ដោយ៖ ទូច សុខា
ថ្ងៃព្រហស្បតិ៍ ទី13 វិច្ឆិកា 2014
http://vodhotnews.com
សង្គមស៊ីវិលជាតិ និងអន្តរជាតិមួយចំនួនដែលធ្វើការលើបញ្ហាបរិស្ថាន សម្ដែងក្តីបារម្ភរបស់ខ្លួនជាថ្មី ពី ការសាងសង់ទំនប់វារីអគ្គិសនីដន សាហុង ដោយលើកឡើងថា រដ្ឋាភិបាលឡាវ និងក្រុមហ៊ុន Mega First នៅតែមានការតាំងចិត្តខ្ពស់ក្នុងការកសាងទំនប់នេះ ដោយមិនគិតពីលទ្ធផលនៃការពិគ្រោះយោបល់ ។
សេចក្តីថ្លែងការណ៍រួមរបស់ក្រុមអង្គការសង្គមស៊ីវិល អះអាងថា រដ្ឋាភិបាលឡាវ និងក្រុមហ៊ុន Mega First នៅតែបង្ហាញឥរិយាបថថា ខ្លួននឹងនៅតែបន្តគម្រោង ដន សាហុង ទោះបីជាកិច្ចពិភាក្សារបស់គណកម្មការទន្លេមេគង្គកំពុងធ្វើការពិគ្រោះយោបល់ទៅលើគម្រោងនេះក៏ដោយ ។
អង្គការសង្គមស៊ីវិលទាំងនោះរួមមាន សម្ព័ន្ធទន្លេកម្ពុជា (RCC) អង្គការអភិរក្សអន្តរជាតិ(CI) សហភាពអន្តរជាតិដើម្បីការអភិរក្សធម្មជាតិ(IUCN) និងមូលនិធិសកលសម្រាប់ធម្មជាតិ(WWF) ជាដើម ។
នាយកប្រតិបត្តិអង្គការវេទិកានៃអង្គការមិនមែនរដ្ឋាភិបាលស្តីពីកម្ពុជា លោក តឹក វណ្ណារ៉ា មានប្រសាសន៍ថា រដ្ឋាភិបាលឡាវ និងក្រុមហ៊ុន Mega First មានចិត្តមោះមុតក្នុងការសាងសង់ទមនប់វារីអគ្គិសនី ដន សាហុង ដោយមិនបានគិតពីផលប៉ះពាល់ដល់ប្រជាពលរដ្ឋដែលរស់នៅខ្សែទឹកខាងក្រោមនៃដងទន្លេមេគង្គ។ លោកបន្តថា កាសិក្សារបស់ក្រុមហ៊ុន Mega First ទៅលើផលប៉ះពាល់បរិស្ថាន និងសង្គម មិនមានលក្ខណៈគ្រប់គ្រាន់នៅឡើយទេ ព្រោះការសិក្សានេះ មិនបានសិក្សាឆ្លងព្រំដែនមកប្រទេសនៅតាមដងទន្លេមេគង្គនោះទេ។
លោកបន្ថែមថា «កន្លងមក ក៏ដូចជាឥឡូវនេះ មានការរិះគន់ពីអង្គការសង្គមស៊ីវិលនៅថ្នាក់តំបន់ នៅកម្ពុជា នៅថៃ នៅវៀតណាម និងនៅឡាវគាត់មិនរិះគន់ចំៗទេ ប៉ុន្តែគាត់រិះគន់ជាលក្ខណៈជាពិធីការជាបន្តបន្ទាប់ដែរ ក៏ភាគីឡាវមិនស្តាប់»។
ទាក់ទងទៅនឹងទំនប់វារីអគ្គិសនី ដន សាហុង នេះ អគ្គលេខាធិការរងនៃគណៈកម្មាធិការជាតិទន្លេមេគង្គកម្ពុជាលោក កុល វឌ្ឍនា មានប្រសាសន៍ថា លោក មិនបានដឹងច្បាស់ថាតើរដ្ឋាភិបាលឡាវកំពុងសាងសង់ទំនប់វារីអគ្គិសនីនេះឬយ៉ាងណាទេ ។ តែបើតាមព័ត៌មានក្នុងក្របខ័ណ្ឌគណៈកម្មការទន្លេមេគង្គ រដ្ឋាភិបាលឡាវមិនទាន់មានធ្វើសកម្មភាពអ្វីទេ ។
លោក កុល វឌ្ឍនា បន្ថែមថា នៅពេលឆាប់ៗខាងមុខនេះ នឹងមានក្រុមការងាររបស់លេខាធិការដ្ឋានគណៈកម្មការទន្លេមេគង្គ និងអ្នកជំនាញផ្សេងទៀt ចុះទៅធ្វើទស្សនកិច្ចទីតាំងគម្រោង ដែលបន្ទាប់ពីនោះនឹងបានព័ត៌មានពិតទាក់ទងទៅនឹងទំវារីអគ្គិសនីនេះ។
លោក កុល វឌ្ឍនា មានប្រសាសន៍ថា «ការសិក្សារបស់ក្រុមហ៊ុន Mega First ហ្នឹងគឺជាក្រុមហ៊ុនដែលភាគីឡាវជួលឲ្យធ្វើការសិក្សា អាហ្នឹងជាក្រុមហ៊ុនវិនិយោគរបស់គម្រោងហ្នឹង ។ អញ្ចឹង គេសិក្សាអាហ្នឹង ដើម្បីដាក់ឲ្យរដ្ឋាភិបាលឡាវពិនិត្យ និងដើម្បីយកមកដាក់ឲ្យគណៈកម្មការទន្លេមេគង្គមាន៤ប្រទេសហ្នឹងពិចារណា។ អញ្ចឹងអាហ្នឹងវាជាសិទ្ធិនៃរដ្ឋភាគីនៃកិច្ចព្រមព្រៀងមេគង្គទេ។ ប៉ុន្តែ ឯកសារទាំងនោះត្រូវបានដាក់ចូលក្នុងក្របខ័ណ្ឌមេគង្គ តាមរយៈ គេហៅថា ការពិគ្រោះយោបល់ជាមុន ហើយឯកសារនោះត្រូវបានលេខាធិការដ្ឋាននៃគណៈកម្មការទន្លេមេគង្គ កំពុងធ្វើ Review ពិនិត្យមើល ថាតើឯកសារដែលសិក្សាហ្នឹងមានលក្ខណៈគ្រប់ជ្រុងជ្រោយទេ ខ្វះខាតកន្លែងណា កន្លែងណាដែលពិតប្រដកជាក់ស្តែង និងកន្លែងណាគ្រាន់តែជាការសន្និដ្ឋាន»។
គួររំឭកថា រដ្ឋាភិបាលឡាវ បានចាប់ផ្តើមសាងសង់ទប់វារីអគ្គិសនីសាយ៉ាបូរីមួយនៅលើដងទន្លេមេគង្គកាលពីឆ្នាំ២០១២ ។ នៅពេលនេះ សង្គមស៊ីវិល ជឿថារដ្ឋាភិបាលឡាវកំពុងតែសាងសង់ទំបន់វារីអគ្គិសនីដន សហុង មួយទៀតនៅលើដងទន្លេមេគង្គ ទោះជាមានការរិះគន់ពីអង្គការជាតិ និង អន្តរជាតិពីផលប៉ះពាល់ក៏ដោយ។
កិច្ចព្រមព្រៀងទន្លេមេគង្គឆ្នាំ១៩៩៥ តម្រូវឲ្យមានការព្រមព្រៀងគ្នា ក្នុងចំណោមប្រទេសជាសមាជិកគណៈកម្មការទន្លេងមេគង្គ មុនពេលការសាងសង់ទំនប់វារីអគ្គិសនីនៅតាមដងទន្លេមេគង្គ៕
សូមសរសេរមកកាន់លោក ទូច សុខា តាមរយៈ sokha@vodhotnews.com