ដោយ៖ ខាន់ លក្ខិណា
ថ្ងៃសៅរ៍ ទី15 វិច្ឆិកា 2014
http://vodhotnews.com
សមាគមអាដហុកប្រចាំខេត្តកោះកុង ថ្កោលទោសសកម្មភាពក្រុមហ៊ុនចិន ដែលបានឈូសឆាយដីដំណាំ រុះរើ និងដុតកម្ទេចផ្ទះប្រជាពលរដ្ឋក្នុងស្រុកគិរីសាគរ ខេត្តកោះកុង ថាជាអំពើរំលោភសិទ្ធិមនុស្ស។
យោងសេចក្ដីប្រកាសព័ត៌មានលើទំព័រទំនាក់ទំនងសង្គមរបស់សមាគមអាដហុក ចុះផ្សាយថ្ងៃ១៤ វិច្ឆិកា ឲ្យដឹងថា ក្រុមហ៊ុនចិន Union Devotement Group បានឈូសឆាយចម្ការដំណាំ រុះរើ និងដុតកម្ទេចផ្ទះសម្បែងប្រជាពលរដ្ឋនៅស្រុកគិរីសាគរ ខេត្តកោះកុងជាបន្តបន្ទាប់។
សេចក្ដីប្រកាសព័ត៌មាននោះឲ្យដឹងថា នៅថ្ងៃទី ១៣ ខែវិច្ឆិកា ឆ្នាំ២០១៤ ឈ្មោះ លី តិចហៃ តំណាងក្រុមហ៊ុនបានយកគ្រឿងចក្រ២គ្រឿងមកឈូសឆាយដីលោកស្រីសេស សេងហ៊ាង ដែលមានដំណាំស្វាយចន្ទី ដូង ខ្នុរ លើផ្ទៃដី១ហិចតាចំណុចពយជប៉ុន ភូមិព្រែកស្មាច់ ឃុំកោះស្តេច ស្រុកគីរីសាគរ ហើយកម្មករ និងសន្តិសុខក្រុមហ៊ុនបានបន្តទៅដុត និងរុះរើផ្ទះប្រជាពលរដ្ឋបន្ថែមអស់៩ ខ្នងទៀតនៅចំណុចពយម៉ង ព្រែកតាព្រហ្ម ព្រែកប៉ាតស្ថិតក្នុងភូមិគៀនក្រឡាញ់ ឃុំកោះស្តេច ស្រុកគីរីសាគរ ខេត្តកោះកុង។
សេចក្ដីប្រកាសព័ត៌មានដដែលឲ្យដឹងថា តំណាងអង្គការអាដហុក និងអង្គកាលីកាដូ ប្រចាំខេត្តកោះកុង បានអន្តរាគមន៍ជួបផ្ទាល់ជាមួយលោក ស៊ុន ដារ៉ា អភិបាលរងខេត្តនេះ ដោយលោកអភិបាលរងបានឆ្លើយតបថា ខាងខេត្តកំពុងស្នើទៅក្រុមហ៊ុន និងអន្តរក្រសួងដើម្បីឲ្យក្រុមហ៊ុនផ្អាកសកម្មភាព ព្រោះក្រុមហ៊ុនធ្វើឡើងមិនមានការចូលរួម រឺសហការជាមួយអាជ្ញាធរមូលដ្ឋាន និងថ្នាក់ខេត្តឡើយ។
កាលពីថ្ងៃទី២ ខែវិចិ្ឆកា ឆ្នាំ ២០១៤ តំណាងក្រុមហ៊ុនចិន យូនៀន ឌីវីលុបមែន គ្រុប បានដឹកនាំកម្លាំងសន្តិសុខ ៤០ នាក់រុះរើផ្ទះប្រជាពលរដ្ឋអស់ចំនួន៣ខ្នងនៅចំណុចមាត់ពាម ភូមិយាយសែន ឃុំព្រែកខ្សាច់ ស្រុកគីរីសាគរ ខេត្តកោះកុង៕
សូមសរសេរមកកញ្ញា ខាន់ លក្ខិណា តាមរយៈ khanleakhen@vodhotnews.com