Mon, 12 January 2015
ឃុត សុភចរិយា
ភ្នំពេញប៉ុស្តិ៍
ភ្នំពេញៈ សកម្មជនដីធ្លីនៃសហគមន៍បឹងកក់ និង សហគមន៍មួយចំនួនទៀត ដែលមានជម្លោះដីធ្លីក្នុងរាជធានីភ្នំពេញ គ្រោងជួបជុំគ្នាធ្វើលំហាត់ «សមយុទ្ធបាតុកម្មអហិង្សា» ជាលក្ខណៈទ្រង់ទ្រាយធំមួយនៅថ្ងៃព្រឹកចន្ទនេះ ដើម្បីកាត់បន្ថយការប៉ះទង្គិចដោយហិង្សាជាមួយ អាជ្ញាធរសាធារណៈ និងដើម្បីពង្រឹងសមត្ថភាព ការយល់ដឹងអំពីផ្លូវច្បាប់ និងនីតិវិធីនៃការតវ៉ាទាមទារដំណោះស្រាយពីអាជ្ញាធររាជរដ្ឋាភិបាល។
ការប្រមូលផ្ដុំធ្វើលំហាត់សមយុទ្ធបាតុកម្មអហិង្សានេះ នឹង ត្រូវធ្វើឡើងនៅក្នុងបរិវេណនៃមជ្ឈមណ្ឌលអប់រំច្បាប់សម្រាប់សហគមន៍ ដែលមានទីតាំងនៅក្បែរសាកលវិទ្យាល័យ កសិកម្មចម្ការដូង។ បើតាមការអះអាងរបស់អ្នកស្រីប៊ូវ សោភា តំណាងប្រជាសហគមន៍បឹងកក់ អ្នកចូលរួមនៅក្នុងលំហាត់សមយុទ្ធបាតុកម្មអហិង្សានេះមានចំនួនជិត ១០០ នាក់។
អ្នកស្រីថ្លែងថា៖ «នៅពេលសហគមន៍យើងខ្ញុំជួបប្រឈមទៅនឹងបញ្ហាការរំលោភបំពានសិទ្ធិ និងដីធ្លី និងការលង់លិចផ្ទះសំបែង ដោយសារកង្វះខាតប្រព័ន្ធលូបង្ហូរទឹក ហើយនាំគ្នាធ្វើការតវ៉ាទាមទារដំណោះស្រាយ ត្រូវបានអាជ្ញាធរវាយបង្ក្រាប និងចាប់ខ្លួនដាក់ពន្ធនាគារ ដោយចោទប្រកាន់ថា ល្មើសនឹងច្បាប់នេះ ច្បាប់នោះ ប៉ុន្តែ ដំណោះស្រាយនៅតែគ្មាន»។
អ្នកស្រីបាននិយាយទៀតថា ពេលខ្លះគាត់បានឮមន្ត្រីសាធារណៈមួយចំនួន បាននិយាយដោយគ្មានការទទួលខុសត្រូវចំពោះបញ្ហា ដែលកើតឡើង ដូចជាករណីជំនន់ទឹកភ្លៀងពីដើមខែ វិច្ឆិកា ឆ្នាំ ២០១៤ កន្លងទៅ។
អ្នកស្រីថា៖ «ឥឡូវយើងធ្វើការហ្វឹកហ្វឺនរៀនសូត្របន្ថែមទៀតអំពីផ្លូវច្បាប់ និង អំពីរបៀបនៃការធ្វើបាតុកម្មដោយអហិង្សា ដើម្បីធ្វើការទាមទារដំណោះស្រាយពីអាជ្ញាធររាជរដ្ឋាភិបាល ប្រកបដោយតម្លាភាពនិងគតិយុត្តិ»។
ប្ដីអ្នកស្រីទេព វន្នី គឺលោក អ៊ូ គង់ ជា បាននិយាយថា លំហាត់សមយុទ្ធបាតុកម្មអហិង្សានេះ នឹងជួយបង្កើនការយល់ដឹងបន្ថែមទៀតសម្រាប់ប្រជាសហគមន៍ ដែលមានជម្លោះដីធ្លី អំពីវិធីសាស្ត្រថ្មីក្នុងការតវ៉ាដោយសន្តិវិធី និងការបញ្ចៀសឲ្យបាននូវការប៉ះទង្គិចដោយហិង្សាពីអាជ្ញាធរសាធារណៈ។
លោកបានបញ្ជាក់ថា មេរៀនសំខាន់ៗ ដែលត្រូវហាត់រៀន នៅព្រឹកថ្ងៃចន្ទនេះ រួមមានការ ដើរក្បួន និងឈរតវ៉ាដោយសន្តិវិធី និងមិនបង្កភាពកកស្ទះចរាចរណ៍សាធារណៈ ការបញ្ជូនសារទៅអាជ្ញាធរសាធារណៈ អំពីបញ្ហាប្រឈមពិតប្រាកដរបស់សហគមន៍ និង មានការដាក់បញ្ចូលនូវទ្រឹស្ដី និងនីតិវិធីច្បាប់សំខាន់ៗមួយចំនួនទៀតទាក់ទងទៅនឹងច្បាប់បាតុកម្ម។
លោកថា៖ «លំហាត់សមយុទ្ធបាតុកម្មអហិង្សាសកម្មរបស់យើងខ្ញុំនៅពេលនេះ មិនមែនធ្វើឡើងក្នុងគោលបំណងប្រឆាំងទៅនឹងអាជ្ញាធរសាធារណៈនោះទេ គឺដើម្បីបញ្ចៀសអំពើហិង្សា»។
លោក អំ សំអាត មន្ត្រីជាន់ខ្ពស់នៃអង្គការសិទ្ធិមនុស្ស លីកាដូ បាននិយាយថា ប្រសិនបើប្រជាពលរដ្ឋ និងអាជ្ញាធរមានភាពសហការគ្នាល្អ ក្នុងការដោះស្រាយបញ្ហាប្រឈម ដែលបាន ឬ កំពុង ឬ រៀប នឹងកើតមានឡើង ដោយស្មារតីទទួលខុសត្រូវ និងមិនដំអែដំអក់ទេនោះ បាតុកម្មវានឹងមិនកើតមានឡើង ហើយក៏គ្មានការបង្ក្រាបដោយហិង្សានោះដែរ៕