ដោយ ម៉ៅ សុធានី
2014-11-01
RFA
កុមារដែលរៀននៅសាលារបស់អង្គការ ខែរីង ហ្វរ ខេមបូឌា (Caring for Cambodia)។ Photo courtesy of Caring for Cambodia
អង្គការ ខែរីង ហ្វរ ខេមបូឌា (Caring for Cambodia) មានជំនឿថា ការផ្តល់កម្មវិធីសិក្សាអប់រំត្រឹមត្រូវតាមកម្រិតស្តង់ដារអន្តរជាតិដល់កុមារ គឺជាវិធីសាស្ត្រដ៏ល្អមួយសម្រាប់ធ្វើឲ្យជីវិតរស់នៅរបស់ពួកគេមានភាពល្អប្រសើរទៅថ្ងៃអនាគត។
បច្ចុប្បន្ន អង្គការ ខែរីង ហ្វរ ខេមបូឌា បានបង្កើតសាលាជាច្រើននៅក្នុងខេត្តសៀមរាប ដែលមានថ្នាក់រៀនស្អាតល្អ អនាម័យខ្ពស់ បំពាក់ដោយសម្ភារៈ និងឧបករណ៍ទំនើបៗសម្រាប់កុមារ និងយុវជន ចាប់ពីថ្នាក់មត្តេយ្យរហូតដល់កម្រិតវិទ្យាល័យ។
អង្គការ ខែរីង ហ្វរ ខេមបូឌា គឺជាអង្គការក្រៅរដ្ឋាភិបាលមួយ ដែលមានបេសកកម្មពិសេស គឺផ្តល់ការអប់រំដល់កុមារ និងបង្ហាត់ហ្វឹកហ្វឺនគ្រូបង្រៀនតាមកម្មវិធីសិក្សាស្តង់ដារអន្តរជាតិ រួមមាន ខាងផ្នែកភាសាអង់គ្លេស ព័ត៌មានវិទ្យា វិទ្យាសាស្ត្រ សិល្បៈ និងកីឡា ជាដើម។ បច្ចុប្បន្ន អង្គការនេះបានសង់សាលារៀនចំនួន ២១កន្លែង ចាប់ពីថ្នាក់មត្តេយ្យរហូតដល់កម្រិតវិទ្យាល័យ និងមានសិស្សចូលរៀនចំនួនជាង ៦.៤០០នាក់នៅទូទាំងខេត្តសៀមរាប។
អង្គការនេះបង្កើតឡើងដំបូងកាលពីឆ្នាំ២០០៣ ដោយ អ្នកស្រី ហ្យេមម៉ី អាមេលីយ៉ូ (Jamie Amelio) ជនជាតិអាមេរិកាំង រស់នៅរដ្ឋតិចសាស (Texas) ដែលបានទៅទស្សនាប្រាសាទអង្គរវត្តជាលើកទី១ កាលពីឆ្នាំ២០០៣។ នាពេលនោះ អ្នកស្រីបានឃើញក្មេងស្រីសុំទានម្នាក់អាយុ ៩ឆ្នាំ ក៏មានចិត្តអាណិតអាសូរដែលពុំបានទៅរៀនសូត្រដូចកុមារដទៃទៀត ដោយសារក្រុមគ្រួសារមានជីវភាពរស់នៅទីទាល់ក្រ។ ប្រមាណជា ៣សប្ដាហ៍ក្រោយមក អ្នកស្រី ហ្យេមម៉ី បានប្ដេជ្ញាចិត្តបង្កើតជាអង្គការមួយ សម្រាប់ផ្តល់ការអប់រំពិសេសដល់កុមារក្រីក្រ ដោយដាក់ឈ្មោះថា អង្គការ ខែរីង ហ្វរ ខេមបូឌា។
សមាជិកក្រុមប្រឹក្សាភិបាលម្នាក់នៃអង្គការ ខែរីង ហ្វរ ខេមបូឌា ដែលមានជំនាញខាងវិស័យអប់រំនៅសហរដ្ឋអាមេរិក អ្នកស្រី លីហ្ស ឃីង (Liz King) មានប្រសាសន៍ប្រាប់វិទ្យុអាស៊ីសេរី តាមទូរស័ព្ទថា អ្នកស្រីបានចូលរួមក្នុងកម្មវិធីសិក្សារបស់អង្គការនេះប្រមាណជា ១០ឆ្នាំមកហើយ នៅពេលដែលអ្នកស្រី និងស្វាមី ធ្វើការ និងរស់នៅក្នុងប្រទេសសិង្ហបុរី (Singapore)។
អ្នកស្រី លីហ្ស ឃីង បន្តថា មន្ត្រីជាន់ខ្ពស់ក្រសួងអប់រំបានសរសើរចំពោះកម្មវិធីសិក្សារៀនសូត្ររបស់អង្គការមួយនេះ បន្ទាប់ពីបានមកពិនិត្យ និងសង្កេតការណ៍ក្នុងថ្នាក់រៀននីមួយៗ ដោយឃើញមានការរៀបចំស្អាតល្អ មានសៀវភៅគ្រប់ប្រភេទ និងមានឧបករណ៍ទំនើបៗសម្រាប់សិស្សរៀនសូត្រក្នុងថ្នាក់៖ «បកប្រែសម្រួល សាលារបស់យើងមានប្រភពធនធានគ្រប់គ្រាន់។ សម្រាប់សិស្សវិទ្យាល័យ យើងមានថ្នាក់ពិសោធន៍សម្រាប់វិទ្យាសាស្ត្រ សម្រាប់កុំព្យូទ័រ។ សាលាយើងមានតែនៅខេត្តសៀមរាប ប៉ុណ្ណោះ យើងកំពុងអភិវឌ្ឍសាលាយើងជាសាលារៀនគំរូ។ យើងផ្តល់ការហ្វឹកហ្វឺនដល់គ្រូបង្រៀននៅប្រទេសសិង្ហបុរី ដើម្បីឲ្យពួកគេបានឃើញពីវិស័យអប់រំនៅប្រទេសនេះ។ សព្វថ្ងៃនេះ យើងកំពុងប្រែក្លាយសាលាយើងជាសាលាគំរូមួយនៅប្រទេសកម្ពុជា»។
រហូតមកដល់បច្ចុប្បន្ន អង្គការនេះមានអ្នកផ្តល់ថវិកាគាំទ្រជាង ៤ពាន់នាក់ នៅទូទាំងពិភពលោក និងមានអ្នកស្ម័គ្រចិត្តជាង ៤០០នាក់មកពី ៣៥ប្រទេស។ ក្នុងថ្នាក់រៀននីមួយៗចាប់ពីថ្នាក់បឋមសិក្សាឡើងទៅ មានបំពាក់ដោយសម្ភារៈ និងឧបករណ៍ទំនើបៗ។ អង្គការនេះ ផ្តល់ការហ្វឹកហ្វឺនផ្នែកគរុកោសល្យ និងជំនាញដល់គ្រូបង្រៀន ផ្តល់ឯកសណ្ឋានសាលា ផ្តល់ការថែរក្សាសុខភាព និងអនាម័យ ព្រមទាំងផ្តល់កង់សម្រាប់សិស្សដែលរស់នៅឆ្ងាយពីសាលា ដើម្បីអាចជិះទៅរៀនបាន។ អង្គការនេះ ក៏មានផ្តល់ម្ហូបអាហារពីរដងក្នុងមួយថ្ងៃ គឺអាហារពេលព្រឹក និងថ្ងៃត្រង់ដល់សិស្សសាលាមត្តេយ្យ។ បន្ថែមពីនេះ ក៏មានក្រុមគ្រូពេទ្យធ្មេញ (ទន្តពេទ្យ) និងគ្រូពេទ្យជំនាញទូទៅ សម្រាប់ត្រួតពិនិត្យ និងព្យាបាលសុខភាពដល់សិស្សសាលាផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- សិស្សប្រឡងជាប់បាក់ឌុបលើកទី២មានចំនួនជាង១ម៉ឺននាក់តិចជាងលើកទី១
- តើក្រសួងអប់រំអាចលុបបំបាត់បញ្ហាគ្រូទារប្រាក់ពីសិស្សសាលាបឋមសិក្សាបានដែរទេ?
- រដ្ឋមន្ត្រីក្រសួងអប់រំអះអាងថាសិស្សប្រឡងបាក់ឌុបលើកទី២ជាប់តិចជាងលើកទី១
- អតីតនិស្សិតទទួលអាហារូបករណ៍ទៅសិក្សានៅសហរដ្ឋអាមេរិកចែករំលែកបទពិសោធន៍
- សមាគមគ្រូបង្រៀននិងសង្គមស៊ីវិលនឹងរៀបចំពិធីអបអរខួបនៃកិច្ចព្រមព្រៀងទីក្រុងប៉ារីស
- អឺរ៉ាប្រកាសជ្រើសរើសបេក្ខជន១៤៣រូបសម្រាប់កម្មវិធីរដ្ឋសភាយុវជនត្រាប់
- កម្ពុជាមានភាពល្អប្រសើរជាង១០ឆ្នាំមុនក្នុងការប្រឆាំងនឹងភាពស្រេកឃ្លាន
- ក្រុមយុវជននាំគ្នាឧបត្ថម្ភសម្ភារៈសិក្សានិងចំណីអាហារដល់កុមារក្រីក្រក្នុងខណ្ឌមានជ័យ
- បេក្ខជនប្រឡងបាក់ឌុបលើកទី២ជាង៧ពាន់នាក់បោះបង់ចោលការប្រឡង