ដោយ៖ ថុល ស្រីលក្ខណ៍
ថ្ងៃព្រហស្បតិ៍ ទី20 វិច្ឆិកា 2014
http://vodhotnews.com
ស្តាប់សំឡេង៖ |
ចម្លងទុក |
មើលរូបភាពបន្ថែម
ស្ត្រីដែលជាសកម្មជនដីធ្លីនៅតំបន់បឹងកក់ កាលពីមិនទាន់ចាប់ខ្លួន បានមកអង្គុយតវ៉ា បិទផ្លូវនៅមុខសាលារាជធានីនាពេលកន្លងមក
ក្រសួងយុត្តិធម៌ និងអង្គការអន្តរជាតិធ្វើការផ្នែកស្ត្រី នៅថ្ងៃប្រហស្បតិ៍នេះលើកឡើងថា ស្ត្រីខ្មែរភាគច្រើន នៅតែមិនទាន់ទទួលបានភាពយុត្តិធម៌ពីប្រព័ន្ធយុត្តិធម៌នៅឡើយ ខណៈតុលាការនៅកម្ពុជារងការរិះគន់ថា ជាស្ថាប័នមួយដែលប្រជាពលរដ្ឋមានជំនឿតិចតួចបំផុត ។
នេះជាការលើកឡើងរបស់អ្នកជំនាញ ក្នុងសន្និសីទសម្រាប់ចៅក្រម និងព្រះរាជអាជ្ញាជាស្ត្រី ស្តីពី "សិទ្ធិស្ត្រីទទួលបានយុត្តិធម៌" ដែលរៀបចំដោយការិយាល័យឧត្តមស្នងការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា អង្គការ UN-Women និងក្រសួងយុត្តិធម៌ ។
តំណាងការិយាល័យឧត្តមស្នងការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា (OHCHR-Cambodia) លោកស្រី Wan Hee Lee មានប្រសាសន៍ថា ការផ្តល់យុត្តិធម៌ចំពោះស្ត្រី ពីប្រព័ន្ធតុលាការនៅកម្ពុជានៅមានកម្រិត ។ លោកស្រីថា បញ្ហានេះអាចដោយសារចៅក្រម និងព្រះរាជអាជ្ញាភាគច្រើនជាបុរស ហើយការឲ្យតម្លៃលើស្ត្រីនៅមានកម្រិត ។
រដ្ឋលេខាធិការក្រសួងយុត្តិធម៌ លោកស្រី ចាន់ សុទ្ធាវី មានប្រសាសន៍ដែរថា មូលហេតុស្ត្រីកម្ពុជាមួយចំនួនមិនទាន់ទទួលបានភាពយុត្តិធម៌ ដោយសារការអនុវត្តច្បាប់របស់មន្ត្រីនៅមានកម្រិត និងការរើសអើងលើស្ត្រីភេទ ។ លោកស្រីបន្តថា អ្វីដែលសំខាន់ស្ត្រីភាគច្រើន មិនទាន់បានយល់ដឹងពីច្បាប់ ហើយរស់ក្នុងគំនាបគ្រួសារ ។
សេចក្ដីថ្លែងការណ៍របស់អ្នករាយការណ៍ពិសេស នៃអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាលោក សុរិយា ស៊ូប៊ែរឌី កាលពីថ្ងៃទី១៨ ខែវិច្ឆិកា បានរិះគន់ថា ប្រព័ន្ធតុលាការនៅកម្ពុជាត្រូវបានប្រើប្រាស់ជាឧបករណ៍ របស់អំណាចនីតិប្រតិបត្តិម្ដងហើយម្ដងទៀត ចាប់តាំងពីលោកចូលកាន់មុខនាទីជាអ្នករាយការណ៍ពិសេសក្នុងអាណត្តិនេះ ។ លោកបន្ថែមថា កង្វះឯករាជ្យភាពនៃតុលាការ គឺជាឧបសគ្គមួយក្នុងចំណោមឧបសគ្គចម្បងនានា ។
ថ្មីៗនេះទៀត អង្គការសិទ្ធិមនុស្សបានរិះគន់តុលាការដែលផ្តន្ទាទោសស្ត្រីសកម្មជនដីធ្លីចំនួន១០នាក់ ដាក់ពន្ធនាគារម្នាក់ៗ១ឆ្នាំ និងពិន័យជាប្រាក់ក្នុងម្នាក់២លានរៀល បន្ទាប់ពីពួកគេតវ៉ាបិទផ្លូវព្រះមុនីវង្ស រកអន្តរាគមន៍រំដោះទឹកស្អុយជន់លិចផ្ទះនៅបឹងកក់ ៕
សូមសរសេរមកអ្នកនាង ថុល ស្រីលក្ខណ៍ តាមរយៈ sreyleak@vodhotnews.com