ដោយ៖ ណាត សុភាព
ថ្ងៃអាទិត្យ ទី11 មករា 2015
http://vodhotnews.com
តំណាងអ្នកផ្ទុកមេរោគអេដស៍ម្នាក់ក្នុងចំណោម២៣៤នាក់ នៅខេត្តបាត់ដំបង ស្នើទៅរដ្ឋាភិបាល ក្រសួងពាក់ព័ន្ធ អង្គការជាតិ និងអន្តរជាតិយកចិត្តទុកដាក់ជាបន្ទាន់ ដោយជួយផ្តល់ជាស្បៀង ថ្នាំប្រឆាំងមេរោគអេដស៍ និងកន្លែងព្យាបាលដើម្បីលើកទឹកចិត្តដល់អ្នកជំងឺកុំឲ្យបាក់ស្មារតី ។
ជំទប់ទី២នៃឃុំរកាមកពីគណបក្សសង្គ្រោះជាតិដែលផ្ទុកមេរោគអេដស៍បានអះអាងថា ជាអ្នកតំណាងឲ្យអ្នកឆ្លងមេរោគទាំងនោះ លោក សឿម ឆម ឲ្យ VOD ដឹងថាបើតាមការចុះស្រង់ស្ថិតិដោយផ្ទាល់ដល់មន្ទីរពេទ្យ គិតចាប់ពីថ្ងៃទី៨ ខែធ្នូ ឆ្នាំ២០១៤ ដល់ថ្ងៃទី១១ ខែមករា ឆ្នាំ២០១៥ អ្នកដែលផ្ទុកមេរោគអេដស៍មានចំនួន២៣៤នាក់ហើយ ។ លោកថា ៣ថ្ងៃចុងក្រោយនេះ អ្នកផ្ទុកមេរោគ៨នាក់ក្នុងចំណោម២៣៤នាក់ មានសភាពធ្ងន់ធ្ងរ គឺក្អួតនៅពេលពួកគេផឹកថ្នាំប្រឆាំងមេរោគ ហើយបច្ចុប្បន្ននេះកំពុងសម្រាកព្យាបាលនៅមន្ទីរពេទ្យខេត្តបាត់ដំបង ។ លោកស្នើទៅរដ្ឋាភិបាល ស្ថាប័នពាក់ព័ន្ធទាំងអស់ជួយថែទាំ លើកទឹកចិត្ត និងជួយពន្យល់ណែនាំពួកគេផង ដើម្បីកុំឲ្យបាក់ស្មារតី ។
តែសម្រាប់ក្រសួងសុខាភិបាល និងអង្គការអន្តរជាតិដែលបានធ្វើការរួមក្នុងការស្រាវជ្រាវរកមូលហេតុនៃការឆ្លងមេរោគអេដស៍នៅខេត្តបាត់ដំបង ឲ្យដឹងថាមនុស្សចំនួន២១២នាក់ ត្រូវបានបញ្ជាក់ថាបានឆ្លងមេរោគអេដស៍ ហើយការសន្និដ្ឋានដំបូងគឺដោយសារការចាក់ថ្នាំ និងការប្រើប្រាស់សេរ៉ូម ។
សេចក្តីប្រកាសព័ត៌មានរបស់ក្រសួងសុខាភិបាល ចេញផ្សាយកាលពីថ្ងៃទី០៩ ខែមករា ឆ្នាំ២០១៥ ឲ្យដឹងថាចាប់ពីថ្ងៃទី៨ ដល់ថ្ងៃទី៣១ ខែធ្នូ ប្រជាជនចំនួន១៩៤០នាក់ រស់នៅឃុំរកា ស្រុកសង្កែ បានមកធ្វើតេស្តឈាមរកមេរោគអេដស៍ ដែលក្នុងនោះមាន២១២ បានឆ្លងមេរោគអេដស៍ ។ ក្នុងចំណោមអ្នកឆ្លងមេរោគអេដស៍ទាំងនោះ អ្នកភូមិរកាមានចំនួន១៧៤នាក់ ដែលស្មើនឹង៨២ភាគរយ ។ សេចក្តីប្រកាសព័ត៌មានបន្តថា កុមារអាយុក្រោម១៤ឆ្នាំដែលឆ្លងមេរោគអេដស៍ មានចំនួន៣៩នាក់ ស្មើនឹង១៨ភាគរយ អាយុចន្លោះពី១៥ឆ្នាំដល់៥៩ឆ្នាំ មានចំនួន១២៧នាក់ ស្មើនឹង៦០ភាគរយ និងមនុស្សចាស់អាយុចាប់ពី៦០ឆ្នាំឡើងទៅមានចំនួន៤៦នាក់ ស្មើនឹង២២ភាគរយ ។
គួរបញ្ជាក់ថា ករណីនៃការឆ្លងមេរោគអេដស៍នេះ គ្រូពេទ្យភូមិម្នាក់ឈ្មោះ យ៉ែម ជ្រិន ត្រូវបានសង្ស័យថាជាប់ពាក់ព័ន្ធនឹងការឆ្លងមេរោគអេដស៍នេះ ហើយត្រូវបានព្រះរាជអាជ្ញាចោទប្រកាន់លើចំណុច៣នៃបទចោទ គឺទី១ ការចម្លងជំងឺអេដស៍ទៅអ្នកដទៃ ទី២ ពាក់ព័ន្ធនឹងក្រមព្រហ្មទណ្ឌ(អំពើឃោរឃៅមានទារុណកម្ម) និងទី៣ ពាក់ព័ន្ធនឹងខុសវិជ្ជាជីវៈពេទ្យ ។ ក្រោមបទចោទទាំងនេះ លោក យ៉ែម ជ្រិន អាចត្រូវជាប់ពន្ធនាគារមួយជីវិត ៕
សូមសរសេរមកលោក ណាត សុភាព តាមរយៈ sopheap@vodhotnews.com