ដោយ៖ បូ សាវី | ថ្ងៃចន្ទ ទី25 ឧសភា 2015
http://vodhotnews.com
កម្មករម្នាក់ និងសមត្ថកិច្ច៣នាក់រងរបួស ដោយសារការប៉ះទង្គិចគ្នារវាងកម្មករអូសរទេះ និងសមត្ថកិច្ចច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ នៅរសៀលថ្ងៃចន្ទនេះ ។
អភិបាលក្រុងប៉ោយប៉ែតលោក ង៉ោ ម៉េងជ្រួន ឲ្យVODដឹងថា កម្មករអូសរទេះនៅច្រកអន្តរជាតិប៉ោយប៉ែត ប្រមាណ១០០នាក់ បានធ្វើបាតុកម្មតាំងពីម៉ោង៨ព្រឹក ដល់ម៉ោង១២ ថ្ងៃត្រង់ បង្កឲ្យមានការកកស្ទះចរាចរ ។ លោកថា ដើម្បីសម្រួលការកកស្ទះចរាចរនោះ សមត្ថកិច្ចបានបំបែកការតវ៉ា បណ្ដាលឲ្យកម្មករម្នាក់រងរបួសធ្ងន់ ហើយត្រូវដឹកទៅសង្គ្រោះបន្ទាន់នៅមន្ទីរពេទ្យ ។
លោក ង៉ោ ម៉េងជ្រួន បន្ថែមថា ក្រោយពេលមានកម្មកររងរបួស មានពាក្យចចាមអារ៉ាមថា កម្មករម្នាក់បានស្លាប់ក្នុងការប៉ះទង្គិចនោះ ជាហេតុធ្វើឲ្យកម្មករផ្ទុះកំហឹង ហើយនាំគ្នាប្រើដុំថ្មគប់ទៅលើសមត្ថកិច្ច បណ្ដាលឲ្យកងកម្លាំងបីនាក់រងរបួស ។
កម្មករម្នាក់ ក្នុងចំណោមកម្មករទាំងអស់ ដែលចូលរួមធ្វើបាតុកម្មនោះ លោកសន វាសនា ឲ្យ VOD ដឹងនៅរសៀលថ្ងៃចន្ទនេះថា ការធ្វើបាតុកម្មរបស់ក្រុមកម្មករទាំងអស់នោះ គឺដើម្បីទាមទារឲ្យគយបញ្ចុះតម្លៃទំនិញ និងឲ្យនគរបាលអន្ដោប្រវេសន៍ ឈប់យកថ្លៃចេញចូលប្រទេសថៃ ចំពោះអ្នកនៅក្នុងក្រុងប៉ោយប៉ែត ។
សូមរំឭកថា នៅខែមករាដើម ឆ្នាំ២០១៥នេះ កម្មករអូសរទេះជាង៣០០នាក់ នៅក្រុងប៉ោយប៉ែត បានតវ៉ាទាមទារឲ្យពន្ធដារគយច្រកប៉ោយប៉ែតបន្ធូរបន្ថយការយកពន្ធសម្រាប់កម្មករអូសរទេះ ប៉ុន្តែការតវ៉ានោះត្រូវបានកម្លាំងសមត្ថកិច្ចបង្ក្រាប ៕
សូមសរសេរមកលោក បូ សាវី តាមរយៈ savy@vodhotnews.com