ដោយ៖ យ៉ា រសាត់ | ថ្ងៃចន្ទ ទី13 មេសា 2015
http://vodhotnews.com
មើលរូបភាពបន្ថែម
កម្មកររោងចក្រកាត់ដេរ កំពុងបំពេញការងាររបស់ខ្លួន
ធនាគារពិភពលោកបានព្យាករថា ក្នុងឆ្នាំ២០១៥នេះ វិស័យកាត់ដេរកម្ពុជានឹងធ្លាក់ចុះជាងឆ្នាំមុន ព្រោះតែការនាំចេញទៅសហរដ្ឋអាមេរិកមានការធ្លាក់ចុះ ។
យោងតាមរបាយការណ៍របស់ធនាគារពិភពលោក ដែលត្រូវបានបង្ហាញក្នុងសន្និសីទសារព័ត៌មាននៅព្រឹកថ្ងៃចន្ទនេះ ឲ្យដឹងថាវិស័យកាត់ដេរកម្ពុជានឹងមានការធ្លាក់ចុះក្នុងឆ្នាំនេះ បើប្រៀបធៀបនឹងឆ្នាំ២០១៤ ដែលបណ្ដាលមកពីការនាំចេញផលិតផលកាត់ដេរទៅទីផ្សារសហរដ្ឋអាមេរិកធ្លាក់ចុះ ហើយសហគមន៍អឺរ៉ុបក្លាយជាទីផ្សារនាំចូលសម្លៀកបំពាក់កាត់ដេរកម្ពុជាធំជាងគេទៅវិញ ។ របាយការណ៍បញ្ជាក់បន្ថែមថា ការរំជើបរំជួលរបស់កម្មករនាពេលកន្លងមក កំណើនប្រាក់ដុល្លារ និងការកើនឡើងដៃគូរប្រកួតប្រជែងប្រាក់ឈ្នួលទាបរបស់ប្រទេសក្នុងតំបន់ ក៏ជាហេតុផលធ្វើឲ្យវិស័យកម្ពុជាមានការធ្លាក់ចុះផងដែរ ។
របាយការណ៍នោះបានលើកឡើងថា ក្នុងឆ្នាំ២០១៤ ការនាំចេញផលិតផលកាត់ដេរទៅទីផ្សារអន្ដរជាតិមានចំនួន៥,៥ពាន់លានដុល្លារ ក្នុងនោះទឹកប្រាក់១,៤ពាន់លានដុល្លារទទួលបានពីការនាំចេញទៅទីផ្សារប្រទេសផ្សេងៗក្រៅពីសហរដ្ឋអាមេរិក និងសហភាពអឺរ៉ុប។ ក្រៅពីវិស័យកាត់ដេរនៅកម្ពុជា មានវិស័យធំៗផ្សេងទៀតដូចជាសិកម្ម នឹងធ្លាក់ចុះផងដែរ ព្រោះតែការប្រកួតប្រជែងរបស់អង្ករថៃ និងមីយ៉ាន់ម៉ា ។ ចំណែកវិស័យទេសចរណ៍ក៏មានការធ្លាក់ចុះជាងឆ្នាំ២០១៤ដែរ ។
ធនាគារពិភពលោកក៏បានព្យាករដែរថា ការធ្លាក់ចុះរបស់វិស័យគោលទាំង៣នេះនឹងនាំឲ្យសេដ្ឋកិច្ចកម្ពុជាមានកំណើននៅត្រឹម៦,៩ ភាគរយក្នុង ២០១៥ និង២០១៦ ដែលកំណើននេះតិចជាងកំណើនឆ្នាំ២០១៤ ។ ធនាគារពិភពលោកក៏បានព្យាករថានៅឆ្នាំ២០១៧ សេដ្ឋកិច្ចកម្ពុជានឹងមានកំណើនត្រឹម ៦,៨ភាគរយ ។
ធនាគារពិភពលោកក៏បានបង្ហាញផ្លូវដល់កម្ពុជាដែរថា ដើម្បីរក្សាកំណើនសេដ្ឋកិច្ចនោះ កម្ពុជាត្រូវកាត់បន្ថយការចំណាយលើអគ្គិសនី ស្វ័យប្រវត្តិកម្មដំណើរការធុរកិច្ច និងការពង្រឹងបរិយាកាសវិនិយោគ ការបង្កើនការប្រកួតប្រជែង និងការធ្វើពិពិធកម្មសេដ្ឋកិច្ច(ធ្វើឲ្យសេដ្ឋកិច្ចបែបចម្រុះ) ។ ក្រៅពីនោះទៀតការកែលម្អការដឹកជញ្ចូនតាមផ្លូវគោក និងការសម្របសម្រួលនៅថ្នាក់ជាតិ និងមូលដ្ឋាន នឹងជួយបង្កើនតំបន់ទាក់ទាញភ្ញៀវទេសចរណ៍កាន់តែច្រើនឡើង ។ ការបង្កើនទិន្នផល និងគុណភាពស្រូវ ការកាត់បន្ថយចំណាយលើថ្លៃកិនស្រូវ និងការចំណាយលើផ្នែកភស្ដុភារ នឹងជួយលើកកម្ពស់ការប្រកួតប្រជែងស្រូវរបស់កម្ពុជាបានផងដែរ ។
អគ្គលេខាធិការនៃសមាគមរោងចក្រកាត់ដេរកម្ពុជា(GMAC) លោក ខេន លូ មានប្រសាសន៍ថាវិស័យកាត់ដេររបស់កម្ពុជាពិតជាមានការធ្លាក់ចុះមែន ដែលបណ្ដាលមកពីកត្តាជាច្រើន ។ ប៉ុន្តែលោកថាកត្តាសំខាន់ជាងគេ គឺកត្តាវិវាទបស់សហជីពរោងចក្រ និងការឡើងថ្លៃទំនិញនាំចេញពីកម្ពុជា ក្រោយពេលដំឡើងប្រាក់ខែឈ្នួលគោលអប្បបរមាដល់កម្មករ ដែលជាហេតុធ្វើឲ្យអ្នកបញ្ជាទិញទៅរកទិញនៅប្រទេសផ្សេងដែលមានតម្លៃថោកជាងទំនិញនាំចេញពីកម្ពុជា។
លោក ខេន លូ មានប្រសាសន៍ថា«មានហេតុផលច្រើន ប៉ុន្ដែហេតុផលសំខាន់ជាងគេមានពីរ ទី១បញ្ជាទិញគាត់មានការព្រួយបារម្ភ បារម្ភរឿងអី បារម្ភរឿងថានៅស្រុកខ្មែរ សហជីពគេធ្វើកូតកម្មអត់តាមនីតិវិធី គំរាមកំហែងធ្វើកូដកម្មអត់តាមវិធីរហូត អាហ្នឹងរឿងមួយ ទីពីរ ពេលដែលឡើងប្រាក់ឈ្នួលអតិបរមា តម្លៃយើងថ្លៃជាងគេ»។
ទោះជាយ៉ាងណាក៏ដោយ ការព្យាកររបស់ធនាគារពិភពមានភាពផ្ទុយគ្នានឹងការព្យាកររបស់ធនាគារអភិវឌ្ឍន៍អាស៊ី(ADB) ដែលថាសេដ្ឋកិច្ចកម្ពុជានឹងមានកំណើន៧,៣ ភាគរយក្នុងឆ្នាំ២០១៥នេះ។ ការព្យាកររបស់ធនាគារអភិវឌ្ឍន៍អាស៊ីបានគូសបញ្ជាក់ថាកំណើនសេដ្ឋកិច្ចកម្ពុជា គឺដោយសារភាពកាន់តែរឹងមាំរបស់ប្រទេសជាដៃគូពាណិជ្ជកម្មរួមមានសហរដ្ឋអាមេរិក ថៃ និងសហភាពអឺរ៉ុប ភាពធូរស្រាលនៃស្ថានភាពនយោបាយ និងទីផ្សារក្នុងស្រុក ភាពធូរស្រាលនៃស្ថានភាពនយោបាយ និងទីផ្សារពលកម្មក្នុងស្រុក រួមនឹងការធ្លាក់ចុះនៃតម្លៃប្រេងឥន្ធនៈ ៕
សរសេរមកកាន់លោក យ៉ា រសាត់ តាមរយៈ rorsart@vodhotnews.com