ដោយ វោហារ ជាតិ
2015-03-31
RFA
ស្ដាប់ ឬ ទាញយកសំឡេង
សកម្មភាពប្រជាពលរដ្ឋខ្មែរដែលអាជ្ញាធរថៃ ចាប់បញ្ជូនមកដាក់ចំណុចរង្វង់មូលខាងមុខច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ នៅថ្ងៃទី១២ ខែមិថុនា ឆ្នាំ២០១៤។ Photo: RFA
ប្រជាពលរដ្ឋ និងមន្ត្រីអង្គការក្រៅរដ្ឋាភិបាលជាច្រើន តវ៉ាថា ក្រុមហ៊ុនដែលផ្សាយពាណិជ្ជកម្មជ្រើសរើសពលករខ្មែរទៅធ្វើការនៅបរទេសមួយចំនួន បានបោកប្រាក់ពីពលករក្រីក្រជាបន្តបន្ទាប់។ ចំណែករដ្ឋាភិបាល មិនបានចាត់វិធានការតាមច្បាប់ចាប់ម្ចាស់ក្រុមហ៊ុនបោកប្រាស់ទាំងនោះ ទៅផ្ដន្ទាទោសទេ។
សព្វថ្ងៃនេះ ស្ថានីយវិទ្យុជាច្រើនកំពុងត្រូវប៉ាន់ ឬទទួលប្រាក់ចំណូលច្រើន ដោយសារការផ្សព្វផ្សាយព័ត៌មានពាណិជ្ជកម្ម។ ការផ្សាយពាណិជ្ជកម្មនោះមានដូចជា ផលិតផលពាណិជ្ជកម្ម កសិកម្ម និងឱសថព្យាបាល ជាដើម ដែលការផ្សាយពាណិជ្ជកម្មនោះស្ដាប់ទៅនាំឲ្យអ្នកស្ដាប់មានជំនឿយ៉ាងខ្លាំង ជាពិសេសការផ្សាយពាណិជ្ជកម្មរបស់ក្រុមហ៊ុនឯកជនជ្រើសរើសពលករធ្វើការនៅក្រៅប្រទេស ដែលផ្សាយប្រាប់ទាំងអាសយដ្ឋានរបស់ក្រុមហ៊ុន ទាំងលេខទូរស័ព្ទ ធ្វើឲ្យអ្នកស្ដាប់ដែលកំពុងគ្មានការងារធ្វើចាប់អារម្មណ៍ និងជឿជាក់ទាំងស្រុង។
ក៏ប៉ុន្តែ រយៈពេលកន្លងមក មានក្រុមហ៊ុនខ្លះបានផ្សាយពាណិជ្ជកម្មបោកប្រាស់ ធ្វើឲ្យប្រជាពលរដ្ឋដែលក្រីក្រ និងគ្មានការងារធ្វើស្រាប់ រឹតតែក្រថែមទៀត ដោយសារចាញ់បោកការផ្សាយពាណិជ្ជកម្មរបស់ក្រុមហ៊ុនទាំងនោះ។ «កសិកររៀបរាប់» នេះជាការរៀបរាប់របស់កសិករម្នាក់ឈ្មោះ សាត់ ពិសិដ្ឋ រស់នៅភូមិខ្នាធំ ឃុំពីរាម ស្រុកបាទី ខេត្តតាកែវ ដែលចាញ់បោកក្រុមហ៊ុនជ្រើសរើសពលករមួយឈ្មោះ មជ្ឈមណ្ឌល ជីភីស៊ី (GPC) កាលពីដើមឆ្នាំនេះ។
លោក សាត់ ពិសិដ្ឋ អាយុ ២៧ឆ្នាំ រំឭកថា គាត់ និងប្អូនប្រុស ២នាក់ទៀត គឺសាត់ ពិសាល និង សាត់ ពិសី សុទ្ធតែវ័យពេញកម្លាំងពលកម្ម ក៏បានសម្រេចចិត្តទៅខ្ចីប្រាក់ពីធនាគារដោយដាក់ប្លង់ផ្ទះ និងប្លង់ដី ដើម្បីយកប្រាក់ជិត ១ពាន់ដុល្លារ ទៅបង់ឲ្យក្រុមហ៊ុននៅភ្នំពេញ ក្នុងក្ដីរំពឹងថានឹងបានការងារធ្វើ និងមានជីវភាពប្រសើរជាងមុន។ ពេលយកប្រាក់ទៅបង់ឲ្យក្រុមហ៊ុននៅភ្នំពេញហើយ បងប្អូនបីនាក់ក៏វិលត្រឡប់មកភូមិកំណើតវិញ ដើម្បីរង់ចាំក្រុមហ៊ុនទូរស័ព្ទហៅទៅធ្វើការនៅប្រទេសថៃ ក៏ប៉ុន្តែចាំបាត់ៗ។ ឃើញដូច្នេះ សាត់ ពិសិដ្ឋ ក៏ឡើងទៅរកជួបមន្ត្រីក្រុមហ៊ុននៅភ្នំពេញ តែក្រុមហ៊ុននោះបានរើការិយាល័យបាត់អស់។ ចំណែកលេខទូរស័ព្ទដែលផ្សាយតាមវិទ្យុនោះ ក៏ទាក់ទងមិនបានទៀត ទើបដឹងខ្លួនថាចាញ់បោកគេ៖ «»។
សព្វថ្ងៃ បងប្អូនបីនាក់មិនត្រឹមតែមិនបានការងារធ្វើទេ តែថែមទាំងទទួលបន្ទុករកប្រាក់សងថ្លៃជំពាក់ធនាគារ មិនខុសពាក្យចាស់លោកពោលថា ប្រាក់ក៏បង់ថង់ក៏ដាច់ទេ។
បើតាមអាជ្ញាធរមូលដ្ឋាន មិនមែនមានតែបងប្អូនបីនាក់នេះទេដែលចាញ់បោកក្រុមហ៊ុនជ្រើសរើសពលករទៅធ្វើការនៅបរទេសនោះទេ គឺមានប្រជាពលរដ្ឋជាច្រើនទៀតដែលមានវាសនាមិនខុសពីបងប្អូនបីនាក់នេះដែរ។
មន្ត្រីក្រុមប្រឹក្សាឃុំពីរាម លោក ហេង គឹមស្រ៊ន រំឭកបន្ថែម៖ «»។
ទាក់ទងទៅនឹងប្រជាពលរដ្ឋចាញ់បោកក្រុមហ៊ុនជ្រើសរើសពលករទៅធ្វើការនៅបរទេសនេះ មន្ត្រីសមាគមអាដហុក (Adhoc) ប្រចាំរាជធានីភ្នំពេញ អ្នកស្រី ឆន សុគន្ធា ឲ្យដឹងថា ចំនួនពលករដែលចាញ់បោកគេមានការកើនឡើងរយៈពេល ៣ខែ ដើមឆ្នាំ២០១៥ ប្រៀបធៀបឆ្នាំ២០១៤ ក៏ប៉ុន្តែ អ្នកស្រីមិនបានបូកទិន្នន័យសរុបនៅឡើយ។ អ្នកស្រីបានប្ដឹងទៅក្រសួងការងារ និងបណ្ដុះបណ្ដាលវិជ្ជាជីវៈ ឲ្យស្រាវជ្រាវរកក្រុមហ៊ុនដែលបោកប្រាស់នោះ ដើម្បីផ្ដល់សំណងដល់ពលករ និងយកទៅផ្ដន្ទាទោសតាមច្បាប់ដែរ តែមកទល់ពេលនេះ អ្នកស្រីនៅមិនទាន់ទទួលចម្លើយនៅឡើយ៖ «»។
វិទ្យុអាស៊ីសេរី បានព្យាយាមទាក់ទងក្រុមអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ជាច្រើនថ្ងៃមកហើយដែរ តែក្រុមមន្ត្រីឆ្លើយថា ម្ដងជាប់បេសកកម្មទៅក្រៅប្រទេស ម្ដងថាជាប់រវល់ប្រជុំ។
ទោះយ៉ាងណា អ្នកស្រី ឆន សុគន្ធា យល់ថា ក្រសួងការងារ និងបណ្ដុះបណ្ដាលវិជ្ជាជីវៈ ជាអ្នកទទួលខុសត្រូវក្នុងរឿងនេះ។ អ្នកស្រីបញ្ជាក់ថា ដល់ពេលរដ្ឋាភិបាលត្រូវចាប់ផ្ដើមចាត់ការក្រុមហ៊ុនជ្រើសរើសពលករក្លែងក្លាយ និងអ្នកនៅពីក្រោយខ្នងទៅផ្ដន្ទាទោសហើយ បើមិនដូច្នេះទេ នឹងមានប្រជាពលរដ្ឋជាច្រើនរយនាក់ទៀតត្រូវចាញ់បោកក្រុមហ៊ុនទាំងនោះជាក់ជាមិនខាន។ ម្យ៉ាងវិញទៀត អ្នកស្រីបានអំពាវនាវដល់ក្រសួងព័ត៌មាន ឲ្យរឹតបន្តឹងកុំឲ្យមានក្រុមហ៊ុនបោកប្រាស់អាចផ្សព្វផ្សាយព័ត៌មានអកុសលដូច្នេះបន្តទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- កម្មករនៅតាកែវប្រមាណ៣០នាក់ដួលសន្លប់
- កម្មកររោងចក្រធី.អ.ស៊ី.អេធ្វើបាតុកម្មពីរថ្ងៃជាប់គ្នាទាមទារប្ដូរលក្ខខណ្ឌការងារ១០ចំណុច
- HRW ការពាររបាយការណ៍ស្ដីពីការរំលោភសិទ្ធិការងារក្នុងឧស្សាហកម្មកាត់ដេរ
- សមាគមរោងចក្រកាត់ដេរប្រតិកម្មតបអង្គការឃ្លាំមើលសិទ្ធិមនុស្ស
- លោក ម៉ម សូណង់ដូ សន្យាផ្ដល់ប្រាក់ខែឲ្យបុគ្គលិកដែលធ្វើបាតុកម្ម
- កម្មករខ្មែរស្របច្បាប់ប្រមាណ១ម៉ឺននាក់ប្រឈមនឹងការបណ្ដេញចេញពីប្រទេសថៃ
- ក្រសួងការងារចាត់ទុករបាយការណ៍របស់អង្គការសិទ្ធិមនុស្សអន្តរជាតិថាគ្មានវិជ្ជាជីវៈ
- បុគ្គលិកវិទ្យុសំបុកឃ្មុំតវ៉ាឲ្យលោក ម៉ម សូណង់ដូ គោរពច្បាប់ការងារ
- HRW៖ ការរំលោភសិទ្ធិកម្មករដោយថៅកែរោងចក្រនៅមានលក្ខណៈធ្ងន់ធ្ងរ