ដោយ៖ ឡាយ សាមាន
ថ្ងៃចន្ទ ទី17 វិច្ឆិកា 2014
http://vodhotnews.com
ស្តាប់សំឡេង៖ |
ចម្លងទុក |
មើលរូបភាពបន្ថែម
ពលរដ្ឋអ្នកមានជម្លោះដីធ្លីនៅខេត្តព្រះវិហារ នាំគ្នាមកតវ៉ានៅមុខមន្ទីររដ្ឋសភា ដើម្បីឲ្យស្ថាប័នមួយនេះពន្លឿនការដោះស្រាយជូនពួកគាត់ (រូបថត៖ ឡាយ សាមាន)
ពលរដ្ឋរងគ្រោះដោយសារដីធ្លីមកពីខេត្តព្រះវិហារប្រមាណ ១០០នាក់ នៅថ្ងៃចន្ទនេះ ស្វែងរកអន្តរាគមន៍ជាថ្មីទៀត នៅមុខរដ្ឋសភាដើម្បីឲ្យស្ថាប័ននេះ ជំរុញទៅរដ្ឋាភិបាលពន្លឿនដោះស្រាយទំនាស់ដីធ្លីជាមួយអាជ្ញាធរខេត្តដែលអូសបន្លាយជិត៣ឆ្នាំមកហើយ។
បន្ទាប់ពីតំណាងប្រជាពលរដ្ឋចូលជួបជាមួយគណៈកម្មការទី១ នៃរដ្ឋសភាជាង៣ម៉ោង លោក ផាន់ ធឿន ថ្លែងថា ប្រធានគណៈកម្មការ លោក អេង ឆៃអ៊ាង នឹងជំរុញឲ្យសមាជិករបស់ខ្លួនចុះពិនិត្យលើដីមានជម្លោះដោយផ្ទាល់ក្នុងពេលឆាប់ៗនេះ។ លោកបន្តថា គណៈកម្មការនេះ នឹងកោះហៅអភិបាលខេត្ត ប្រធានអាជ្ញាធរជាតិព្រះវិហារ និងអង្គការយូនីស្កូ ដើម្បីឆ្លើយបំភ្លឺលើករណីនេះ តាមសំណើរបស់ពលរដ្ឋ។ ទោះជាយ៉ាងណាលោកបញ្ជាក់ថា ប្រសិនបើនៅតែមិនមានដំណោះស្រាយទេ ពួកគេនឹងបន្តស្វែងរកអន្តរាគមន៍តាមស្ថាប័ននានា ជាពិសេសខុទ្ទការល័យនាយករដ្ឋមន្ត្រីជាដើម។ លោកថា «ការជឿមិនជឿ វាសំខាន់លើ បើមានអ្នកដឹកនាំល្អត្រឹមត្រូវ ខ្ញុំនឹងជឿប្រសិនជាមិនមានជំនឿនិងការដោះស្រាយទេ ខ្ញុំនឹងហែញត្តិតទៅទៀត រហូតដល់បានសម្រេច បានជោគជ័យ បានខ្ញុំត្រឡប់ទៅផ្ទះវិញ។ ពួកខ្ញុំនេះមិនទាន់ត្រឡ់បទៅវិញទេ គាត់ស្នាក់នៅវត្តសាមគ្គីរង្សី បានព្រះគុណព្រះអង្គដែលឲ្យកន្លែងស្នាក់នៅ ពួកខ្ញុំនៅបន្តទៀត ព្រោះទៅវិញក៏គ្មានអីហូប ហើយក៏គ្មានកន្លែងនៅអីដែរ ព្រោះអត់មានអីទាំងអស់នៅភូមិរបស់គាត់»។
អ្នករងគ្រោះដីធ្លីដែលរង់ចាំនៅមុខរដ្ឋសភាលោក វង្ស វីរៈ អះអាងថា បន្ទាប់ពីអាជ្ញាធរចុះឈូសឆាយផ្ទះ និងដីស្រែរបស់ប្រជាពលរដ្ឋ ពួកគេជួបការលំបាកជាច្រើន ដោយសារបាត់ជម្រក។ ដោយអស់ជំនឿលើអាជ្ញាធរខេត្ត ទើបប្រជាពលរដ្ឋស្វែងរកអន្តរាគមន៍នៅភ្នំពេញ និងស្នើដល់រដ្ឋាភិបាលជួយពន្លឿននីតិវិធី ឲ្យពួកគាត់់ទៅរស់នៅលើដីចាស់វិញឲ្យបានឆាប់រហ័ស។ លោកបញ្ជាក់ថា «ប្រសិនជាសភាមិនមានដំណោះស្រាយ ពួកខ្ញុំនឹងបន្តការដង្ហែញត្តិ ដើម្បីរកអន្តរាគមន៍ពីស្ថាប័នផ្សេងៗដើម្បីឲ្យជួយជំរុញឲ្យសភា កោះហៅមន្ត្រីដែលជាប់ពាក់ព័ន្ធ ឲ្យមកដោះស្រាយឲ្យប្រជាពលរដេ្ឋឆាប់ៗផងដែរ ពីព្រោះប្រជាពលរដ្ឋមានការលំបាក់ខ្លាំងណាស់បង សព្វថ្ងៃដោយសារតែបានវត្តអារាម វត្តសាមគ្គីរង្សី លោកដើរបិណ្ឌបាត្រអ៊ីចឹង ហើយសល់ពីលោកឆាន់នាំគ្នាហូបបាយហ្នឹង មានការលំបាក់ណាស់ អ៊ីចឹងហើយប្រជាពលរដ្ឋក៏មិនចង់មកដែរបង តែវាជាដំណោះស្រាយទាល់ច្រក»។
គួរបញ្ជាក់ថា នេះជាលើកទី៤ហើយ ដែលពលរដ្ឋមានបញ្ហានេះ ហែញត្តិទៅរដ្ឋសភាដើម្បីស្វែងរកអន្តរាគមន៍ បន្ទាប់ពីគ្មានដំណោះស្រាយជាច្រើនឆ្នាំ។ បច្ចុប្បន្នពលរដ្ឋមានជម្លោះដីធ្លីមកពីខេត្តព្រះវិហារជាង១០០នាក់ កំពុងស្នាក់នៅវត្តសាមគ្គីរង្សី ជិត៣ខែមកហើយ ដោយរង់ចាំដំណោះស្រាយ។
តាមញត្តិរបស់ពលរដ្ឋអះអាងថា កាលពីដើមឆ្នាំ២០១២ លោក សួស យ៉ារ៉ា ជាក្មួយលោក សុខ អាន និងបច្ចុប្បន្នជាតំណាងរាស្ត្រគណបក្សប្រជាជនកម្ពុជាខេត្តព្រះវិហារ បានប្រើកងកម្លាំងប្រដាប់អាវុធ ឈូសឆាយផ្ទះរបស់ពលរដ្ឋ២៥៣គ្រួសារ វត្តអារាម សាលារៀន នៅភូមិឫស្សី ឃុំកន្ទួត ស្រុកជាំក្សាន្ត ដើម្បីយកធ្វើជាកម្មសិទ្ធិផ្ទាល់ខ្លួន។ ញត្តិបន្តថា ប្រជាពលរដ្ឋទាំងត្រូវចាប់បង្ខំឲ្យទៅរស់ក្នុងព្រៃ ដែលមានមីន និងគ្រាប់មិនទាន់ផ្ទុះ គ្មានដីបង្កបង្កើនផល និងគ្មានទឹកភ្លើង។
ដោយឡែកប្រជាពលរដ្ឋមួយក្រុមទៀត មកពីភូមិហ្មសែត សង្កាត់ប៉ាលហាល ក្រុងព្រះវិហារ ចំនួន៧៨គ្រួសារ បានរងការបណ្តេញចេញឆ្នាំ២០១៣ ដើម្បីពង្រីកព្រលានយន្តហោះ៕
សូមសរសេរមកលោក ឡាយ សាមាន តាមរយៈ samean@vodhotnews.com