Tue, 9 December 2014
ប៉ិច សុធារី
ភ្នំពេញប៉ុស្តិ៍
ភ្នំពេញៈ ក្នុងឱកាសខួបលើក ទី៦៦ នៃទិវាសិទ្ធិមនុស្សអន្តរជាតិ ១០ធ្នូ ដែលនឹងមកដល់នៅថ្ងៃស្អែកនេះ រាជរដ្ឋាភិបាលក្រុមអង្គការសង្គមស៊ីវិល គណបក្សប្រឆាំង សហជីព ព្រះសង្ឃ និងប្រជាពលរដ្ឋ នឹងរៀបចំប្រារព្ធទិវានេះព្រមៗគ្នានៅរាជធានីភ្នំពេញ ប៉ុន្តែ ទីតាំងប្រារព្ធ និងប្រធានបទផ្សេងគ្នា។
លោក ឯក សុភក្តី តំណាងសហជីព សម្ព័ន្ធសហជីព និងសហព័ន្ធសហជីពក្នុងវិស័យកាត់ដេរ ទេសចរណ៍ និងសេវាកម្មកម្ពុជាបានឲ្យដឹងថា សហជីព និងកម្មករជាង ៣ ពាន់នាក់ នឹងប្រារព្ធទិវាសិទ្ធិមនុស្សនៅទីលានប្រជាធិបតេយ្យ ហើយហែក្បួនទៅរដ្ឋសភាដើម្បីថ្លែងញត្តិ និងទុក្ខកង្វល់របស់កម្មករអំពីបញ្ហាប្រាក់ឈ្នួល ប៉ុន្តែត្រូវបានសាលារាជធានីភ្នំពេញ បដិសេធរឿងហែក្បួន។
លោកថា ក្រុមសហជីព និងកម្មករនឹងប្រារព្ធទិវាសិទ្ធិមនុស្សអន្តរជាតិ ក្រោមប្រធានបទ «សិទ្ធិទទួលបានការងារនិងប្រាក់ឈ្នួលសមរម្យសម្រាប់កម្មករគ្រប់វិស័យ» ក្នុងគោលបំណងជំរុញឲ្យរាជរដ្ឋាភិបាលបញ្ឈប់ការបង្កើតច្បាប់សហជីព កំណត់ប្រាក់ឈ្នួលអប្បរមាថ្នាក់ជាតិសម្រាប់កម្មករនិយោជិត បង្កើតតុលាការការងារ និងលុបកិច្ចសន្យាការងារខ្លីៗខុសច្បាប់ជាដើម។
ចំណែកអង្គការសង្គមស៊ីវិល ដែលមានព្រះសង្ឃ និងប្រជាសហគមន៍ជាច្រើនពាន់នាក់ចូលរួមនឹងរៀបចំទិវាសិទ្ធិមនុស្ស ១០ ធ្នូ ជាពីរផ្នែក ក្នុងនោះ ក្រុមអង្គការសង្គមស៊ីវិលជាង ២០០ មានអ្នកចូលរួមប្រមាណ ៥ ពាន់នាក់ នឹងជួបជុំគ្នានៅសួនច្បារមាត់ទន្លេ មុខក្រុមប្រឹក្សាអភិវឌ្ឍន៍កម្ពុជា (CDC) រួចដើរក្បួនទៅសម្តែងមតិនៅទីលានប្រជាធិបតេយ្យ ដើម្បីផ្ញើសារទៅរដ្ឋាភិបាលជំរុញឲ្យមានការគោរពសិទ្ធិមនុស្ស និងលុបបំបាត់និទ្ទណ្ឌភាពនៅកម្ពុជា។ ចំណែក ក្រុមមិត្ត ១០ ធ្នូ ដែលកំពុងធ្វើធម្មយាត្រា សិទ្ធិយាត្រា តាមផ្លូវជាតិលេខ ១ ដល់ផ្លូវលេខ ៦ នឹងជួបជុំគ្នានៅមុខរដ្ឋសភា ដើម្បីដាក់ញត្តិទៅរដ្ឋសភា និងគណបក្សជាប់ឆ្នោតទាំងពីរ ទាមទារឲ្យដោះលែងតំណាងសហគមន៍ដីធ្លី ដែលកំពុងជាប់ឃុំ។
លោក សួន ប៊ុនស័ក្តិ ប្រធានលេខាធិការដ្ឋានគណៈកម្មការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជា (CHRAC) បានឲ្យដឹងថា ការរៀបចំផ្សេងគ្នារបស់សង្គមស៊ីវិលនេះ គឺជាវិធីសាស្រ្ត ឬសិល្បៈនៃការរៀបចំ ប៉ុន្តែ មានទិសដៅរួមគ្នាក្នុងការលើកកម្ពស់សិទ្ធិមនុស្សនៅកម្ពុជា។
អ្នកតំណាងរាស្ត្រគណបក្សសង្គ្រោះជាតិ លោកស្រី មូរ សុខហួរ ថ្លែងដែរថា សាលារាជធានីពីថ្ងៃចន្ទបានអនុញ្ញាតឲ្យគណបក្សសង្គ្រោះជាតិប្រារព្ធទិវាសិទ្ធិមនុស្សនារសៀលថ្ងៃ ទី១០ ធ្នូ នៅសួនច្បារមាត់ទន្លេមុខ CDC ក្រោមប្រធានបទ «រួមគ្នាបញ្ឈប់វប្បធម៌និទ្ទណ្ឌភាព»។
លោកស្រីបន្តថា ការដែលគណបក្សសង្គ្រោះជាតិប្រារព្ធទិវានេះដាច់ដោយឡែកពីក្រុមអង្គការសង្គមស៊ីវិលនិងក្រុមផ្សេងទៀត ដោយសារមិនចង់ឲ្យការលាបពណ៌រឿងគណបក្សនិងដើម្បីឲ្យពលរដ្ឋមានឱកាសបានចូលរួមគ្រប់គ្នានិងគ្រប់ទីកន្លែង។
អ្នកនាំពាក្យសាលារាជធានីភ្នំពេញលោក ឡុង ឌីម៉ង់ បានថ្លែងថា សាលារាជធានីបានអនុញ្ញាតឲ្យអង្គការសង្គមស៊ីវិល សហជីព ព្រមទាំងគណបក្សសង្គ្រោះជាតិ ប្រារព្ធទិវាសិទ្ធិមនុស្សអន្តរជាតិ ១០ ធ្នូ ទៅតាមទីតាំងដែលបានកំណត់ប៉ុន្តែមិនអនុញ្ញាតឲ្យមានការហែក្បួនឡើយ ព្រោះអាចប៉ះពាល់ដល់សណ្តាប់ធ្នាប់សាធារណៈ។
លោកថា សាលារាជធានីភ្នំពេញ ក៏នឹងប្រារព្ធទិវានេះដែរ ក្រោមប្រធានបទ «ការអភិវឌ្ឍរាជធានីភ្នំពេញ និងសិទ្ធិជាមូលដ្ឋានរបស់សហគមន៍ក្រីក្រ» នៅមជ្ឈមណ្ឌលសន្និបាតនិងពិព័រណ៍កោះពេជ្រ ដោយមានការប្រគំតន្ត្រី និងការតាំងពិព័រណ៍ផលិតផលរបស់សហគមន៍។
ចំណែកអង្គការជនពិការអន្តរជាតិ នឹងប្រារព្ធនៅពហុកីឡដ្ឋានជាតិអូឡាំពិក៕
Contact author: ប៉ិច សុធារី