ដោយ៖​ អុិត សូធឿត​ | ថ្ងៃសុក្រ ទី17 មេសា 2015
http://vodhotnews.com

មើលរូបភាពបន្ថែម

​ឧកញ៉ា ថោង សារ៉ាត់ ដែល​ត្រូវបាន​ចោទប្រកាន់​ថា​ជា​មេខ្លោង​សម្លាប់​ឧកញ៉ា អុឹង ម៉េង​ជឺ កាលពី​ចុងឆ្នាំ​២០១៤ ត្រូវបាន​នគរបាល​ចាប់ខ្លួន និង​កំពុង​ធ្វើ​ការសាកសួរ ។​

​សារព័ត៌មាន​ Fresh News រាយការណ៍​ដោយ​ដកស្រង់​សម្តី​ស្នងការ​នគរបាល​រាជធានី​ភ្នំពេញ​លោក ជួន សុវណ្ណ ថា អាជ្ញាធរ​វៀតណាម​បាន​ចាប់ខ្លួន​ឧកញ៉ា ថោង សារ៉ាត់ បាន​កាលពី​យប់​ថ្ងៃ​ព្រហស្បតិ៍ រួច​បញ្ជូន​ខ្លួន​មក​ប្រគល់​ឲ្យ​នគរបា​លរា​ជ​ធានី​ភ្នំពេញ​នៅ​ព្រឹក​ថ្ងៃ​សុក្រ​នេះ​នៅ​ម៉ោង​ប្រមាណ​៨​និង​៣០​នាទី ។​

​ចំណែក​សារព័ត៌មាន​ដើម​អម្ពិល​បាន​ចុះ​ផ្សាយ​ដោយ​ដកស្រង់​សម្ដី​មន្ត្រីនគរបាល​រាជធានី​ភ្នំពេញ​ថា ប្រធាន​អង្គភាព​ប្រឆាំង​អំពើពុករលួយ​លោក ឱម យ៊ិនទៀង និង​ស្នងការ​នគរបាល​រាជធានី​ភ្នំពេញ លោក ជួន សុវណ្ណ បាន​និង​កំពុង​ធ្វើការ​សួរនាំ​ឧកញ៉ា ថោង សារ៉ាត់ នៅ​ការិយាល័យ ព្រហ្មទណ្ឌ​កំរិត​ធ្ងន់ ។ ក្រោយ​ការសួរនាំ ឧកញ៉ា ថោង សារ៉ាត់ នឹង​ត្រូវ​បញ្ជូន​ទៅកាន់​តុលាការ​ដើម្បី​ចាត់ការ តាម​ផ្លូវច្បាប់ ។​

VOD មិនអាច​ទាក់ទង​សុំ​ការបញ្ជាក់​ពី​ស្នងការ​នគរបាល​រាជធានី​ភ្នំពេញ​លោក ជួន សុវណ្ណ និង​អ្នកនាំពាក្យ​អគ្គស្នងការ​នគរបាល​ជាតិ​លោក គៀត ចន្ទ​ថា​រិទ្ធិ បាន​នៅឡើយ​ទេ ដោយ​ទូរ​សព្ទ​ចូល​តែ​គ្មាន​អ្នក​ទទួល ។​

​គួរ​រំ​ឮ​កថា កាលពី​ថ្ងៃ​ទី​២២ ខែវិច្ឆិកា ឆ្នាំ​២០១៤ នៅវេលា​ម៉ោង​ជាង​៧​យប់ លោក​ឧកញ៉ា អឹុង ម៉េង​ជឺ ត្រូវបាន​បាញ់សម្លាប់​៦​គ្រាប់​នៅ​ចំណុច​មុខ​ហាង​លក់​ផ្លែឈើ ឡោ តិច​សេង តាម​បណ្តោយ​ផ្លូវ​ព្រះសីហនុ ក្នុង​សង្កាត់​ទួល​ស្វាយព្រៃ​២ ខណ្ឌចំការមន ៕

សូម​សរសេរ​មក​លោក អុិត សូធឿត តាមរយៈ sothoeuth@vodhotnews.com