ដោយ៖ ស៊ុន ណារិន | ថ្ងៃចន្ទ ទី18 ឧសភា 2015
http://vodhotnews.com
លោកនាយករដ្ឋមន្រ្តីហ៊ុន សែន បានចេញអនុក្រឹត្យមួយ ដោយសម្រេចកាត់ដីជាង៦ពាន់ហិកតា ដើម្បីធ្វើប្រទានកម្មដល់ប្រជាពលរដ្ឋជាង១៧០០គ្រួសារ រស់នៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ ដែលតំបន់នោះធ្លាប់រងការចោទប្រកាន់ថាមានការបង្កើតតំបន់អបគមន៍ កាលពីឆ្នាំ២០១២។
អនុក្រឹត្យចុះហត្ថលេខាដោយលោកនាយករដ្ឋមន្រ្តី ហ៊ុន សែន កាលពីថ្ងៃទី០៨ ខែមេសា ឆ្នាំ២០១៥ ឲ្យដឹងថារដ្ឋាភិបាលសម្រេចកាត់ផ្ទៃដីចំនួន៨៤៨០,៧១ហិកតា នៅស្រុកឆ្លូង ខេត្តក្រចេះ ចេញពីដីគ្រោងផ្តល់សម្បទានសង្គមកិច្ច សម្រាប់ធ្វើប្រទានកម្មជាកម្មសិទ្ធិជូនប្រជាពលរដ្ឋ និងរក្សាទុកមួយចំណែកជាដីឯកជនរបស់រដ្ឋ ព្រមទាំងផ្តល់សិទ្ធិជាកម្មសិទ្ធិលើក្បាលដី។ អនុក្រឹត្យបន្តថាទំហំដីចំនួន៦១១១,៤១ហិកតា គឺសម្រាប់ធ្វើប្រទានកម្មជាកម្មសិទ្ធិជូនប្រជាពលរដ្ឋ ដែលបានកាន់កាប់ប្រើប្រាស់ និងដាំដុះជាក់ស្តែង និងទំហំ២៣៦៨,៣០ហិកតា គឺដើម្បីរក្សាទុកជាដីឯកជនរបស់រដ្ឋ នៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ។
អនុក្រឹត្យបញ្ជាក់ថាដីជាង៦ពាន់ហិកតាត្រូវបានផ្តល់សិទ្ធិជាកម្មសិទ្ធិលើ២៨៦៣ក្បាលដី ជូនប្រជាពលរដ្ឋ១៧៤០គ្រួសារ នៅ ភូមិប្រម៉ា ស្រុកឆ្លូង ខេត្តក្រចេះ។
បើតាមអនុក្រឹត្យ ក្នុងពេលដំណើរការវាស់វែង និងបែងចែកជាក់ស្តែង គណៈកម្មាធិការគ្រប់គ្រងដីរដ្ឋខេត្តក្រចេះ ត្រូវកាត់ចេញនូវចំណែកដីមួយចំនួនសមស្រប ដើម្បីរក្សាទុកសម្រាប់បម្រើផលប្រយោជន៍សាធារណៈជាអាទិ៍ ការអភិវឌ្ឍហេដ្ឋារចនាសម្ព័ន្ធ និងសង្គម នៅក្នុងមូលដ្ឋាន។
គួររំឮកថា កាលពីឆ្នាំ២០១២ ពាក់ព័ន្ធនឹងជម្លោះដីធ្លីនៅភូមិប្រម៉ា រដ្ឋាភិបាលបានចោទថាមានការបង្កើតតំបន់អបគមន៍ ដោយថាប្រជាពលរដ្ឋបានប្រដាប់ដោយអាវុធ ដូចជាពូថៅ កាំបិត ចបកាប់ ស្នា និង ព្រួញជាដើម។ រដ្ឋាភិបាលបានបញ្ជាឲ្យមានការបាញ់ប្រហារបង្រ្កាបតំបន់នោះ បណ្តាលឲ្យស្លាប់កុមារី
អាយុ១៤ឆ្នាំ ម្នាក់។ មនុស្សមួយចំនួនត្រូវបានចាប់ខ្លួន ក្នុងនោះមានលោក ប៊ុន រដ្ឋា ដែលជាសមាជិកសមាគមអ្នកប្រជាធិបតេយ្យ ផងដែរ។
ចំណែកប្រធានសមាគមអ្នកប្រជាធិបតេយ្យ និងជានាយកវិទ្យុសំបុកឃ្មុំ លោក ម៉ម សូណង់ដូ ត្រូវបានចាប់ខ្លួន និងត្រូវបានចោទប្រកាន់ក្នុងបទល្មើសចំនួន៤ រួមមានទី១-ជាអ្នកផ្តួចផ្តើមគំនិតប្រឆាំងអ្នករាជការសាធារណៈ ទី២- ធ្វើកុបកម្ម ជ្រៀតជ្រែក ខុសច្បាប់ នៅក្នុងការបំពេញមុខងារសាធារណៈរបស់អាជ្ញាធរ ទី៣- ញុះញង់ឲ្យប្រជាពលរដ្ឋកាន់អាវុធខុសច្បាប់ និងទី៤ -ប្រឆាំងនឹងអាជ្ញាធរស្របច្បាប់។
កាលពីខែមិថុនា ឆ្នាំ២០១២ លោកនាយករដ្ឋមន្ត្រី ហ៊ុន សែន បានបញ្ជាឲ្យចាប់ខ្លួនមេក្លោង៥នាក់ នៅក្នុងភូមិប្រម៉ា ឃុំកំពង់ដំរីដែលជាសមាជិកសមាគមអ្នកប្រជាធិបតេយ្យ។
ប្រជាពលរដ្ឋអះអាងថាជម្លោះដីធ្លីនៅភូមិប្រម៉ាពាក់ព័ន្ធនឹងក្រុមហ៊ុនកាសូទីម (Casotim)៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com