ដោយ៖ ញឹម សុខន
ថ្ងៃចន្ទ ទី12 មករា 2015
http://vodhotnews.com
ក្រសួងព័ត៌មានគំរាមបិទស្ថានីយផ្សាយរបស់ទូរទស្សន៍ និងវិទ្យុមួយចំនួន បើពួកគេនៅតែបន្តផ្សាយពាណិជ្ជកម្មគ្រឿងស្រវឹងចន្លោះពីម៉ោង៦ដល់ម៉ោង៨យប់ រំលោភលើសេចក្តីណែនាំរបស់ក្រសួងដើម្បីទប់ស្កាត់ឥទ្ធិពលនៃគ្រឿងស្រវឹងដល់អនាគតកុមារ ។
ការព្រមាននេះធ្វើឡើងបន្ទាប់ពីក្រសួងព័ត៌មាន បានជូនដំណឹងពីការណែនាំនេះជាង៣ខែមកហើយ តែគ្មានប្រសិទ្ធភាព ។
លិខិតព្រមានថ្មីទៀតរបស់ក្រសួងព័ត៌មាន ចុះថ្ងៃទី១១ ខែមករា ឆ្នាំ២០១៥ ឲ្យដឹងថាស្ថានីយទូរទស្សន៍ និងវិទ្យុក្នុងស្រុកមួយចំនួន បានអនុលោមតាមសេចក្តីណែនាំរបស់ក្រសួង ។ ប៉ុន្តែស្ថានីយទូរទស្សន៍មួយចំនួនទៀត នៅតែបន្តចាក់ផ្សាយពាណិជ្ជកម្មគ្រឿងស្រវឹងនេះ រំលោភលើសេចក្តីណែនាំរបស់ក្រសួង ។
លិខិតដែលចុះហត្ថលេខាដោយលោក ហ៊ុយ សារ៉ាវុធ ដដែលឲ្យដឹងទៀតថា បើប្រព័ន្ធផ្សព្វផ្សាយទាំងនោះនៅតែបន្តចាក់ផ្សាយរំលោភបន្តទៀត នោះក្រសួងនឹងចាត់វិធានការឲ្យផ្អាកការផ្សាយ ពី២សប្តាហ៍ ទៅមួយខែ និងអាចឈានទៅដកអាជ្ញាប័ណ្ណការផ្សាយទាំងស្រុង ប្រសិនបើនៅតែពុំរាងចាល ។
អគ្គនាយករងទូរទស្សន៍ CNC លោក ហ៊ុយ វណ្ណៈ លើកឡើងថា ជាការល្អក្នុងការចូលរួមគោរពសេចក្តីណែនាំរបស់ក្រសួងព័ត៌មាន បើទោះបីជាការអនុវត្តនោះមានផលប៉ះពាល់ខ្លះ ដល់ដំណើរការរកប្រាក់ចំណូលសម្រាប់ស្ថាប័នលោកក៏ដោយ ។
ប៉ុន្តែលោកយល់ថាដោយសារទីផ្សារនៅកម្ពុជាទើបតែងើប ដូចនេះការអនុវត្តច្បាប់ត្រូវផ្ទៀងផ្ទាត់ និងតុល្យភាពនៃតម្រូវការសង្គម ។
ប្រធានការិយាល័យផ្នែកព័ត៌មាននៅទូរទស្សន៍បាយ័ន BTV លោក ងួន ភារម្យ អះអាងថាការណែនាំរបស់ក្រសួងព័ត៌មាននេះវាជារឿងល្អ ។ ប៉ុន្តែលោកមិនអត្ថាធិប្បាយថា ចាប់ពីមានសេចក្តីណែនាំពីក្រសួងព័ត៌មក ទូរទស្សន៍មួយនេះឈប់ចាក់ផ្សាយពាណិជ្ជកម្មគ្រឿងស្រវឹង តាមការណែនាំឬយ៉ាងណាទេ ។
អគ្គស្នងការដ្ឋាននគរបាលជាតិប្រកាសឲ្យដឹងថា មនុស្សយ៉ាងតិចជាង២ពាន់នាក់(២១៤៣នាក់) បានស្លាប់ដោយសារគ្រោះថ្នាក់ចរាចរណ៍ឆ្នាំ២០១៤នេះ ក្នុងនោះអ្នកស្លាប់ក្រោមឥទ្ធិពលនៃគ្រឿងស្រវឹងពេលបើកបរ នៅតែជាប់លំដាប់ថ្នាក់លេខ២ ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង យល់ថាក្រសួងព័ត៌មាននឹងបរាជ័យម្តងទៀត បើការចាត់វិធានការនោះមិនអាចធ្វើទៅលើមនុស្សមួយក្រុម ដែលមានខ្នងបង្អែកធំៗអនុវត្តបាននោះ ។
កាលពីថ្ងៃទី១ ខែតុលា ឆ្នាំ២០១៤ ក្រសួងព័ត៌មានបានជូនដំណឹងដល់ប្រព័ន្ធផ្សព្វផ្សាយ ទាំងទូរទស្សន៍ទាំងវិទ្យុក្នុងស្រុកទាំងអស់ ត្រូវផ្អាកផ្សាយពាណិជ្ជកម្មគ្រឿងស្រវឹងចាប់ពីម៉ោង៦ដល់ម៉ោង៨យប់ ដោយសំអាងថារយៈពេល២ម៉ោងនោះ ជាពេលដែលកុមារភាគច្រើនកំពុងមើលទូរទស្សន៍ ពួកគេនឹងអាចក្លាយជាមនុស្សសេពគ្រឿងស្រវឹងទៅថ្ងៃអនាគត បើកុមារទាំងនោះខ្វះការពិចារណាតាមការផ្សព្វផ្សាយ ដែលថា ពួកគេនឹងក្លាយជាអ្នកមានពេលទទួលបានពានរង្វាន់ តាមរយៈការសេពគ្រឿងស្រវឹងនេះ ៕
សូមសរសេរមកលោក ញឹម សុខន តាមរយៈ sokhorn@vodhotnews.com