Fri, 14 November 2014
ហុង រស្មី
ភ្នំពេញប៉ុស្តិ៍
សៀមរាប: ភាពយន្ដហូលីវូដរឿង Tomb Raider សម្ដែងដោយនាងអេនជេលីណា ជោលី បានធ្វើឲ្យពិភពលោកស្គាល់ប្រាសាទបុរាណខ្មែរដែលមានក្បាច់ចម្លាក់ដ៏ល្អវិចិត្រព័ន្ធព័ទ្ធដោយឫសរុក្ខជាតិតូចធំ។
ភ្ញៀវទេសចរបរទេសជាច្រើនបានមកទស្សនាប្រាសាទតាព្រហ្មតាមរយៈភាពយន្ដដ៏ល្បីល្បាញផលិតក្នុងឆ្នាំ២០០១ ប៉ុន្តែពួកគេភាគច្រើនស្គាល់ប្រាសាទដែលនាង ជោលី ឈរលើខឿនក្បែរដើមឈើធំនេះថាជាប្រាសាទ Tomb Raider ទៅវិញ។
អ្នកស្រី អេនហ្ស៍ (Ange) បម្រើការងារនៅអង្គការ Mother of Nature និងក្រុមគ្រួសារ បានទស្សនារឿង Tomb Raider និងមានការស្ញប់ស្ញែងជាខ្លាំងចំពោះប្រាសាទបុរាណស្នាដៃបុព្វបុរសរបស់ខ្មែរ។
ដៃអង្អែលដើមឈើដុះព័ទ្ធបណ្ដើរ ស្ត្រីអាយុ៥៨ឆ្នាំរូបនេះបាននិយាយបណ្ដើរថា៖ «ខ្ញុំបានទស្សនាភាពយន្ដហូលីវូដនោះតាំងពីឆ្នាំ២០០១មកម្ល៉េះ។ ប៉ុន្ដែខ្ញុំគ្មានឱកាសបានឃើញទិដ្ឋភាពជាក់ស្ដែងនេះទេ។ ខ្ញុំតែងតែស្រមៃថា ថ្ងៃណាមួយ ខ្ញុំត្រូវទៅមើលផ្ទាល់នឹងភ្នែក»។
អំពីនាមប្រាសាទ អ្នកស្រីទទួលស្គាល់ថា៖ «ខ្ញុំពិបាកហៅឈ្មោះជាភាសាខ្មែរណាស់។ ខ្ញុំស្គាល់វាតាមរយៈភាពយន្ដ ដូច្នេះខ្ញុំតែងតែហៅវាថា ប្រាសាទ Tomb Raider»។
ទោះបីជាការហៅឈ្មោះថ្មីតាមសម្ដីភ្ញៀវទេសចរបានក្លាយជារឿងធម្មតាទៅហើយក្ដី ក៏ទម្លាប់នេះអាចនឹងបង្កជាវិបត្ដិផ្សេងៗនៅពេលក្រោយ។
ជាការរួមចំណែករក្សាអត្តសញ្ញាណជាតិ លោក សៀង វិចិត្រ ជាមគ្គុទេ្ទសក៍ទេសចរណ៍ ដែលកំពុងតែនាំភ្ញៀវទៅទស្សនាប្រាសាទតាព្រហ្ម បានលើកឡើងថា៖ «តាមពិតទៅ ភ្ញៀវខ្លះទម្លាប់និយាយប្រាប់គ្នាថា វាជាប្រាសាទ Tomb Raider ពីមាត់មួយទៅមាត់មួយទៀត។ ប្រហែលជាអ្នកដទៃ មិនចាប់អារម្មណ៍ទេ ប៉ុន្ដែក្នុងនាមខ្ញុំជាមគ្គុទេ្ទសក៍ទេសចរណ៍ម្នាក់ ខ្ញុំតែងតែឮពាក្យនេះនៅក្នុងត្រចៀកជានិច្ច»។
យ៉ាងណាមិញ មគ្គុទេ្ទសក៍ទេសចរណ៍រូបនេះលើកឡើងថា ការសម្ដែងភាពយន្ដ និងការហៅឈ្មោះប្រាសាទជាក់ស្ដែងគឺជារឿងពីរផ្សេងគ្នា ហើយលោកនៅតែបញ្ជាក់ប្រាប់ភ្ញៀវថា នោះជាប្រាសាទតាព្រហ្ម។
អ៊ឹង សុវិទ្ធី អនុប្រធាននាយកដ្ឋានផ្សព្វផ្សាយនៃអគ្គនាយកដ្ឋានអាជ្ញាធរអប្សារា បានពន្យល់ថា វាជាបាតុភូតកើតឡើងស្ទើរតែគ្រប់ប្រទេសនៅពេលមានព្រឹត្ដិការណ៍ធំៗ ដូចជា រឿងហូលីវូដ។ អាជ្ញាធរបានផ្សព្វផ្សាយតាមពីវិទ្យុ ទូរទស្សន៍ ខិត្តប័ណ្ណរហូតដល់ស្លាកសញ្ញា។ ក្រសួងវប្បធម៌ និងក្រសួងទេសចរណ៍ក៏បានណែនាំពីឈ្មោះប្រាសាទនីមួយៗផងដែរ។
លោកបានប្រដូចបាតុភូតស្រដៀងគ្នានេះដែរនៅប្រទេសថៃដោយសូម្បីតែជនជាតិថៃខ្លួនឯង ក៏ទទួលស្គាល់ទាអាំងភីម៉ៃ ល្បីជាងប្រាសាទភីម៉ៃរបស់ពួកគេទៅទៀត។
ចំពោះការអភិរក្សឈ្មោះប្រាសាទ លោកអនុប្រធាននាយកដ្ឋានរូបនេះ លើកឡើងថា មគ្គុទេ្ទសក៍ទេសចរណ៍ត្រូវប្រតិកម្មមុនគេ ដោយសារតែពួកគេបានរៀនពីស្ថាប័នជាតិ និងមានតួនាទីពន្យល់ប្រាប់ភ្ញៀវទេសចរបរទេសឲ្យបានដឹង។
លោកមិនបារម្ភចំពោះការបាត់បង់ឈ្មោះនោះទេ ដោយលោកបានអះអាងថា៖ «វាជារឿងធម្មតាទេ។ ប្រទេសណាក៏មានបញ្ហាបែបនេះ ហើយយើងមិនមែនជាប្រទេសទីមួយទេដែលអនុញ្ញាតឲ្យរឿងហូលីវូដមកថតនោះ។ ប៉ុន្ដែយើងទទួលបានប្រយោជន៍ជាច្រើនដូចជា កំណើនភ្ញៀវទេសចរជាដើម»៕