ដោយ៖ ណុល ដារ៉ា
ថ្ងៃសៅរ៍ ទី3 មករា 2015
http://vodhotnews.com
មើលរូបភាពបន្ថែម
សមត្ថកិច្ចត្រូវបានដាក់ពង្រាយនៅជិតកន្លែងថ្លឹងរថយន្ត ផ្លូវវ៉េងស្រេង ដើម្បីរារាំងក្រុមអ្នកហែក្បួនទៅបុរីកីឡា (រូបថត៖ ជន ស្រីណុច)
ប្រជាសហគមន៍បុរីកីឡា នៅល្ងាចថ្ងៃសៅរ៍នេះ សម្រេចផ្អាកការដើរហែក្បួនយកញត្តិទៅកាន់រដ្ឋសភា ក្រោយពេលសមត្ថកិច្ចចម្រុះរាជធានីភ្នំពេញរាប់សិបនាក់ ដាក់ពង្រាយបិទច្រកចេញចូលសហគមន៍នេះ ។
តំណាងសហគមន៍បុរីកីឡាម្នាក់ អ្នកស្រី ឆាយ គឹមហ៊ន មានប្រសាសន៍ថា ប្រជាពលរដ្ឋសម្រេចផ្អាកការដើរហែក្បួនយកញត្តិទៅដាក់នៅរដ្ឋសភា ដោយសារកម្លាំងសមត្ថកិច្ចចម្រុះពង្រាយព័ទ្ធច្រកចេញចូលបុរីកីឡា ហើយប្រជាពលរដ្ឋមិនចង់ឲ្យមានការប៉ះទង្គិចជាមួយកម្លាំងចម្រុះទាំងនោះ ។ អ្នកស្រីសម្ដែងការសោកស្ដាយ និងអន់ចិត្តដែលកម្លាំងចម្រុះទាំងនោះរារាំងពួកគេមិនឲ្យយកញត្តិទៅដាក់នៅរដ្ឋសភាជាតិកម្ពុជា ដើម្បីឲ្យតំណាងរាស្ត្របានដឹងឮពីទុក្ខលំបាករបស់ពួកគេ រស់វេទនាអស់រយៈពេលបីឆ្នាំលើគំនរសំរាម និងជាពិសេសរងនូវការធ្វើទុក្ខបុកម្នេញពីសំណាក់អាជ្ញាធរមូលដ្ឋាន អាជ្ញធររាជធានីភ្នំពេញ និងភាគីក្រុមហ៊ុនផានអ៊ីម៉ិច។
ទោះយ៉ាងណាអ្នកស្រី ឆាយ គឹមហ៊ន អះអាងថាការរារាំងប្រជាសហគមន៍បុរីកីឡានេះ មិនមែនជាដំណោះស្រាយល្អនោះទេ ព្រោះពួកគេនឹងនៅតែមានមធ្យោបាយផ្សេងទៀត ដើម្បីយកញត្តិទៅជូនរដ្ឋសភា ។ អ្នកស្រីបន្តថា ដំណោះស្រាយដែលប្រជាពលរដ្ឋចង់បាន គឺចង់ឲ្យអាជ្ញាធររាជធានីភ្នំពេញ ជំរុញឲ្យក្រុមហ៊ុនផានអ៊ីម៉ិចសាងសង់អគារពីរបន្ថែមទៀត សម្រាប់ពួកគាត់ ដូចដែលមានកិច្ចសន្យា។
អនុប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោកណៃ វ៉ង់ដា មានប្រសាសន៍ថា កម្លាំងចម្រុះមិនគួរទៅរារាំងក្រុមស្ត្រី និងកុមារបុរីកីឡាប្រមាណហាហុកសិបនាក់នោះទេ ព្រោះពួកគេធ្វើការតវ៉ាដោយសន្តិវិធី និងអហិង្សា ។ លោកបញ្ជាក់ថា ការរារាំងបែបនេះមិនមានប្រសិទ្ធភាព និងគ្មានប្រយោជន៍ទាល់តែសោះ ព្រោះវាអាចដោះស្រាយបានតែមួយរយៈខ្លីតែប៉ុណ្ណោះ គឺមិនអាចដោះស្រាយជារៀងរហូតបានទេ ។ លោកថា ប្រជាពលរដ្ឋក៏មានមធ្យោបាយរបស់គាត់ ដើម្បីយកញត្តិទៅដាក់នៅរដ្ឋសភាដែរ ។
សូមរំឭកថា ថ្ងៃ៣ មករា គឺជាខួបបីឆ្នាំ ដែលអាជ្ញាធរសាលារាជធានីភ្នំពេញ កងប្រដាប់អាវុធចម្រុះរបស់រដ្ឋាភិបាល និងក្រុមហ៊ុនផានអ៊ីម៉ិច បានឈូសបំផ្លាញ និងកម្ទេចលំនៅដ្ឋាន ទ្រព្យសម្បត្តិ របស់ពលរដ្ឋរាប់រយគ្រូសារនៅសហគមន៍បុរី កីឡា និងបានជម្លៀសទាំងបង្ខំ ឲ្យទៅរស់នៅឆ្ងាយពីទីក្រុងរហូត៤០គីឡូម៉ែត្រ ដោយផ្តល់សំណងតិចតួច ។ ចំណែកពលរដ្ឋជាង១០០គ្រូសារដែលបានបណ្តេញចេញដែរនោះ មិនព្រមទទួលសំណងហើយចេញតវ៉ារហូតពេលនេះ៕
សូមសរសេរមកលោក ណុល ដារ៉ា តាមរយៈ dara@vodhotnews.com