ដោយ៖ បូ សាវី
ថ្ងៃអាទិត្យ ទី23 វិច្ឆិកា 2014
http://vodhotnews.com
ស្តាប់សំឡេង៖ |
ចម្លងទុក |
មើលរូបភាពបន្ថែម
កន្លែងលក់វត្ថុអនុស្សាវរីយ៍នៅខាងមុខភ្នំបាក់ខែង ដែលអាជ្ញាធរអប្សរាចង់រុះរើ (រូបថត៖ បូ សាវី)
ក្រុមអាជីវករលក់ដូរនៅតាមប្រាសាទបុរាណជិត៥០នាក់ ក្នុងតំបន់ទេសចរណ៍អង្គរ ស្វែងរកអន្ដរាគមន៍ពីអង្គការសង្គមស៊ីវិល និងតំណារាស្ដ្រសៀមរាប ករណីអាជ្ញាធរជាតិអប្សរា បង្ខំឲ្យពួកគេរុះរើតូបលក់ដូរផ្លាស់ទៅកន្លែងផ្សេង ឆ្ងាយពីភ្ញៀវទេសចរ។
ករណីនេះកើតឡើងបន្ទាប់ពីអាជ្ញាធរជាតិអប្សរាចេញលិខិតជូនដំណឹង ឲ្យក្រុមអាជីករលក់ដូរនៅខ្លោងទ្វារទន្លេអុំ និងខាងមុខភ្នំបាខែង រុះរើតូបលក់ដូរ និងមកចុះឈ្មោះយកទីតាំងថ្មី ឲ្យបានមុនថ្ងៃទី៣០ ខែវិច្ឆិកា ឆ្នាំ២០១៤នេះ។
តំណាងអាជីវករលក់ដូរនៅខាងមុខប្រាសាទភ្នំបាខែង អ្នកស្រី យឿន សាវឿន ប្រាប់ VOD នៅថ្ងៃនេះថា អាជ្ញាធរជាតិអប្សរា បានបង្ខំឲ្យពួកគាត់ រុះរើតូបលក់ដូរពួកគេចេញពីខាងមុខប្រាសាទភ្នំបាខែង ក្រោមហេតុផលប៉ះពាល់ដល់បុរាណវិទ្យា និងរៀបចំសណ្ដាប់ធ្នាប់សាធារណៈ។ អ្នកស្រីបន្ដថា មន្ដ្រីអាជ្ញាធរជាតិអប្សរា បានមកគំរាមកំហែង និងបង្ខំឲ្យពួកគាត់ ទទួលយកតូបលក់ដូរថ្មីនៅក្នុងព្រៃ ដែលមានចម្ងាយជាង៥០ម៉ែត្រពីកន្លែងចាស់ និងមិនមានភ្ញៀវចូលទិញ។ អ្នកស្រីមានប្រសាសន៍ថា «នៅបាក់ខែងលក់បានតែពេលថ្ងៃលិច ពេលភ្ញៀវចុះមកម៉ោង៤ ម៉ោង៥ ភ្ញៀវចុះហើយ អ៊ីចឹងលក់បានតែ១ម៉ោង២ម៉ោងហ្នឹងឯង អត់បានលក់បានមួយថ្ងៃវាល់ល្ងាចទេ។ ថ្ងៃខ្លះក៏ដាច់ ថ្ងៃខ្លះក៏អត់ ថ្ងៃខ្លះសូម្បីតែនៅខាងមុខហ្នឹង១០០ខ្មែរមិនបានផង។ បើសិនជាគាត់ឲ្យទៅខាងក្រោយហ្នឹង រឹតតែអត់ដាច់ទៀតហើយ ព្រោះនៅខាងក្រោយផ្លូវ ទី១ លក់អត់កើតទេ នៅជាប់ផ្លូវឡានគេបើហុយ អ៊ីចឹងភ្ញៀវគាត់អត់ដើរឆ្លងកាត់ទេ ឆ្លងកាត់មិនកើតព្រោះបើកហុយ» ។
តំណាងអាជីវករ លក់ដូរនៅក្លោងទ្វារទន្លេអុំ មួយរូបទៀត អ្នកស្រី មិន ស៊ីណាត ថ្លែងថា ពួកគេ បានដាក់ពាក្យប្ដឹង ដល់តំណាងរាស្ដ្រ លោកស្រី កែ សុវណ្ណរតន៍ និងអង្គការ អាដហុក ដើម្បីជួយអន្ដរគមន៍ទៅអាជ្ញាធជាតិអប្សរា ឲ្យបានពួកគេលក់ដូរនៅកន្លែងចាស់ដដែល។ អ្នកស្រីបញ្ជាក់ថាពួកគេសុខចិត្ដបង្រួមតូបលក់ ប៉ុន្ដែមិនអាចទទួលយកកន្លែងថ្មីបាននោះទេ ដោយសារទៅលក់នៅកន្លែងថ្មី មិនអាចផ្គត់ផ្គង់ជីវភាពបាន ។ អ្នកស្រីថា «នៅពេលដែលអាជ្ញាធរអប្សរាគាត់រៀបចំម្តងៗ គឺពិបាក គាត់អត់គិតដល់ធុរៈរបស់អាជីវករទេ។ តើទីតាំងដែលគាត់ឲ្យហ្នឹង អាជីវករអាចលក់ដូរបានអត់? ដាច់ឬអត់ គាត់អត់ខ្វល់ទេ គាត់ធ្វើម៉េចតែគាត់ចង់រៀបចំៗ ដឹងតែចង់ដេញប្រជាជន មិនចង់ឲ្យរកស៊ីតែម្តង ហើយអាហ្នឹងលក្ខណៈចង់ថា សម្លាប់ប្រជាជនដោយប្រយោលតែម្តង» ។
ករណីនេះតំណាងរាស្ដ្រមណ្ឌលខេត្ដសៀមរាប លោកស្រី កែ សុវណ្ណរតន៍ មានប្រសាសន៍ថា អគ្គនាយកអាជ្ញាធរជាតិអប្សរា លោក ប៊ុន ណារិទ្ធ គួរពិចារណារ ឲ្យពលរដ្ឋខ្មែរជាម្ចាស់ប្រាសាទរស់នៅដោយសេចក្ដីសុខ។ លោកស្រីកត់សម្គាល់ថា ការបណ្ដេញពលរដ្ឋចេញពីការលក់ដូរនេះ ដើម្បីស្ថាប័នេះ ធ្វើតូបប្រមូលលុយ ជាប្រយោជន៍បុគ្គលទៅវិញនោះទេ ។ លោកស្រីថ្លែងថា «ហើយយើងគួរពិចារណាដែលថា ផលប្រយោជន៍របស់ជាតិត្រូវតែចែករំលែកទៅដល់ពលរដ្ឋ ដែលរស់នៅក្នុងតំបន់ ដែលយើងអភិវឌ្ឍន៍ហ្នឹង។ បើសិនជាពេលយើងអភិវឌ្ឍន៍ ហើយយើងបណ្តេញគាត់ចេញ តើឲ្យគាត់ប្រកបរបររកស៊ីអី បើកន្លែងដែលខ្លួននៅគេមិនផ្តល់សិទ្ធិឲ្យរស់នៅសមរម្យ ត្រឹមត្រូវ។ អ្នកដែលរស់នៅ ភាគច្រើន តាំងពីជីដូនជីតាមកម្ល៉េះ។ ដូច្នេះខ្ញុំក៏បានអន្តរាគមន៍ទៅលោក ប៊ុន ណារិទ្ធ ដែរ។ ខ្ញុំថាផលប្រយោជន៍បន្តិចបន្តួចប្រចាំថ្ងៃសម្រាប់ជីវភាពគាត់ គួរតែផ្តល់ឲ្យប្រជាពលរដ្ឋទៅ» ។
VOD មិនអាចទាក់ទង អគ្គនាយកអាជ្ញាធរជាតិអប្សរា លោក ប៊ុន ណារិទ្ធ ដើម្បីសាកសួរពីបញ្ហានេះបានទេ។ ប៉ុន្ដែសេចក្ដីជូនដំណឹងរបស់អាជ្ញាធរជាតិអប្សរា ចុះថ្ងៃទី១៤ខែវិច្ឆិកា ឆ្នាំ២០១៤ ឲ្យដឹងថា ការរុះរើតូបលក់ដូរអាជីវករនេះ ដើម្បីរក្សាសោភណ្ឌភាព និងសេវាកម្មនានា និងដើម្បីទាក់ទាញភ្ញៀវទេសចរ និងបង្កើនប្រាក់ចំណូលដល់អាជីវករផងដែរ។
អ្នកសម្របសម្រួលសមាគមការពារសិទ្ធិមនុស្ស អាដហុក ខេត្ដសៀមរាប លោក សួស ណារិន មានប្រសាសន៍បន្ទាប់ពីធ្វើការស៊ើបអង្កេតថា អាជីវករទាំងពីរកន្លែងនេះ មិនព្រមរុះរើតូបលក់ដូរទៅកាន់កន្លែងថ្មី តាមការជូនដំណឹងរបស់អាជ្ញាធរជាតិអប្សរានោះទេ ដោយសារកន្លែងថ្មី មិនមានភ្ញៀវទេសចរទៅដល់ ដែលធ្វើឲ្យបាត់បង់ប្រាក់ចំណូលប្រចាំថ្ងៃពួកគេ។ លោកបន្ដថា ការដេញពលរដ្ឋដោយបង្ខំនេះ ជាការរំលោភលើសិទ្ធិសេដ្ឋកិច្ចពលរដ្ឋ ខណៈពួកគាត់កំពុងមានលក្ខណៈល្អក្នុងការកាត់បន្ថយភាពក្រីក្រ និងអាចបាត់បង់ព្រៃឧទ្យានអង្គរផងដែរ។
បើតាមលិខិតជូនដំណឹង អាជ្ញាធរជាតិអប្សរា ឲ្យដឹងថា ស្ថាប័ននេះ នឹងឈប់ឲ្យអាជីវករលក់ដូរ នៅខាងមុខប្រាសាទភ្នំបាក់ខែង និក្លោងទ្វារទន្លេអុំ ជាស្ថាពរ នៅថ្ងៃទី១៥ខែធ្នូខាងមុខនេះ៕
សូមសរសេរមកលោក បូ សាវី តាមរយៈ savy@vodhotnews.com