Fri, 21 November 2014
សេត គឹមសឿន
ភ្នំពេញប៉ុស្តិ៍
ភ្នំពេញៈ អេសស៊ីជី ដែលជាក្រុមហ៊ុនឈានមុខគេមួយក្នុងតំបន់អាស៊ាន ទើបនឹងប្រារព្ធកម្មវិធីគម្រប់ខួប១០០ឆ្នាំនៃការអភិវឌ្ឍប្រកបដោយនិរន្តរភាពរបស់ខ្លួនកន្លងទៅនេះ បានប្រកាសផ្តល់អាហារូបករណ៍ចំនួន ១០០ កន្លែងតាមរយៈកម្មវិធីអាហារូបករណ៍ “អេសស៊ីជី ចែករំលែកក្តីសុបិន” សម្រាប់យុវសិស្សកម្ពុជានៅក្នុងរាជធានីភ្នំពេញជាលើកដំបូង។
កន្លងមកក្រុមហ៊ុន អេសស៊ីជី បានបង្កើតកម្មវិធីអាហារូបករណ៍ “អេសស៊ីជី ចែករំលែកក្តីសុបិន”ដល់កុមារក្នុងប្រទេស ឥណ្ឌូនេស៊ី វៀតណាម មីយ៉ាន់ម៉ា ហ្វីលីពីន ឡាវ និង ថៃ ដែលផ្តល់ឱកាសឲ្យពួកគេអាចបន្តការសិក្សានៅកម្រិតឧត្តម ក៏ដូចជា មានជីវភាពរស់នៅល្អប្រសើរនាពេលអនាគត។ រហូតមកទល់ពេលនេះ ក្រុមហ៊ុនបានផ្តល់អាហារូបករណ៍រហូតដល់ជាង ៥០០០ កន្លែងហើយដល់សិស្សានុសិស្សក្នុងតំបន់អាស៊ាន។ កម្មវិធី“អេសស៊ីជី ចែករំលែកក្តីសុបិន” មានការប្តេជ្ញាជួយដល់គ្រួសារសិស្សក្នុងការផ្គត់ផ្គង់លើការសិក្សារបស់ពួកគេតាមរយៈការឧបត្ថម្ភលើតម្រូវការចាំបាច់នានាដូចជា សម្ភារសិក្សា សៀវភៅ ថ្លៃសិក្សា និងប្រាក់ឧបត្ថម្ភប្រចាំខែពេញមួយឆ្នាំសិក្សា។
លោក Somwang Manpimonchai ប្រធានក្រុមហ៊ុន អេសស៊ីជី ប្រចាំប្រទេសកម្ពុជា បានមានប្រសាសន៍ថា៖«អេសស៊ីជី ប្តេជ្ញាធ្វើជាក្រុមហ៊ុនដែលមានការទទួលខុសត្រូវខ្ពស់នៅក្នុងប្រទេសកម្ពុជាតាមរយៈការពង្រឹងគុណភាពនៃការរស់នៅខណៈដែលយើងកំពុងចូលរួមយ៉ាងសកម្មក្នុងការធ្វើឲ្យមានការអភិវឌ្ឍសង្គម។ ជាមួយកម្មវិធី “អេសស៊ីជី ចែករំលែកក្តីសុបិន” និងការប្តេជ្ញារបស់យើងចំពោះការអភិវឌ្ឍធនធានមនុស្ស យើងសង្ឃឹមថានឹងអាចជួយជំរុញសិស្សានុសិស្សក្នុងប្រទេសកម្ពុជា (ជាពិសេសសិស្សានុសិស្សដែលខ្វះខាត) ឲ្យស្រឡាញ់ការសិក្សារបស់ខ្លួន ព្រមទាំងបង្កើតនូវមូលដ្ឋានគ្រឹះរឹងមាំមួយសម្រាប់ការសិក្សា»។
លោកបន្ថែមទៀតថា៖«ក្រុមហ៊ុន អេសស៊ីជី តែងតែគិតគូរដល់ការទទួលខុសត្រូវសង្គម ដោយអនុវត្តដំណើរការផលិត និងចែកចាយផលិតផលដែលមិនប៉ះពាល់ដល់បរិស្ថានដើម្បីលើកស្ទួយដល់គុណភាពនៃការរស់នៅរបស់សហគមន៍កម្ពុជា ការផ្តល់អាហារូបករណ៍ក្នុងវិស័យអប់រំ និងសម្ភារកីឡា។ ជាមួយនឹងការតាំងចិត្តនេះ យើងបានធ្វើសកម្មភាពជាច្រើនដែលបានជួយដោះស្រាយតម្រូវការជាក់ស្តែងរបស់សង្គមដូចជា ជួយសហគមន៍ឲ្យមានលទ្ធភាពអភិវឌ្ឍគុណភាពនៃការរស់នៅរបស់ខ្លួនជាដើម។ សម្រាប់យើង នេះមិនមែនជាសកម្មភាពថ្មីឡើយ ប៉ុន្តែវាជាផ្នែកមួយនៃការទទួលខុសត្រូវសង្គមដែលយើងតែងតែធ្វើកន្លងមកសម្រាប់ប្រជាជនកម្ពុជា។ យើងជឿជាក់ថា តាមរយៈការលើកទឹកចិត្តឲ្យយុវជនកម្ពុជាមានអត្តចរិតល្អ និងស្រឡាញ់ការសិក្សា គឺជាគន្លឹះដ៏សំខាន់ដើម្បីបង្កើតធនធានសម្រាប់ការអភិវឌ្ឍប្រទេសកម្ពុជានាពេលអនាគត”។
សម្រាប់កម្មវិធីអាហារូបករណ៍ “អេសស៊ីជី ចែករំលែកក្តីសុបិន” បេក្ខជនដែលមានចំណាប់អារម្មណ៍ត្រូវបានលើកទឹកចិត្តឲ្យដាក់ពាក្យស្នើសុំ និងឯកសារពាក់ព័ន្ធនានា រួមជាមួយអត្ថបទសរសេរដោយដៃ ១-២ ទំព័រក្រោមប្រធានបទ “ខ្ញុំជាមនុស្សល្អ ហើយខ្ញុំល្អចំពោះមនុស្សគ្រប់គ្នា” ដោយធ្វើការរៀបរាប់ពីការរស់នៅប្រចាំថ្ងៃរបស់អ្នកនិងគ្រួសារអ្នក និងពន្យល់ពីក្តីសុបិនរបស់អ្នកក្នុងការសិក្សា ទៅកាន់អ្នកសម្របសម្រួលតាមសាលា និង/ឬ នាយកសាលា ដាច់ដោយឡែកពីគ្នាយ៉ាងយូរត្រឹមថ្ងៃទី ១៥ ខែវិច្ឆិកា ឆ្នាំ២០១៤។
សម្រាប់ព័ត៌មានបន្ថែមជុំវិញដំណឹងអាហារូបករណ៍ជាលើកទី១នេះ លោកអ្នកអាចទាក់ទងលោក ជា វង្សវិចិត្រ តាមរយៈទូរស័ព្ទលេខ ០៩៨ ៩៨៩ ៣៨១៕