Sat, 15 November 2014
ឈន ណន
ភ្នំពេញប៉ុស្តិ៍
ក្រុមអត្តពលិកកីឡាចំបាប់កម្ពុជា បាល់ទះលើឆ្នេរខ្សាច់ និងក្រុមបាល់ទះប្រើជើង (Foot-Volley) ត្រូវបានចេញដំណើរដោយពេលវេលាខុសៗគ្នា ដើម្បីទៅចូលរួមការប្រកួតកីឡាអាស៊ីឆ្នេរខ្សាច់ លើក ទី៤ (Asian Beach Games) នៅ ខេត្តភូកេត ព្រះរាជាណាចក្រថៃ ដែលបានបើកកម្មវិធីប្រកួតជាផ្លូវការ កាលពីថ្ងៃសុក្រម្សិលមិញ ហើយគ្រោងបញ្ចប់នៅថ្ងៃ ទី២៣ ខែវិច្ឆិកា ឆ្នាំ២០១៤ នេះ។
ក្រុមកីឡាករបាល់ទះប្រើជើងរបស់កម្ពុជា បានធ្វើដំណើរអមគណៈប្រតិភូ តំណាងឲ្យកម្ពុជា ទៅដល់ ខេត្តភូកេត តាំងពីថ្ងៃពុធ ខណៈក្រុមចំបាប់បានចេញដំណើរទៅតាមក្រោយកាលពីថ្ងៃព្រហស្បតិ៍ ហើយក្រុមបាល់ទះលើឆ្នេរខ្សាច់ បានទៅដល់ ខេត្តភូកេត នៅថ្ងៃសុក្រ ដើម្បីចូលរួមបើកកម្មវិធីប្រកួត។
Asian Beach Games គឺជាព្រឹត្តិការណ៍ប្រកួតដ៏ធំប្រចាំនៅទ្វីបអាស៊ី ដូចគ្នាទៅនឹងការប្រកួតកីឡាអាស៊ី នៅ អ៊ិនឈុន ដែលកីឡាការិនីតេក្វាន់ដូ ស៊ន សៀវម៉ី ដណ្តើមបានមេដាយមាសដែរ គ្រាន់តែមួយប្រកួតនៅលើឆ្នេរខ្សាច់ ដែលធ្វើឡើងរៀងរាល់ឆ្នាំ ហើយមួយទៀតប្រកួតនៅលើទីលានធម្មតា និងធ្វើឡើង ៤ឆ្នាំ ម្តង ប៉ុន្តែកម្រិតនៃការប្រកួតប្រជែងគឺមានទំហំប្រហាក់ប្រហែលគ្នា ព្រោះការប្រកួតកីឡាអាស៊ីឆ្នេរខ្សាច់លើក ទី៤ នេះ មានប្រទេសចំនួន ៤៥ បានចូលរួម ហើយអត្តពលិកតំណាងឲ្យប្រទេសទាំងនេះត្រូវប្រកួតប្រជែងគ្នាក្នុងប្រភេទកីឡាចំនួន ២៦ ដែលសរុបមាន ១៦៧ វិញ្ញាសា។
យ៉ាងណាក៏ដោយសម្រាប់កម្ពុជា ដែលប្រភេទកីឡាលើឆ្នេរខ្សាច់នៅមិនទាន់មានសក្តានុពលនោះ បានបញ្ជូនតែ ៣ ប្រភេទកីឡាប៉ុណ្ណោះឲ្យទៅចូលរួម ក្នុងនោះមានកីឡាចំបាប់ មានកីឡាករ ៤ នាក់ កីឡាការិនី ១ នាក់ គ្រូ ១ នាក់ កីឡាបាល់ទះលើឆ្នេរខ្សាច់ មានកីឡាករ ២ នាក់ គ្រូ ១ នាក់ និងកីឡា Foot Volley (បាល់ទះប្រើជើង) មានកីឡាករ ២ នាក់ និងគ្រូ ១ នាក់ ខណៈការប្រកួតលើក ទី១ នៅឥណ្ឌូនេស៊ីលើក ទី២ នៅ ប្រទេសអូម៉ង់ និងលើក ទី៣ នៅ ប្រទេសចិន កម្ពុជាបានបញ្ជូនតែ ១ ប្រភេទកីឡាប៉ុណ្ណោះទៅចូលរួម។
យោងតាមលិខិតឧទ្ទេសនាមរបស់ក្រសួងអប់រំ យុវជន និងកីឡា គឺមានមន្រ្តីសំខាន់ៗមួយចំនួន ត្រូវបានចាត់តាំងឲ្យទៅចូលរួមការប្រកួតកីឡាអាស៊ីឆ្នេរខ្សាច់នេះដែរ ក្នុងនោះមានលោក ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) លោក ប៊ូ ជុំសេរី ដែលជាអនុរដ្ឋលេខាធិការក្រសួងអប់រំ យុវជន និងកីឡា លោក វ៉ាត់ ចំរើន ដែលជាអគ្គលេខាធិការ NOCC ខណៈលោក លន់ សាមឌី ត្រូវបានចាត់តាំងជានាយកបេសកកម្ម ហើយលោក គង់ សុវត្ថិ ជាមន្រ្តីហិរញ្ញវត្ថុ។
ចំពោះអត្តពលិកទាំង ៤ នាក់របស់ចំបាប់ ដែលត្រូវចេញទៅប្រកួតលើកនេះកីឡាករ ចាប លឿន ត្រូវប្រកួតក្នុងទម្ងន់លើស ៨០ គ.ក្រ កាង ដែនពិសិដ្ឋ ក្រោមទម្ងន់ ៧០ គ.ក្រ ជុន ធួន ក្រោមទម្ងន់ ៨០ គ.ក្រ ហើយកីឡាការិនី និ សំណាង ប្រកួតក្រោមទម្ងន់ ៦០ គ.ក្រ។
ទាក់ទងទៅនឹងការចេញទៅប្រកួតនេះលោក ធិន វិចិត្រ គ្រូបង្វឹកដឹកនាំក្រុមចំបាប់ បានប្រាប់ថា៖ «យើងបានហាត់ត្រៀមនៅលើទីលានបាល់ទះលើឆ្នេរខ្សាច់បាន ២ ខែហើយ ប៉ុន្តែការទទួលបានលទ្ធផលបែបណានោះ ខ្ញុំមិនទាន់ហ៊ាននិយាយទេ ព្រោះនេះជាការប្រកួតកម្រិតអាស៊ី មានប្រទេសចូលរួមច្រើន»។
លោក វិចិត្រ បានបន្តថា យើងធ្លាប់បានបញ្ជូនកីឡាករ ២ នាក់ឲ្យទៅចូលរួមប្រកួតព្រឹត្តិការណ៍នេះនៅកោះបាលី ប្រទេសឥណ្ឌូនេស៊ី ដោយកាលនោះ ឌន សៅ បានធ្លាក់វគ្គជម្រុះលើក ទី១ ឯ ចាប លឿន បានយកឈ្នះកីឡាករថៃ តែគេបានធ្លាក់ក្នុងការប្រកួតដណ្តើមយកមេដាយសំរឹទ្ធ ដោយបានចាញ់ក្រុមកីឡាករម្ចាស់ផ្ទះ ហេតុនេះការប្រកួតនៅលើឆ្នេរខ្សាច់ វានៅតែថ្មីសម្រាប់យើង ព្រោះយើងមិនទាន់មានទីលានហ្វឹកហាត់លើជំនាញនេះនោះទេ។
ទោះបីជាយ៉ាងណាលោក វិចិត្រ ដែលជាអគ្គលេខាធិការសហព័ន្ធកីឡាចំបាប់កម្ពុជា ផងនោះ បានបញ្ជាក់ថា៖ «ថ្វីបើយើងមានការលំបាកក្នុងការស្វែងរកមេដាយ ប៉ុន្តែអត្តពលិករបស់យើង មានឆន្ទៈយ៉ាងមុតមាំក្នុងការត្រៀមប្រយុទ្ធនៅលើទីលាន ខណៈ ចាប លឿន ដែលធ្លាប់ចេញទៅប្រកួតបានម្តង នៅតែជាក្តីសង្ឃឹមរបស់យើង»។
ដោយឡែកកីឡាបាល់ទះលើឆ្នេរខ្សាច់ មានកីឡាករ លឹម សំអាត, ស៊ឹម ឃ្លោក និងគ្រូបង្វឹក ជុំ រដ្ឋា ហើយបាល់ទះប្រើជើង មានកីឡាករ គីម ហាប់ សឿង ខន្តី និងគ្រូបង្វឹក ហេង ចាន់ឆាង។
កីឡាករ លឹម សំអាត និង ស៊ឹម ឃ្លោក ធ្លាប់មានបទពិសោធប្រកួតច្រើនគួរសមនៅលើឆាកអន្តរជាតិ។ ថ្វីបើការប្រកួតកន្លងមកអ្នកទាំង ២ បានត្រឹមស្ពាយបទពិសោធត្រឡប់មកវិញ ប៉ុន្តែការប្រកួតជម្រុះពាន AVC Continental Cup Development Division SEA ដែលបានធ្វើឡើងនៅប្រទេសថៃ កាលពីថ្ងៃទី១១ ដល់ ទី១២ ខែវិច្ឆិកា កន្លងមកនេះ អ្នកទាំង ២ នេះ រួមជាមួយមិត្តរួមជាតិ ២ នាក់ទៀតគឺកីឡាករ សំ សំរឹទ្ធ និង ផាត សុភ័ក្រ្ត បានឈ្នះគ្រប់ការប្រកួតទាំងអស់។
ក្នុងការប្រកួតដែលមាន ៦ ប្រទេសចូលរួម ហើយក្នុងមួយប្រទេសៗមាន ២ ក្រុមនោះ ស៊ឹម ឃ្លោក ដែលជាក្រុម ទី១ ហើយ សំ សំរឹទ្ធ និង ផាត សុភ័ក្រ្ត ជាក្រុម ទី២ តំណាងឲ្យកម្ពុជានោះ គឺក្រុមកម្ពុជាទាំង ២ នេះ បានយកឈ្នះក្រុមសិង្ហបុរី រួចបន្តឈ្នះក្រុមម៉ាឡេស៊ី ក្នុងវគ្គជម្រុះតាមពូលដូចគ្នា ហើយនៅវគ្គ ១/២ ផ្ដាច់ព្រ័ត្រ ពួកគេបានយកឈ្នះក្រុម ឡាវ និងយកឈ្នះក្រុម ហ្វីលីពីន ក្នុងការប្រកួតផ្តាច់ព្រ័ត្រ ទាំង ២ ក្រុមដូចគ្នាទៀត ដើម្បីជួយឲ្យកម្ពុជា ទទួលបានលេខ ១ ក្នុងការប្រកួតជម្រុះពានមួយនេះ។ ហេតុនេះកម្ពុជា ព្រមទាំងហ្វីលីពីន និង ម៉ាឡេស៊ី ដែលទទួលបានលេខ ២ និងលេខ ៣ ត្រូវឡើងទៅប្រកួតនៅវគ្គបន្តជាមួយក្រុម ថៃ វៀតណាម និង ឥណ្ឌូនេស៊ី។
ការទទួលបានលទ្ធផលដ៏ល្អនៅក្នុងការប្រកួតជម្រុះពាន AVC Continental Cup Development Division SEA រួមទាំងការឈ្នះក្រុមប្រទេសបង់ក្លាដែស តែបានចាញ់ក្រុម ស្រីលង្កា និងក្រុម កាតា ក្នុងវគ្គជម្រុះតាមពូលនៃការប្រកួតកីឡាអាស៊ី លើក ទី១៧ កន្លងមកនេះបានធ្វើឲ្យកីឡាករ ស៊ឹម ឃ្លោក និង លឹម សំអាត កាន់តែមានភាពរឹងមាំ ក្នុងការចូលរួមការប្រកួតកីឡាអាស៊ីឆ្នេរខ្សាច់ លើក ទី៤ នេះ ទោះឱកាសដណ្តើមយកមេដាយរបស់ពួកគេ វាហាក់នៅឆ្ងាយក៏ដោយ។
កីឡាករ ស៊ឹម ឃ្លោក បានប្រាប់ កាលពីថ្ងៃព្រហស្បតិ៍ថា៖ «យើងមិនទាន់សង្ឃឹមដល់ថ្នាក់ឈ្នះមេដាយនោះទេ ព្រោះការប្រកួតនេះមានប្រទេសចូលរួមរហូតដល់ ៤៥ ប៉ុន្តែការទទួលបានបទពិសោធទាំងក្នុងការប្រកួតកីឡាអាស៊ី លើក ទី១៧ និងការប្រកួតជម្រុះពាន AVC Continental Cup Development Division SEA ថ្មីៗនេះ វាបានផ្តល់អត្តប្រយោជន៍យ៉ាងច្រើនដល់ពួកខ្ញុំ ហេតុនេះខ្ញុំរំពឹងថា យើងអាចឆ្លងផុតវគ្គជម្រុះក្នុងពូល ដើម្បីឈានទៅលេងដល់វគ្គ ១៦ ក្រុម និង ៨ ក្រុម ក្នុងការប្រកួតលើកនេះក៏ថាបាន»។
ផ្ទុយទៅវិញ កីឡាករ ហេង ចាន់ឆាង និង គីម ហាប់ ដែលត្រូវបានបញ្ជូនឲ្យទៅប្រកួតកីឡាបាល់ទះប្រើជើងលើឆ្នេរខ្សាច់លើកនេះ គឺគ្មានបទពិសោធទាល់តែសោះ ព្រោះពួកគេទើបតែហ្វឹកហាត់លើជំនាញនេះ ហើយកម្ពុជា ក៏មិនទាន់បង្កើតសហព័ន្ធកីឡាមួយនេះដែរ ដោយសារមិនសូវមានធនធាន ហេតុនេះការចេញទៅប្រកួតនេះអាចនិយាយបានថា ជាបទពិសោធលើកដំបូងក្នុងការវាស់ស្ទង់កម្រិតសមត្ថភាព ថាតើយើងនៅមានគម្លាតឆ្ងាយពីគេដល់កម្រិតណា?