ដោយ៖ ខាន់ លក្ខិណា
ថ្ងៃចន្ទ ទី10 វិច្ឆិកា 2014
http://vodhotnews.com
ស្តាប់សំឡេង៖ |
ចម្លងទុក |
អាជ្ញាធរក្រុងព្រះសីហនុនៅព្រឹកថ្ងៃចន្ទនេះ បានដាក់កម្លាំងសមត្ថកិច្ចប្រមាណ២០០នាក់ ចុះរុះរើផ្ទះប្រជាពលរដ្ឋនៅតំបន់ក្បាលឆាយ ដោយចោទថាប្រជាពលរដ្ឋទាំងនោះរស់នៅលើដីរដ្ឋដោយខុសច្បាប់។
ប្រជាពលរដ្ឋនៅតំបន់ក្បាលឆាយអ្នកស្រី ចិន ចិន្តា ឲ្យ VOD ដឹងនៅព្រឹកថ្ងៃចន្ទ ទី១០ ខែវិច្ឆិកានេះថា អភិបាលក្រុងព្រះសីហនុ លោក ជិន សារិន បានដឹកនាំសមត្ថកិច្ចចម្រុះខេត្តចំនួនប្រមាណ២០០នាក់ ប្រដាប់ដោយអាវុធ និងមានគ្រឿងចក្រមកជាមួយផង បម្រុងមករុះរើផ្ទះប្រជាពលរដ្ឋដែលរស់នៅលើដីតំបន់ក្បាលឆាយ ដោយចោទថាពួកគាត់រស់នៅលើដីរដ្ឋដោយខុសច្បាប់។ អ្នកស្រីបន្តថា «ច៎ា! វាបម្រុងយកអាត្រាក់មកឈូសផ្ទះប្រជាជនតែម្តងបង។ ច៎ា! មួយគ្រឿង ឥឡូវវាត្រៀមហើយអស់ហើយ វាចាំតែដល់មេបញ្ជាការវាបញ្ជាមកថា ចាប់ផ្តើមវាធ្វើតែម្តង។ ឥឡូវពួកខ្ញុំក៏ត្រៀមដែរ ពួកខ្ញុំត្រៀមសាំង ត្រៀមអីអស់ហើយ ខ្ញុំថាតែហ៊ានចូលឈូសផ្ទះបងប្អូនខ្ញុំណាមួយខ្ញុំដុតហើយណា។ អត់ទេ ដុតអាត្រាក់វាចោលតែម្តង ព្រោះអីវាធ្វើពេកហើយ វាធ្វើបាបប្រជាជនពេក»។
VOD មិនអាចទាក់ទងអភិបាលក្រុងព្រះសីហនុ លោក ជិន សារិន បានទេ។ ប៉ុន្តែអភិបាលរងខេត្តព្រះសីហនុ លោក ស្រ៊ុន ស្រ៊ន់ ឲ្យ VOD ដឹងនៅព្រឹកនេះថា មានការដាក់កងកម្លាំងសមត្ថកិច្ចចម្រុះទៅទីនោះមែន ប៉ុន្តែមិនមែន២០០នាក់ ដូចប្រជាពលរដ្ឋលើកឡើងនោះទេ ហើយក៏មិនមានគ្រឿងចក្រអ្វីដែរ។ លោកថា ការដាក់កម្លាំងសមត្ថកិច្ចចម្រុះនេះ គឺដើម្បីការពារព្រៃឈើ កុំឲ្យមានការរុករានបន្តទៀតតែប៉ុណ្ណោះ មិនមែនដាក់មករុះរើផ្ទះប្រជាពលរដ្ឋនោះទេ។ លោកបញ្ជាក់ថា «ឥឡូវនេះយើងអត់មានចុះមករុះរើទេ យើងកំពុងតែដាក់កម្លាំងដើម្បីការពារព្រៃ ការរុករានទន្ទ្រានថ្មី ព្រោះយើងបានជូនដំណឹងច្រើនលើកច្រើនសា ប៉ុន្តែមើលទៅបងប្អូនគាត់អត់ព្រមស្តាប់ នៅកាប់ព្រៃ នៅតែរុករានព្រៃបន្តទៀត។ ថ្ងៃនេះឯកឧត្តមអភិបាលលោកបានបញ្ជា ដើម្បីដាក់កម្លាំងការពារ កុំឲ្យមានការរុករានទៀត»។
លោក ស្រ៊ុន ស្រ៊ន់ អះអាងថា អភិបាលខេត្តព្រះសីហនុ នឹងរៀបចំដីសម្បទានសង្គមកិច្ចឲ្យប្រជាពលរដ្ឋនៅតំបន់នោះឲ្យបានសមរម្យ។ លោកថាកុំឲ្យប្រជាពលរដ្ឋមានការព្រួយបារម្ភចំពោះបញ្ហាទាំងនេះ។
អ្នកសម្របសម្រួលអង្គការអាដហុក ប្រចាំខេត្តព្រះសីហនុ អ្នកស្រី ជាប សុធារី ឲ្យ VOD ដឹងនៅព្រឹកថ្ងៃនេះដែរថា អាជ្ញាធរខេត្តព្រះសីហនុបានដាក់កម្លាំងសមត្ថកិច្ច ៣០នាក់ទៅតំបន់ក្បាលឆាយ ដើម្បីការពារក្រែងមានជនខិលខូចលួចកាប់ព្រៃ ដើម្បីយកដីជាកម្មសិទ្ធិ និងលក់ដូរបន្តទៅឲ្យប្រជាពលរដ្ឋ។ អ្នកស្រីមានប្រសាសន៍ថា «ខ្ញុំយល់ថា អត់មានខុសអីទេ ពីដីកន្លែងហ្នឹង ដីសាធារណៈរបស់រដ្ឋ គ្រាន់តែដាក់កម្លាំងសមត្ថកិច្ចហ្នឹងចង់និយាយថា ដើម្បីហាមឃាត់កុំឲ្យជនខិលខូចហ្នឹង ចូលទៅទន្ទ្រានដើមឈើ កាប់អាឈើព្រោះអីសកម្មភាពទាំងអស់ហ្នឹង អាជ្ញាធរគាត់ថាធ្វើតែពេលយប់»។
កាលពីថ្ងៃទី១ ខែវិច្ឆិកា ឆ្នាំ២០១៤ សមត្ថកិច្ចចម្រុះខេត្តព្រះសីហនុ ប្រដាប់ដោយអាវុធជិត១០០នាក់ បានឆ្មក់ចូលរុះរើផ្ទះប្រជាពលរដ្ឋអស់៨ខ្នងផ្ទះ។ ហើយថ្ងៃទី០៤ ខែវិចិ្ឆកា កន្លងទៅថ្មីៗនេះ អភិបាលក្រុងព្រះសីហនុ បានចេញសេចក្ដីជូនដំណឹងឲ្យពលរដ្ឋរុះរើផ្ទះចំនួន២៨ខ្នងផ្ទះបន្ថែមទៀត ចេញពីដីទំហំ៥៥ហិកតានៅតំបន់ក្បាលឆាយ ដែលអាជ្ញាធរចាត់ទុកថា រស់នៅលើដីរដ្ឋដោយខុសច្បាប់ និងប៉ះពាល់តំបន់ទឹកស្អាត៕
សូមសរសេរមកកញ្ញា ខាន់ លក្ខិណា តាមរយៈ khanleakhena@yahoo.com