ដោយ សូត សុខប្រាថ្នា
2015-01-05
RFA
ស្ដាប់ ឬ ទាញយកសំឡេង
ប្រជាពលរដ្ឋប្រមាណ ៣០០នាក់ តំណាងឲ្យប្រជាពលរដ្ឋ ៥២៤គ្រួសារ នៅឃុំត្រមូង ស្រុកមេមត់ ខេត្តត្បូងឃ្មុំ លើកគ្នាដើម្បីមកជួបលោកនាយករដ្ឋមន្ត្រី ហ៊ុន សែន នៅក្នុងពិធីបើកការដ្ឋានសាងសង់អគាររដ្ឋបាលសាលាខេត្តត្បូងឃ្មុំ និងហេដ្ឋារចនាសម្ព័ន្ធផ្សេងទៀត នៅព្រឹកថ្ងៃទី៥ មករា ប៉ុន្តែត្រូវបរាជ័យ។ ពួកគេត្រូវអាជ្ញាធរសមត្ថកិច្ចបានដាក់កម្លាំងជាច្រើនកន្លែងដើម្បីរារាំងមិនឲ្យជួបលោក ហ៊ុន សែន ហើយស្នងការនគរបាលខេត្តបញ្ជាក់ថា សមត្ថកិច្ចធ្វើបែបនេះដើម្បីធានាសុវត្ថិភាពរបស់ថ្នាក់ដឹកនាំ។
ពលរដ្ឋនាំគ្នាជិះម៉ូតូផង រថយន្តផង ចេញពីផ្ទះសម្បែងរបស់ខ្លួនដើម្បីស្កាត់មកជួបលោកនាយករដ្ឋមន្ត្រី ហ៊ុន សែន ក្នុងគោលបំណងដាក់ញត្តិឱ្យជួយដោះស្រាយបញ្ហាដីធ្លីជាមួយក្រុមហ៊ុនចម្ការកៅស៊ូមេមត់ ដោយស្នើសុំឱ្យអាជ្ញាធរចេញប្លង់កម្មសិទ្ធិស្របច្បាប់នៅនឹងកន្លែងដល់ពួកគាត់។ ប៉ុន្តែពលរដ្ឋត្រូវខកបំណង ដោយសារតែពួកគាត់មិនអាចជួបលោកនាយករដ្ឋមន្ត្រី ហ៊ុន សែន បាន ពីព្រោះមានសមត្ថកិច្ចរាយកម្លាំងជាច្រើនកន្លែងដើម្បីរារាំងពួកគាត់។ ពលរដ្ឋបានត្រឹមនាំគ្នាឈរកាន់បដា និងស្រែកនៅកំណាត់ផ្លូវជាតិ៧៣ នៅចំណុចភូមិនិគមលើ ឃុំស្រឡប់ ដែលឆ្ងាយពីកន្លែងបើកការដ្ឋានប្រមាណ ៣គីឡូម៉ែត្រ ជាចំណុចដែលអាជ្ញាធរដាក់កម្លាំងរារាំងចុងក្រោយ ខណៈដែលកម្មវិធីបើកការដ្ឋានត្រូវចប់ទៅហើយ។
ពលរដ្ឋនៅភូមិខ្នងក្រពើលិច អ្នកស្រី ស៊ីម ស្រីនាង ឱ្យដឹងថា មូលហេតុពួកគាត់ចង់ទៅជួបលោក ហ៊ុន សែន ពីព្រោះចង់ឱ្យលោកនាយករដ្ឋមន្ត្រីដោះស្រាយបញ្ហាដីធ្លីរបស់ពលរដ្ឋជាមួយក្រុមហ៊ុនចម្ការកៅស៊ូមេមត់ ឱ្យបានឆាប់រហ័ស។ អ្នកស្រីបន្តថា មូលហេតុដែលអាជ្ញាធរមិនឱ្យពួកគាត់ជួបថ្នាក់ដឹកនាំ ពីព្រោះមិនចង់ដោះស្រាយបញ្ហារបស់ពួកគាត់៖ «ខ្ញុំយល់ថា គេមិនចង់ឱ្យខ្ញុំចូលជួប ពីព្រោះមិនចង់ឱ្យពួកខ្ញុំមានកម្មសិទ្ធិផ្ទាល់ខ្លួន»។
តំណាងពលរដ្ឋម្នាក់ទៀត អ្នកស្រី លីម ស្រីលក្ខណ៍ មានប្រសាសន៍ថា អាជ្ញាធរបានតាមដានពួកគាត់តាំងពីរសៀលថ្ងៃទី៤ មករា មកម្ល៉េះ ហើយរហូតដល់ព្រលឹមឡើង គឺមានអាជ្ញាធរកាន់តែច្រើនឡើងដាក់ពង្រាយដើម្បីបង្អាក់ដំណើររបស់ពួកគាត់មិនឱ្យមកទាន់វត្តមានរបស់ថ្នាក់ដឹកនាំកំពូល។
អ្នកស្រីថា ត្បិតតែពលរដ្ឋបរាជ័យក្នុងការជួបលោក ហ៊ុន សែន ក៏ដោយចុះ ប៉ុន្តែពួកគាត់សង្ឃឹមថា ដំណឹងនេះនឹងបានដឹងដល់ថ្នាក់ដឹកនាំជាក់ជាមិនខាន៖ «ពួកបងៗ មីងៗទាំងអស់នៅសហគមន៍ខ្នងក្រពើ គឺគាត់មានបំណងចង់ទៅជួបសម្ដេច គឺចង់ឱ្យគាត់ផ្ដល់ប័ណ្ណកម្មសិទ្ធិជូនពួកខ្ញុំ ព្រោះខាងក្រោមហ្នឹងគេអត់រាយការណ៍ជូនគាត់ទេ»។
អ្នកស្រីបញ្ជាក់ថា ពលរដ្ឋនឹងរិះរកគ្រប់មធ្យោបាយធ្វើយ៉ាងណាដើម្បីអាចឱ្យពួកគាត់ទទួលបានកម្មសិទ្ធិដីធ្លីនៅនឹងកន្លែង។
ជម្លោះដីធ្លីរវាងពលរដ្ឋ ៥២៤គ្រួសារលើទំហំដីជាង ២០ហិកតារ ជាមួយក្រុមហ៊ុនចម្ការកៅស៊ូមេមត់ បានអូសបន្លាយប្រមាណ ៦ឆ្នាំមកហើយ បន្ទាប់ពីក្រុមហ៊ុនមួយនេះទទួលបានសិទ្ធិអវិនិយោគពីក្រុមហ៊ុនរបស់រដ្ឋមកជាក្រុមហ៊ុនឯកជន ហើយតម្រូវឱ្យពលរដ្ឋទៅរស់នៅកន្លែងផ្សេង ប៉ុន្តែមានពលរដ្ឋតិចបំផុតដែលព្រមចាកចេញ។
ទាក់ទងបញ្ហានេះ ស្នងការនគរបាលខេត្តត្បូងឃ្មុំ លោក ម៉ៅ ពៅ មានប្រសាសន៍ថា សមត្ថកិច្ចមិនបានរារាំងពលរដ្ឋឡើយ ផ្ទុយទៅវិញ អាជ្ញាធរគ្រាន់តែចង់រក្សាសន្តិសុខសុវត្ថិភាពសម្រាប់ថ្នាក់ដឹកនាំប្រទេសប៉ុណ្ណោះ៖ «អូន! មិនមែនសមត្ថកិច្ចរារាំងទេ គឺទីនេះគឺជាកន្លែងការពារសុវត្ថិភាពជូនសម្ដេចតេជោនាយករដ្ឋមន្ត្រីប្រទេសកម្ពុជា អញ្ជើញមកសម្ពោធបើកការដ្ឋានសាងសង់សាលាខេត្តថ្មី។ អ៊ីចឹងជាការការពារសុវត្ថិភាពជូនថ្នាក់ដឹកនាំ និងអង្គពិធីទាំងមូល មិនមានការបិទរារាំងប្រជាពលរដ្ឋយើងទេ»។
លោកបន្ថែមថា បញ្ហាដីធ្លីរបស់ពលរដ្ឋខាងលោកនឹងពាំនាំនូវសំណើរបស់ពួកគាត់ទៅជូនអភិបាលខេត្តដើម្បីដោះស្រាយ។ ពលរដ្ឋសម្រេចនាំគ្នាត្រឡប់មកផ្ទះវិញនៅម៉ោងប្រមាណជា ១១ថ្ងៃត្រង់ ស្របពេលថ្នាក់ដឹកនាំ និងមន្ត្រីរាជរដ្ឋាភិបាលចាកចេញទៅអស់។
យ៉ាងណាមន្ត្រីអង្កេតនៃអង្គការការពារសិទ្ធិមនុស្សលីកាដូ (LICADHO) ដែលបានឃ្លាំមើលរឿងនេះ លោក ខុន ខូយ យល់ថា ការលើកឡើងរបស់អាជ្ញាធរគឺជារឿងត្រឹមត្រូវមួយផ្នែក ក៏ប៉ុន្តែសម្រាប់មួយជ្រុងទៀត គឺអាជ្ញាធរមានចេតនាមិនចង់ឱ្យពលរដ្ឋទាំងនោះអាចចូលជួបលោកនាយករដ្ឋមន្ត្រីតែម្ដង ពីព្រោះជម្លោះដីធ្លីនេះ គឺជាបញ្ហារសើបសម្រាប់អាជ្ញាធរខេត្ត។
លោកបន្តថា អាជ្ញាធរខេត្តហាក់មិនមានចេតនាដោះស្រាយបញ្ហានេះទេ ពីព្រោះបញ្ហានេះកើតឡើងជាច្រើនឆ្នាំមកហើយ ប៉ុន្តែលទ្ធផលអាជ្ញាធរបានត្រឹមរុញការដោះស្រាយដាក់គ្នាប៉ុណ្ណោះ។ ជាក់ស្ដែងកាលពីខែសីហា លិខិតពីរដាច់ដោយឡែកពីគ្នា គឺចេញពីស្ថាប័នរដ្ឋសភា និងព្រឹទ្ធសភា តម្រូវឱ្យអភិបាលខេត្តត្បូងឃ្មុំ ពិនិត្យនិងជួយដោះស្រាយលើបញ្ហានេះយ៉ាងណាក៏ដោយ ប៉ុន្តែរហូតមកដល់ពេលនេះ ពលរដ្ឋទាំងនោះមិនទាន់ទទួលបានលទ្ធផលជាវិជ្ជមានទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
សមត្ថកិច្ចដាក់បារាសរារាំងពលរដ្ឋមានជម្លោះដីទៅជួបលោកនាយករដ្ឋមន្ត្រី ហ៊ុន សែន នៅផ្លូវជាតិលេខ៧៣ ភូមិព្រះធាតុ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ កាលពីព្រឹកថ្ងៃទី៥ មករា ២០១៥។
សមត្ថកិច្ចដាក់បារាសរារាំងពលរដ្ឋមានជម្លោះដីទៅជួបលោកនាយករដ្ឋមន្ត្រី ហ៊ុន សែន នៅផ្លូវជាតិលេខ៧៣ ភូមិព្រះធាតុ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ កាលពីព្រឹកថ្ងៃទី៥ មករា ២០១៥។
ពលរដ្ឋមានជម្លោះដីលើកបដាតវ៉ាអមសងខាងផ្លូវ៧៣ ក្នុងភូមិនិគមលើ ស្រុកត្បូងឃ្មុំ ខេត្តត្បូងឃ្មុំ ខណៈរថយន្តគណៈប្រតិភូធ្វើដំណើរចេញពីពិធីបើកការដ្ឋានសាងសង់អគាររដ្ឋបាលខេត្ត។
ពលរដ្ឋមានជម្លោះដីលើកបដាតវ៉ាអមសងខាងផ្លូវ៧៣ ក្នុងភូមិនិគមលើ ស្រុកត្បូងឃ្មុំ ខេត្តត្បូងឃ្មុំ ខណៈរថយន្តគណៈប្រតិភូធ្វើដំណើរចេញពីពិធីបើកការដ្ឋានសាងសង់អគាររដ្ឋបាលខេត្ត។
ពលរដ្ឋមានជម្លោះដីលើកបដាតវ៉ាអមសងខាងផ្លូវ៧៣ ក្នុងភូមិនិគមលើ ស្រុកត្បូងឃ្មុំ ខេត្តត្បូងឃ្មុំ ខណៈរថយន្តគណៈប្រតិភូធ្វើដំណើរចេញពីពិធីបើកការដ្ឋានសាងសង់អគាររដ្ឋបាលខេត្ត។
ពលរដ្ឋមានជម្លោះដីលើកបដាតវ៉ាអមសងខាងផ្លូវ៧៣ ក្នុងភូមិនិគមលើ ស្រុកត្បូងឃ្មុំ ខេត្តត្បូងឃ្មុំ ខណៈរថយន្តគណៈប្រតិភូធ្វើដំណើរចេញពីពិធីបើកការដ្ឋានសាងសង់អគារ រដ្ឋបាលខេត្ត។
អត្ថបទដែលទាក់ទង
- អាជ្ញាធរនិងមន្ត្រីព្រៃឈើខេត្តសៀមរាបចុះបង្ក្រាបក្រុមកាប់ឈើនៅជើងភ្នំគូលែន
- ពលរដ្ឋឃុំកោះស្ដេចខេត្តកោះកុងបន្តតវ៉ាសុំអន្តរាគមន៍បើកផ្លូវចូលភូមិដែលក្រុមហ៊ុនចិនបិទ
- អាជ្ញាធរខេត្តមណ្ឌលគិរីដណ្ដើមយកគ្រឿងចក្រដែលជនជាតិព្នងរឹបអូសពីក្រុមហ៊ុនវៀតណាម
- ជនជាតិព្នងនៅមណ្ឌលគិរីធ្វើពិធីដាក់បណ្ដាសាប្រឆាំងក្រុមហ៊ុនវៀតណាមប៊ិញភឿក១
- ធនាគារ ANZ បំភ្លឺរឿងផ្ដល់ប្រាក់កម្ចីឲ្យក្រុមហ៊ុនលោក លី យ៉ុងផាត់ វិនិយោគស្ករអំពៅ
- សហគមន៍បុរីកីឡាជំរុញឲ្យសាលាក្រុងផ្ដល់សំណងលំនៅឋាន
- ពលរដ្ឋស្នើរដ្ឋាភិបាលដកហូតដីតំបន់ឆ្នេរនៅខេត្តព្រះសីហនុពីឈ្មួញនិងមន្ត្រីធំៗ
- ពលរដ្ឋនៅកំពង់ចាមចោទមេប៉ុស្តិ៍នគរបាលថារំលោភយកដីផ្លូវសាធារណៈ
- ជនជាតិដើមភាគតិចព្នងនៅមណ្ឌលគិរីប្រើហិង្សាចាប់ឃាត់គ្រឿងចក្រក្រុមហ៊ុន