្សនា ទីក្រុងភ្នំពេញ ច្រើនជាងកាលប្រារព្ធពិធីបុណ្យអុំទូកនាឆ្នាំកន្លងទៅ។ នៅឆ្នាំដំបូងនៃការប្រារព្ធពិធីឡើងវិញនេះត្រូវបានគេព្យាករថា នឹងទាក់ទាញអ្នកចូលទស្សនាច្រើនជាងមួយលាននាក់។
ទីវាលនៅលើកោះពេជ្រ ដែលធ្លាប់តែជាទីតាំងសម្រាប់ចតយានយន្ត ឬទីវាលទំនេរបានចាប់ផ្តើមក្លាយជាទីតាំងសម្រាប់ក្រុមហ៊ុនលក់ផលិតផលនានាតាំងនៅដើម្បីដាក់បង្ហាញ។ គ្រប់ទីតាំងអាជីវកម្មដែលជាគោលដៅសម្រាប់មនុស្សដើរកម្សាន្តក្នុងពិធីបុណ្យអុំទូកត្រូវបានរំពឹងថា នឹងមានអ្នកដើរកម្សាន្តច្រើនកុះករ។
បើតាមការសាកសួររបស់កាសែត កម្ពុជាចុងសប្តាហ៍ ម្ចាស់អាជីវកម្មទាំងតូច ទាំងធំបានអះអាងថា ពួកគេបានត្រៀមខ្លួនបង្កើនការផលិត និងបង្កើនការផ្គត់ផ្គង់សេវាកម្ម រួចជាស្រេចដើម្បីឆ្លើយតបនឹងកំណើនតម្រូវការទិញផលិតផលហូបចុក សេវាកម្មកម្សាន្ត និងផលិតផលនានា ដោយសារថា វានឹងកើនឡើងខ្លាំងក្នុងអំឡុងពិធីបុណ្យអុំទូក។
តាមលោក សេរី រតនា អាយុ ២៣ឆ្នាំ ដែលជាម្ចាស់ហាងលក់ចំណីអាហារ ជំនោរធម្មជាតិសាខាទីពីរមានទីតាំងនៅកោះពេជ្របានឲ្យដឹងថា លោកបានស៊ើបសួរមិត្តភក្តិ អ្នកនៅតាមបណ្តាខេត្ត និងធ្វើការអង្កេតពីយោបល់របស់ប្រជាជននៅតាមបណ្តាញទំនាក់ទំនងសង្គម Facebook ហើយបានស្វែងយល់ថា មនុស្សភាគច្រើននឹងចូលរួមដើរកម្សាន្តក្នុងពីធីបុណ្យអុំទូកនាឆ្នាំនេះ ហើយពួកគេនឹងចំណាយលុយច្រើនជាងថ្ងៃសម្រាកចុងសប្តាហ៍ធម្មតាដើម្បីចូលរួមអបអរពិធីបុណ្យប្រពៃណីដ៏ធំរបស់កម្ពុជាមួយនេះ។
លោកបានថ្លែងថា៖ «ខ្ញុំបានត្រៀមអីវ៉ាន់សម្រាប់លក់ច្រើនជាងមុនពីរបីដង ហើយត្រៀមខ្លះផ្សេងទៀតនៅកន្លែងធំ [សាខាទីមួយ] អ៊ីចឹងបើមានអតិថិជនច្រើនយើងអាចធ្វើវាបានទាន់ពេល»។
កាលពីពេលពិធីបុណ្យអុំទូកត្រូវបានប្រារព្ធឡើងកាលពីឆ្នាំកន្លងទៅ ទីក្រុងភ្នំពេញ បានក្លាយជាទីប្រជុំក្រុមមនុស្សដ៏មមាញឹកមួយ។ ស្ទើរគ្រប់ច្រកល្ហកនៃទីប្រជុំជនក្នុងទីក្រុងភ្នំពេញមានការកកស្ទះ។ មនុស្សម្នាជាច្រើនឈរតម្រៀបគ្នា បន្លាស់ទីយឺតៗពីកន្លែងមួយទៅកន្លែងមួយទៀតដោយសារភាពកកស្ទះ។
តំបន់គោលដៅកម្សាន្តក្នុងក្រុងតាមជួរមាត់ទន្លេ និងតំបន់ជុំវិញព្រះបរមរាជវាំងតែងមានអ្នកដើរកម្សាន្តណែនណាន់តាន់តាប់។ ផ្សារទំនើបផ្សេងៗ មជ្ឈមណ្ឌលកម្សាន្តកោះពេជ្រ ផ្សារទំនើបអ៊ីអន ដែលទើបបើកថ្មី នឹងក្លាយជាគោលដៅកម្សាន្តចម្បងរបស់ប្រជាជនចូលកម្សាន្តក្នុងពិធីបុណ្យអុំទូក។
កាសែតកម្ពុជាចុងសប្តាហ៍ បានព្យាយាមសាកសួរតំណាងផ្សារទំនើបអ៊ីអនតាមអ៊ីមែល និងទូរស័ព្ទ តែមិនមានការឆ្លើយតបទាន់ពេលទេនៅពេលអត្ថបទត្រូវបានបញ្ជូនទៅរោងពុម្ព។ យោងតាមទិន្នន័យកន្លងមក នៅពេលផ្សារទំនើបអ៊ីអនបានបើកដំណើរការក្រៅផ្លូវការកាលពីចុង ខែមិថុនា ផ្សារទំនើបដែលចំណាយទឹកប្រាក់សាងសង់អស់ ២០៥ លានដុល្លារមួយនេះបានទទួលចំនួនភ្ញៀវចូលទស្សនា និងដើរទិញអីវ៉ាន់ ១០ ម៉ឺននាក់ក្នុងមួយថ្ងៃៗ។
ផ្សារទំនើបសូរិយា ដែលជាផ្សារទំនើបធំជាងគេទីពីរនៅភ្នំពេញគឺជាកន្លែងគោលដៅសំខាន់មួយសម្រាប់អ្នកដើរកម្សាន្តពេលពិធីបុណ្យអុំទូកកាលពីមិនទាន់មានវត្តមានផ្សារអ៊ីអន។ អ្នកស្រី ជា សុខហៀក អ្នកគ្រប់គ្រងទូទៅផ្សារទំនើប សូរិយា បានឲ្យកម្ពុជាចុងសប្តាហ៍ ដឹងថា កាលពីឆ្នាំដែលកម្ពុជាប្រារព្ធពិធីបុណ្យអុំទូកឆ្នាំកន្លងទៅ ផ្សារទំនើបសូរិយា មានភ្ញៀវចូលទស្សនាពី ៧ ទៅ ១០ ម៉ឺននាក់ក្នុងមួយថ្ងៃៗ។ ផ្សារនេះមានអ្នកចូលទស្សនាប្រមាណ ១ ម៉ឺននាក់សម្រាប់ថ្ងៃធ្វើការ និងឡើងដល់ ២ ម៉ឺននាក់នៅថ្ងៃចុងសប្តាហ៍។
បើទោះបីជា ទីក្រុងភ្នំពេញ មានតំបន់ទាក់ទាញប្រជាជនចូលកម្សាន្តច្រើនជាងមុនឬមានវត្តមានផ្សារទំនើបអ៊ីអនក្តី អ្នកស្រី សុខហៀក បានអះអាងថា ផ្សារទំនើបសូរិយា នឹងមានអ្នកចូលទស្សនាកុះករនៅអំឡុងពីធីបុណ្យអុំទូកខាងមុខ។ អ្នកស្រីបានត្រៀមបន្ថែមតូបលក់រាយជាង ៣០ បន្ថែមទៀតនៅបរិវេណខាងមុខផ្សារដើម្បីឆ្លើយតបកំណើនតម្រូវការ ហើយនឹងមានរៀបចំកម្មវិធីកម្សាន្តនិងការប្រគំតន្ត្រីដើម្បីទាក់ទាញភ្ញៀវផងដែរ។
អ្នកស្រីបានលើកឡើងថា៖ «យើងបានបន្ថែមបុគ្គលិក និងសន្តិសុខគ្រប់កន្លែងគ្រប់ជាន់ដើម្បីសម្រួលការដើរកម្សាន្តរបស់ភ្ញៀវនិងរក្សាសុវត្ថិភាព»។
ពិធីបុណ្យអុំទូកនៅលើកចុងក្រោយកាលពី ឆ្នាំ២០១០ បានបញ្ចប់ទៅដោយក្តីសោកសង្រេងជាពន់ពេកដោយសារព្រឹត្តិការណ៍ជាន់គ្នាស្លាប់នៅលើស្ពានឆ្លងទៅកោះពេជ្រដែលធ្វើឲ្យមនុស្ស ៣៥៣ នាក់បាត់បង់ជីវិត។ បទពិសោធដ៏ឈឺចាប់នេះបានក្លាយជាកណ្តឹងដើម្បីដាស់តឿនអាជ្ញាធរមានសមត្ថកិច្ច និងអ្នករៀបចំកម្មវិធីនានាបង្កើនការប្រុងប្រយ័តដើម្បីចៀសវាងបញ្ហាផ្សេងៗ។
លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសបានឲ្យដឹងថា មន្ត្រីកងរាជអាវុធហត្ថ ២០០០ នាក់ត្រូវត្រៀមខ្លួនសម្រាប់ថែរក្សាសណ្តាប់ធ្នាប់សន្តិសុខ នៅតំបន់កន្លែងប្រារព្ធពិធីបុណ្យអុំទូក និងជួយសហការជាមួយកម្លាំងនគរបាលជាតិដើម្បីរៀបចំចរាចរណ៍នៅរាជធានីភ្នំពេញ។ ចំណែក កម្លាំងរាជអាវុធហត្ថចំនួន ១០០០ នាក់ជាកម្លាំងត្រៀមសង្គ្រោះបឋម ក្នុងករណីមានឧបទ្ទវហេតុណាមួយកើតឡើង។
លោកបានថ្លែងថា៖ «នេះជាឆ្នាំបើកឆាកដំបូង [ក្រោយការលុបចោលពិធីបុណ្យអុំទូកអស់ពេលបីឆ្នាំ] ទើបយើងត្រូវតែធ្វើការប្រុងប្រយ័ត្នឲ្យបានហ្មត់ចត់ដោយផ្ដោតការយកចិត្តទុកដាក់លើសន្តិសុខ សុវត្ថិភាពដល់អ្នកចូលរួមពិធីបុណ្យឲ្យមែនទែន។ យើងការពារកុំឲ្យមានព្រឹត្តិការណ៍ចាស់ជាន់ដានបន្តទៀត»៕