ដោយ៖ ឡាយ សាមាន
ថ្ងៃសុក្រ ទី14 វិច្ឆិកា 2014
http://vodhotnews.com
ស្តាប់សំឡេង៖ |
ចម្លងទុក |
មើលរូបភាពបន្ថែម
សកម្មភាពជីករ៉ែនៅលើដីជម្លោះ (រូបភាពផ្ដល់ដោយអាដហុក)
មន្ត្រីសិទ្ធិមនុស្សប្រចាំខេត្តរតៈគិរី ស្នើឲ្យស្ថាប័នមានសមត្ថកិច្ចចុះអន្តរាគមន៍ការជីករ៉ែត្បូងនៅក្នុងចំការកៅស៊ូមួយកន្លែង ក្នុងឃុំឡាមិញ ស្រុកបរកែវ ដោយលោកអះអាងថា ប៉ះពាល់ដល់ធនធានធម្មជាតិរបស់រដ្ឋ និងស្ថិតក្នុងដីមានជម្លោះនៅឡើយ។
មន្ត្រីសម្របសម្រួលសមាគមអាដហុកប្រចាំខេត្តរតៈគិរី លោក ឆាយ ធី មានប្រសាសន៍ថា ក្រោយពីបានចុះស៊ើបអង្កេត ឃើញមានកម្មករជាច្រើននាក់ រួមទាំងកម្មករវៀតណាមជាង២០ភាគរយ កំពុងជីកត្បូងរាប់ម៉ឺនកន្លែង យ៉ាងអាណាធិបតេយ្យ ស្ថិតនៅក្នុងភូមិត្រុំ ឃុំឡាមិញ ស្រុកបរកែវ ខេត្តរតនគិរី ។ លោក បានទទួលដំណឹងពីប្រភពលាក់ការណ៍ថា ថៅកែជីកត្បូង ហ៊ានបង់លុយយកដីជីកត្បូងក្នុង១ហិកតា១ម៉ឺនដុល្លារ លើដីចំការកៅស៊ូរបស់ក្រុមហ៊ុនចិនឈ្មោះស្វីហ្វរ៉ាប់ប៊ឺ លីមីធីត ដែលមានទំហំ៣១ហិកតា ធ្លាប់មានជម្លោះជាមួយពលរដ្ឋមិនទាន់បានដោះស្រាយ។
លោកមានប្រសាសន៍ថា «ដីហ្នឹងមានជម្លោះកាលពីមុន ហើយក្រោយមកមានការចាប់តំណាងប្រជាពលរដ្ឋ ដែលជាអ្នកតវ៉ាជាមួយក្រុមហ៊ុនហ្នឹង ហើយត្រូវបានតុលាការចាប់ឃុំរយៈពេល៤ខែហើយ តាំងពីខែ៦ ដល់ខែ៩មានការដើលែងវិញ។ អញ្ចឹងហើយ រឿងហ្នឹងស្ថិតនៅក្នុងតុលាការនៅឡើយទេ។ ប៉ុន្តែរឿងហ្នឹងយើងធ្វើការទប់ស្កាត់ បញ្ហាធនធានធម្មជាតិរបស់រដ្ឋ» ។
លោក ឆាយ ធី ស្នើឲ្យអាជ្ញាធរមានសមត្ថកិច្ចចុះទប់ស្កាត់ករណីនេះ រង់ចាំមានដំណោះស្រាយជាមួយពលរដ្ឋសិន និងដើម្បីរក្សាធនធានធម្មជាតិរបស់រដ្ឋ។
ពលរដ្ឋមានជម្លោះដីធ្លីនៅតំបន់នោះ លោក ស៊ិន ប៊ុនថែន និយាយថា នៅពេលក្រុមហ៊ុនបានកាយដី និងជីកត្បូងលើដីមានជម្លោះ អាជ្ញាធរមិនដែលទប់ស្កាត់ទេ លុះដល់ពេលប្រជាពលរដ្ឋចូលរួមជីកត្បូងដែរ អាជ្ញាធរបែរជាចុះបង្ក្រាប ។ លោក យល់ថា អាជ្ញាអនុវត្តច្បាប់លម្អៀងទៅខាងក្រុមហ៊ុន គឺមិនយុត្តិធម៌សម្រាប់ពួកគាត់។ លោកថា «ដីកំពុងតែមានទំនាស់ ហើយបើខាងក្រុមហ៊ុននៅតែរំលោភ វាខុសច្បាប់ហើយ ហើយរឿងហ្នឹងវាស្ថិតនៅក្នុងដៃតុលាការនៅឡើយ។ បាទ ហើយរឿងអាជីកត្បូងនេះ ជាកាតព្វកិច្ចរបស់ដែនដី និងសមត្ថកិច្ចហើយ ទោះបីជាប្រជាពលរដ្ឋគាត់មិនអើពើ ក្នុងនាមជាអាជ្ញាធរ គួរតែការពារទ្រព្យសម្បត្តិរបស់រដ្ឋដែរ» ។
លោក ស៊ិន ប៊ុនថែន ឲ្យដឹងថា លោកគោរពតាមសាលដីការបស់សាលាឧទ្ធរណ៍ ដែលសម្រេចទុកដីមានជម្លោះនោះជាតំបន់ដីរក្សាការពារ រង់ចាំដំណោះស្រាយ តែក្រុមហ៊ុនបានធ្វើសកម្មភាពលើដីនោះរហូតមក។
VOD មិនអាចស្វែងរកការទាក់ទងតំណាងក្រុមហ៊ុនចិនេះនៅឡើយ។
អធិការនគរបាលស្រុកបកែវ លោក ម៉ៅ សាន់ ប្រាប់ VOD ថា លោកបានដឹកនាំកម្លាំងសមត្ថកិច្ចជាង ១០នាក់ ចុះបង្កាបការជីកត្បូងខុសច្បាប់ និងបានដកហូតសម្ភារបានមួយចំនួន។ លោកបន្ថែមថា ពាក់ព័ន្ធក្រុមហ៊ុនមានជម្លោះជាមួយពលរដ្ឋ លោកមិនអាចអន្តរាគមន៍បានទេ តែលោកថា សមត្ថកិច្ចអនុវត្តទូទៅចំពោះពលរដ្ឋណាដែលចូលជីកត្បូងអាណាធិបតេយ្យ ។
លោកមានប្រសាសន៍ថា «បានចុះទៅអស់ហើយ គេបានធ្វើអស់ហើយ ទើបធ្វើមកសួរក្រោយ អាធីមិញក៏ទើបទេមកសួរខ្ញុំដែរ ដល់ពួកយើងធ្វើហើយអស់បានទើបធ្វើមកសួរ។ សម្ភាររបស់វាមានអីក្រៅពីអាប្រដាប់យោងប្រដាប់អីហ្នឹង យើងដកហូតខ្លះ ខ្លះក៏ទម្លាក់ចូលទៅក្នុងរណ្តៅទៅងាយយើងណាយកបានវាធ្ងន់… គ្មានការឃាត់ខ្លួនអ្វីទេ មនុស្សរាប់រយនាក់ សំខាន់បំផុតដេញកុំឲ្យតែជីកទៅបានហើយ» ។
ពលរដ្ឋអះអាងថា ដីនោះពួកគាត់បានកាន់កាប់តាំងពីឆ្នាំ១៩៨៨ ក្នុងទំហំដីជាង១០០ហិកតា ប៉ុន្តែកើតមានជម្លោះជាមួយក្រុមហ៊ុនចិននោះតាំងពីឆ្នាំ២០១០ ដែលប៉ះពាល់ប្រជាពលរដ្ឋជាង១៩គ្រួសារ ហើយពុំទាន់មានដំណោះស្រាយទេ រហូតមកទល់ពេលនេះ តែក្រុមហ៊ុននៅតែបន្តសកម្មភាពលើដីមានជម្លោះ ៕
សូមសរសេរមកលោក ឡាយ សាមាន តាមរយៈ samean@vodhotnews.com