ដោយ៖ បូ សាវី
ថ្ងៃសុក្រ ទី2 មករា 2015
http://vodhotnews.com
មើលរូបភាពបន្ថែម
ទីលានចាក់សំរាមនៅក្នុងឃុំត្រពាំងធំ ស្រុកប្រាសាទបាគង ខេត្តសៀមរាប (រូបភាព៖ បូ សាវី)
ប្រធានគណៈកម្មការទី៨នៃរដ្ឋសភា ជំរុញឲ្យអភិបាលខេត្ដសៀមរាប បញ្ឈប់សកម្មភាពដឹកជញ្ជូនសំរាមរបស់ក្រុមហ៊ុនហ្គាអីយ៉ា ដែលដឹកសំរាមទៅចាក់ចោលក្បែរផ្ទះប្រជាពលរដ្ឋ ក្នុងឃុំត្រពាំងធំ ស្រុកប្រាសាទបាគង ដែលពលរដ្ឋអះអាងថាបណ្ដាលឲ្យជះក្លិនស្អុយ បះពាល់ដល់សុខភាពពួកគាត់ ។
ការអន្ដរាគមន៍នេះ ធ្វើឡើងបន្ទាប់ពីប្រជាពលរដ្ឋចំនួន៤៣២គ្រួសារ បង្ហាញស្នាមមេដៃឲ្យតំណាងរាស្ដ្រ និងអភិបាលខេត្ដ សំណូរពរឲ្យប្ដូរទីតាំងចាក់សំរាមនៅក្បែរទីលំនៅពួកគាត់ ដោយអះអាងថា សំរាមទាំងនោះជះក្លិនស្អុយប៉ះពាល់សុខភាពអ្នកភូមិធ្ងន់ធ្ងរ និងបាត់បង់ជីវិតជាបន្ដបន្ទាប់ មិនតែប៉ុណ្ណោះ បានប៉ះពាល់ដល់ជីវិតសត្វនិងដំណាំស្រូវផងដែរ ។
លិខិតអន្ដរាគមន៍ ចុះថ្ងៃទី៣០ ខែធ្នូ ឆ្នាំ២០១៤ របស់ប្រធានគណៈកម្មការទី៨ នៃរដ្ឋសភា ទទួលបន្ទុកសុខាភិបាល សង្គមកិច្ច អតីត យុទ្ធជន យុវនីតិសម្បទា កាងារបណ្ដុះបណ្ដាលវិជ្ជាជីវៈ និងកិច្ចការនារី លោកស្រី កែ សុវណ្ណរតន៍ ផ្ញើជូនអភិបាលខេត្ដសៀមរាប តាមរយៈប្រធានរដ្ឋសភា លោក ហេង សំរិន ឲ្យដឹងថា គណៈកម្មការទី៨នៃរដ្ឋសភា ស្នើឲ្យអភិបាលខេត្ដសៀមរាប លោក ឃឹម ប៊ុនសុង ជួយអន្ដរាគមន៍ បញ្ឈប់សកម្មភាពដឹកជញ្ជូនសំរាមរបស់ក្រុមហ៊ុនហ្គាអ៊ីយ៉ា ទៅចាក់ចោលនៅក្បែផ្ទះពលរដ្ឋនៅភូមិអន្លង់ពីរ និងភូមិភ្នំដី ក្នុងឃុំត្រពាំងធំ ស្រុកប្រាសាទបាគង ។ លិខិតបន្ដថា ទីលានចាក់សំរាមដែលក្រុមហ៊ុនយកមកចាក់នោះ បានជះក្លិនស្អុយមកលើអ្នកភូមិ ធ្វើឲ្យប៉ះពាល់ដល់ទិន្នផលស្រែចំការ ព្រមទាំងប៉ះពាល់ដល់សុខភាពប្រជាពលរដ្ឋឈឺជាំប្រចាំ ។
ទាក់ទងករណីនេះ អភិបាលខេត្ដសៀមរាប លោក ឃឹម ប៊ុនសុង មានប្រសាសន៍ថា បន្ទាប់ពីមានពាក្យបណ្ដឹងពីពលរដ្ឋ លោកបានចាត់តាំងមន្ដ្រីជំនាញ និងគណៈកម្មការចុះត្រូវពិនិត្យ និងបានរៀបចំកន្លែងឡើងវិញ ដោយឲ្យម្ចាស់ក្រុមហ៊ុនជីករណ្ដៅលុបគំនរកាកសំណល់ទាំងនោះ ដើម្បីបំបាត់ក្លិនស្អុយរួចរាល់ហើយ ។
អ្នកភូមិបានអះអាងថា ក្រុមហ៊ុនហ្គាអ៊ីយ៉ានោះ បានចាក់សំរាមនៅក្បែរភូមិរបស់ពួកគាត់ រយៈពេលប្រហែល ១៥ឆ្នាំមកហើយ ។ ក្នុងរយៈពេលនេះ មានពលរដ្ឋស្លាប់ដោយសារជំងឺសួតជាបន្តបន្ទាប់ ហើយការចំណាយលើថ្លៃព្យាបាលជំងឺផ្លូវដង្ហើមទាំងក្មេងទាំងចាស់ក៏អស់ច្រើនណាស់ដែរ ៕
សូមសរសេរមកលោក បូ សាវី តាមរយៈ savy@vodhotnews.com