ដោយ៖​ បូ សា​វី​
ថ្ងៃអង្គារ ទី18 វិច្ឆិកា 2014
http://vodhotnews.com

មើលរូបភាពបន្ថែម

អង្គភាព​ន្លត់​អគ្គិភ័យ​បាន​កំពុង​អន្តរាគមន៍ពន្លត់​ភ្លើងដែល​ឆេះ​ក្នុង​ក្លឹប​កម្សាន្តហ៊ីបហប (រូបថត៖ បូ សាវី)

​យ៉ាងហោច​មនុស្ស​៦នាក់​បាន​ស្លាប់ និង​២​នាក់​ផ្សេង​ទៀត​រង​បួស នៅ​ព្រឹក​ថ្ងៃ​អង្គារ​នេះ ដោយសារ​ភ្លើង​ឆាបឆេះក្លឹបកម្សាន្ត​ពេល​រាត្រី​មួយកន្លែងយីហោ ​"ហ៊ី​ប​ហ​ប" ស្ថិតក្នុង​សង្កាត់​សាលា​កំរើក កណ្ដាល​ក្រុង​សៀមរាប។

បើ​តាម​សាក្សី​នៅ​កន្លែងកើតហេតុ ឲ្យដឹងថានៅវេលា​ម៉ោង​២​រំលង​អាធ្រា​ត្រ ពួកគេ​បាន​ឃើញ​មនុស្ស​រាប់​សិប​នាក់​រត់ចេញ​ពី​ក្លឹប​កំសាន្ដ​រាត្រី បន្ទាប់ពី​មាន​ផ្សែងភ្លើង​ហុយ​ចេញ ពីដំបូល​ក្លឹប​កំសាន្ដ​រាត្រី​ឈ្មោះ "ហ៊ី​ប​ហប​" នោះ​។ ​ឧបទ្ទវហេតុ​នេះធ្វើឲ្យ​មនុស្ស​៦​នាក់​ស្លាប់​ជា​បន្ដបន្ទាប់ នៅក្នុង​នោះ​ជនបរទេស​ម្នាក់ ខណៈ២​ផ្សេងទៀត រងរបួសកំពុង​សម្រាក​នៅ​មន្ទីរពេទ្យ​ខេត្ដ។

​ស្នងការ​នគរបាល​ខេត្ដ​សៀមរាប លោក ស​ត ណា​ឌី ប្រាប់​ VOD ​នៅ​ព្រឹក​ថ្ងៃ​អង្គារនេះថា មូលហេតុ​នៃ​ការឆាបឆេះ​នេះ​ក្លឹប​កំសាន្ដ​ពេល​រាត្រី​នេះ បណ្ដាលមកពី​ការឆ្លង​ចរន្ត​អគ្គិសនី ប៉ុន្ដែ​លោកមិនទាន់​ដឹង​ពីទំហំ​នៃ​ការខូចខាត​សម្ភារៈ​នៅ​ឡើយ​ទេ​។​

លោក​បញ្ជាក់ថា សមត្ថកិច្ច​ប្រើ​រថយន្ដ​ពន្លត់អគ្គិភ័យ​៨​គ្រឿង ដើម្បី​បាញ់​ទឹក​ពន្លត់​អគ្គិភ័យ​នេះ​។​

សមត្ថកិច្ច​នគរបាលបានឲ្យដឹងថា នៅ​ខេត្ដ​សៀមរាបក្នុង​ឆ្នាំ​២០១៤​នេះ អគ្គីភ័យ​បាន​កើតឡើងមាន​៦​ករណី និង​មាន​មនុស្ស​ស្លាប់​៦​នាក់ គឺស្លាប់ក្នុងករណី​ឆេះ​នៅក្នុងក្លឹម​កំសាន្តនេះ​៕

ទិដ្ឋភាពក្រោយពន្លត់​ភ្លើងរួចរាល់

សូមសរសេរ​មកលោក បូ សាវី តាមរយៈ savy@vodhotnews.com