ដោយ៖ ណុប វី | ថ្ងៃចន្ទ ទី13 មេសា 2015
http://vodhotnews.com
ចំនួនក្រុមហ៊ុនដែលចុះបញ្ជីនៅក្រសួងពាណិជ្ជកម្ម កើនឡើង៤% នៅត្រឹម៣ខែដើមឆ្នាំ២០១៥ នេះបើប្រៀបធៀបនឹង៣ខែដើមឆ្នាំ២០១៤។
អ្នកនាំពាក្យក្រសួងពាណិជ្ជកម្ម លោក កែន រដ្ឋា ប្រាប់ VOD ក្នុងបទសម្ភាសន៍តាមទូរស័ព្ទនៅថ្ងៃទី១៣ ខែមេសា ថាមានក្រុមហ៊ុនថ្មីចំនួន១១០៨ក្រុមហ៊ុនបានចុះបញ្ជីនៅក្រសួងពាណិជ្ជកម្មចាប់ពីខែមករាមកដល់ខែមិថុនា ខណៈ៣ខែដើមឆ្នាំ២០១៤មានតែ១០៦៦ក្រុមហ៊ុនបានចុះបញ្ជី។ តាមលោក កែន រដ្ឋា ក្រុមចិនបាននាំមុខគេក្នុងចំនួនក្រុមហ៊ុនដែលចូលមកវិនិយោគក្នុងរយៈពេល៣ខែដើមឆ្នាំនេះ។ ក្រុមហ៊ុនកូរ៉េ ម៉ាឡេស៊ី និងជប៉ុនស្ថិតនៅក្នុងលំដាប់ទី២។ ក្នុងឆ្នាំ២០១៤ មានក្រុមហ៊ុនចំនួន៣៨៥០ក្រុមហ៊ុន បានចុះបញ្ជីនៅក្រសួងពាណិជ្ជកម្ម។
លោក កែន រដ្ឋា មានប្រសាសន៍ថា ការរីកចម្រើននេះ គឺដោយសារស្ថានភាពម៉ាក្រូសេដ្ឋកិច្ច ស្ថិរភាពនយោបាយដែលប្រសើរឡើង កត្តាច្បាប់ដែលលើកទឹកចិត្តដល់អ្នកវិនិយោគ និងផលប្រយោជន៍ដែលបានពីកិច្ចព្រមព្រៀងទ្វេរភាគីនិងថ្នាក់តំបន់ដែលកម្ពុជាមានជាមួយដៃគូររបស់ខ្លួន។
បើតាមលោក កែន រដ្ឋា ក្រសួងពាណិជ្ជកម្មបានបញ្ចប់ និងឈានទៅបញ្ចប់សេចក្តីព្រាងច្បាប់មួយចំនួនដែលទាក់ទងនឹងការវិនិយោគ។ ច្បាប់នោះរួមមានច្បាប់ការពារអ្នកប្រើប្រាស់ដែលបានដាក់ទៅទីស្តីការគណៈរដ្ឋមន្រ្តីរួចហើយ ច្បាប់ទាក់ទងនឹងការប្រកួតប្រជែងដែលបានកំពុងតែបញ្ចប់ពង្រាង ច្បាប់ការធ្វើពាណិជ្ជកម្មតាមប្រព័ន្ធអនឡាញដែលកំពុងស្ថិតនៅក្នុងការពង្រាងចុងក្រោយ ហើយគ្រោងនឹងដាក់ជូនទីស្តីការគណៈរដ្ឋមន្រ្តី។
រដ្ឋលេខាធិការក្រសួងការបរទេស លោក កៅ គឹមហួន មានប្រសាសន៍ប្រាប់VODក្នុងបទសម្ភាសន៍មួយកាលពីថ្ងៃ៨ ខែមេសាថាមានក្រុមហ៊ុនជប៉ុនចំនួន៩៨កំពុងវិនិយោគនៅក្នុងប្រទេសកម្ពុជា។ លោកមានប្រសាសន៍ដែរថាអ្នកវិនិយោគអាមេរិកមួយក្រុមនឹងមកដល់កម្ពុជាក្នុងខែមិថុនាខាងមុខនេះ ដើម្បីពិនិត្យមើលឱកាសវិនិយោគ៕
សរសេរមកកាន់លោក ណុប វី តាមរយៈnopvy@vodhotnews.com