ដោយ៖ ស៊ុន ណារិន
ថ្ងៃចន្ទ ទី12 មករា 2015
http://vodhotnews.com
មន្រ្តីក្រសួងរ៉ែ និងថាមពល ឲ្យដឹងថារហូតមកដល់ពេលនេះក្រុមហ៊ុនអាជីវករខ្សាច់សំណង់ ខ្សាច់បក និងខ្សាច់ភ្នំ មានចំនួន២០ និងបូមខ្សាច់ទៅក្រៅប្រទេសមានចំនួន៤ ដែលនៅមានសុពលភាពអាជ្ញាប័ណ្ណក្នុងការបូមខ្សាច់សម្រាប់ឆ្នាំ២០១៥នេះ។
ចំនួននេះខុសពីការអះអាងថារបស់រដ្ឋមន្រ្តីក្រសួងធនធានទឹក និងឧតុនិយម លោក លឹម គានហោ ដែលលើកឡើងថារហូតមកដល់ពេលនេះមិនមានក្រុមហ៊ុនណាមួយដែលមានសុពលភាពអាជ្ញាប័ណ្ណក្នុងការបូមខ្សាច់នោះទេ។
អ្នកនាំពាក្យក្រសួងរ៉ែ និងថាមពល លោក ម៉េង សក្តិធារ៉ា ប្រាប់VODនៅថ្ងៃចន្ទនេះថារហូតមកដល់ពេលនេះក្រុមហ៊ុនអាជីវករខ្សាច់សំណង់ បក និងភ្នំ មានចំនួន២០ ដែលនៅមានសុពលភាពក្នុងការបូមខ្សាច់ ហើយក្នុងនោះនៅរាជធានីភ្នំពេញមិនមាននោះទេ។ ចំណែកនៅខេត្តកំពង់ធំមានចំនួន១០ ខេត្តកណ្តាលមាន៣ ខេត្តកែប១ ខេត្តកំពត១ ខេត្តសៀមរាប១ និងនៅខេត្តផ្សេងៗទៀត។ ក្រុមហ៊ុនទាំង២០នោះ មានសុពលភាពក្នុងការបូមខ្សាច់ត្រឹមឆ្នាំ២០១៥នេះ។
បើតាមទិន្នន័យរបស់ក្រសួងរ៉ែ និងថាមពល ពីមុនក្រុមហ៊ុនបូមខ្សាច់ទូទាំងប្រទេសដែលមានសុពលភាពមានទៅដល់១១៥។
លោក ម៉េង សក្តិធារ៉ា ឲ្យដឹងទៀតថាក្រុមហ៊ុនបូមខ្សាច់សមុទ្រទៅក្រៅប្រទេសវិញមានចំនួន៤ក្រុមហ៊ុនដែលមានសុពលភាព គឺនៅខេត្តកោះកុងចំនួន២ក្រុមហ៊ុន និងនៅខេត្តព្រះសីហនុចំនួន២។ កាលពីមុន ក្រុមហ៊ុនចំនួន២២ដែលមានអាជ្ញាប័ណ្ណក្នុងការបូមខ្សាច់សមុទ្រទៅក្រៅប្រទេស។
នៅខេត្តកោះកុង ក្រុមហ៊ុនចំនួន២ដែលទទួលបានការបូមខ្សាច់សមុទ្រនោះ រួមមានក្រុមហ៊ុនDirect Accessដែលបូមនៅតំបន់ប្រេងអណ្តូងទឹក ស្រុកបុទមសាគរ ហើយសុពលភាពមានទៅដល់ខែសីហាឆ្នាំ២០១៥។ ចំណែកក្រុមហ៊ុនInternational Rainbow បូមនៅតាមដងព្រែកកន្ទួត ហើយនឹងផុតសុពលភាពនៅឆ្នាំ២០១៥។
លោកបន្តថារហូតមកដល់ពេលនេះក្រសួងមិនបានបន្តសុពលភាពដល់ក្រុមហ៊ុនទៀតនោះទេ ដោយរង់ចាំឲ្យមានការសិក្សាជលវិទ្យាពីផលប៉ះពាល់បរិស្ថានពីក្រសួងធនធានទឹក និងឧតុនិយម។ លោកថាដោយសារតែក្រុមហ៊ុនដែលនៅមានសុពលភាពបូមខ្សាច់មានចំនួនតិច បណ្តាលឲ្យមានការខ្វះខាតខ្សាច់ក្នុងការធ្វើសំណង់ ហើយតម្លៃខ្សាច់ឡើងថ្លៃជាដើម។
គួររំឮកថា ថ្មីៗនេះ រដ្ឋមន្រ្តីក្រសួងរ៉ែ និងថាមពល លោក ស៊ុយ សែម បានស្នើឲ្យអភិបាលរាជធានីភ្នំពេញ ខេត្តកណ្តាល និងព្រៃវែង ចាត់វិធានការម៉ឹងម៉ាត់ទៅតាមផ្លូវច្បាប់លើការបន្តបូមខ្សាច់ទន្លេ នៅក្នុងតំបន់របស់ខ្លួន ដោយបញ្ជាក់ថាបុគ្គល ឬក្រុមហ៊ុនទាំងនោះមិនមានអាជ្ញាប័ណ្ណបូមខ្សាច់នោះទេ។ លោក ស៊ុយ សែម បញ្ជាក់ថាក្រសួងបានប្រកាសនិរាករណ៍រាល់អាជ្ញាប័ណ្ណបូមខ្សាច់ទាំងអស់ក្នុងតំបន់ទាំងនេះតាំងពីឆ្នាំ២០១១មកម្ល៉េះ ហើយកន្លងមកក្រសួងរ៉ែ និងថាមពល មិនដែលផ្តល់អាជ្ញាប័ណ្ណអាជីវកម្មបូមខ្សាច់ដល់នីតិបុគ្គល ឬរូបវន្តបុគ្គលណាមួយក្នុងតំបន់ទាំងនេះទេ។
អត្ថបទផ្សេងៗទៀត
- ការបន្តបូមខ្សាច់សមុទ្រលួចលាក់នៅតែមាន បើទោះរដ្ឋមន្រ្តីប្រកាសថាមិនមានអាជ្ញាប័ណ្ណ
- ក្រសួងរ៉ែ និងថាមពល ប្រកាសឲ្យអាជ្ញាធររាជធានី-ខេត្ត ចាត់វិធានផ្លូវច្បាប់ករណីបន្តបូមខ្សាច់
- ក្រុមហ៊ុនវៀតណាមដឹកខ្សាច់សមុទ្រទៅក្រៅប្រទេសរាប់ម៉ឺនតោន ទោះរដ្ឋមន្រ្តីប្រកាសថាគ្មានអាជ្ញាប័ណ្ណ
- គណៈកម្មាធិការគ្រប់គ្រងធនធានខ្សាច់នៅកម្ពុជា ព្រមានចាត់វិធានការលើក្រុមហ៊ុនដែលមិនមានអាជ្ញាប័ណ្ណអាជីវកម្ម
ចំណែក កាលពីថ្ងៃទី២៤ ខែធ្នូ ឆ្នាំ២០១៤ ប្រធានគណៈកម្មាធិការគ្រប់គ្រងធនធានខ្សាច់នៅកម្ពុជា លោក លឹម គានហោ ឲ្យដឹងថាអាជីវកម្មបូមខ្សាច់សព្វថ្ងៃនេះមិនមានអាជ្ញាប័ណ្ណស្របច្បាប់នោះទេ ចាប់តាំងពីការបង្កើតគណៈកម្មាធិការគ្រប់គ្រងធនធានខ្សាច់នៅកម្ពុជាក្នុងអាណត្តិទី៥នេះ។ លោកព្រមានចាត់វិធានការលើក្រុមហ៊ុនបូមខ្សាច់ណាដែលមិនមានអាជ្ញាប័ណ្ណ ត្រឹមត្រូវ ដោយស្នើទៅលោកនាយករដ្ឋមន្ត្រី ហ៊ុន សែន ឲ្យរឹបអូសយកទ្រព្យសម្បត្តិទាំងនោះទុកជាសម្បត្តិរដ្ឋ។ លោកមានប្រសាសន៍ថា«ឆ្លៀតពេលនេះផ្តាំផ្ញើតែម្តង រហូតដល់ថ្ងៃនេះអត់ទាន់មានផ្តល់នូវអាជ្ញាប័ណ្ណ ឬការសម្រេចណាមួយក្នុងការធ្វើអាជីវកម្មបូមខ្សាច់ទេ នេះហើយដែលហៅថាអ្នកល្មើស ដែលយើងខ្ញុំប្រើវិធានការដោយចាប់ទុក ហើយចាប់ទុកលើកនេះ សូមបញ្ជាក់ជូនថា អត់មានធ្វើកិច្ចសន្យាដោះលែងវិញទេ គឺយើងខ្ញុំនឹងស្នើដល់រាជរដ្ឋាភិបាលរឹបអូសជាសម្បត្តិរបស់រដ្ឋ»។
កាលពីខែធ្នូ ឆ្នាំ២០១៤ លោក លឹម គានហោ ឲ្យដឹងថា រហូតមកដល់ពេលនេះ មានក្រុមហ៊ុនថ្មីចន្លោះពី៣០ទៅ៤០ ដែលបានដាក់ពាក្យសុំបើកអាជីវកម្មបូមខ្សាច់សាជាថ្មី ហើយក្រសួងកំពុងតែសិក្សា៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com